Tímarit lögfræðinga - 01.11.1996, Page 89

bætt starf á vegum félagsins til skoðunar. Ein þeirra hugmynda sem til skoðunar
eru eru breytingar í útgáfumálum þannig að ráðist yrði í reglulega útgáfu
vandaðs fréttabréfs, e.t.v. í samvinnu við önnur félög lögfræðinga. Þá hefur
félagið óskað eftir samvinnu við Lögmannafélag íslands og Dómarafélag
Islands um ráðstefnu um stöðu lögfræðinga, menntun þeirra og endurmenntun.
Undirbúningur ráðstefnunnar er nú að hefjast og er undirbúningsnefnd sem í
eiga sæti Helgi Jóhannesson frá Lögfræðingafélaginu, Helgi I. Jónsson frá
Dómarafélaginu og Hreinn Loftsson frá Lögmannafélaginu rétt að hefja störf.
Ráðgert er að halda ráðstefnu þessa snemma næsta vor. Þá hefur stjórn félagsins
áhyggjur af því hvað fundarsókn hefur minnkað nú á síðustu árum. Af þeim
sökum hefur stjórnin beitt sér fyrir samvinnu við önnur félög lögfræðinga um
fræðafundi þegar fjallað er um efni sem hafa breiða skírskotun til allra
lögfræðinga. Stjórnin hyggst leita eftir auknu samstarfi á þessu sviði á komandi
starfsári. Þá hefur stjórnin í athugun að halda á hverju ári einn eða fleiri
félagsfundi annars staðar en í Reykjavík, t.d. á Akureyri, með það fyrir augum
að ná til félagsmanna sem búa annars staðar en á Reykjavíkursvæðinu.
Sigríður Ingvarsdóttir gjaldkeri í stjórn félagsins hefur ákveðið að gefa ekki
kost á sér til endurkjörs. Sigríður hefur setið í stjórninni í þrjú ár. Eru henni
sérstaklega þökkuð ötul og óeigingjörn störf í þágu félagsins.
Dögg Pálsdóttir
239