Hlín - 01.01.1944, Qupperneq 5

17. júní 1944.
Við erum þjóð við ysta haf
með unglingsfjör í sál.
Við eigum land, sem Guð oss gaf,
og gulli fegra mál.
Við háðum stríð við ís og eld
og útlent drottinvald.
Hver hetja sönn að hauðri feld
varð heilagt lausnargjald.
Vort fagra dýra fósturláð,
vor frelsi vígða bygð!
Við lifum þjer í lengd og bráð
í láni, gleði, hrygð.
Vor kærleikseldur, kraftur, vit
og hver vor dropi blóðs,
og huga vors og handa strit
skal hauðri vígt til góðs.
Ó, sækjum fram á sigurleið
með sæmd hins trúa manns,
sem aldrei þraut nje kulda kveið,
þó hvesti um slóðir hans.
Og vinnum afrek einn og einn,
svo eflist þjóðarhrós.
Til verka má ei vanta neinn,
sem vermir dagsins ljós.