Gerðir kirkjuþings - 01.01.2012, Page 16

16 17
kjörstjórnar sem taldi að kosningin yrði öruggari með póstkosningu. Jafnframt var kosin
fimm manna nefnd sem er ætlað það hlutverk að endurskoða starfsreglur um kosningu
biskups Íslands og vígslubiskupa og á hún að skila tillögum á næsta kirkjuþingi.
Pétur Kr. Hafstein ákvað af heilsufarsástæðum að segja af sér embætti forseta kirkjuþings
um mánaðarmótin mars-apríl sl. Mikill missir er af Pétri úr þessu embætti en hann er
óvenju glöggur og vel að sér í málum er varða íslensku þjóðkirkjuna, hvort heldur sem
eru fundarsköp kirkjuþings, löggjöf eða hvað annað er varðar kirkjuna. Alltaf var hægt
að leita til hans ef einhver vafi var á ferð. Á þeim 6 árum sem ég hef setið kirkjuþing hef
ég verið fyrsti varaforseti þess og nokkrum sinnum stýrt þingi þegar forseti hefur verið
frummælandi í málum. Árin á kirkjuþingi hafa verið mér afar dýrmæt, tími lærdóms
meðal annars í meðferð mála og fundarskapa. Pétur hefur verið sú fyrirmynd sem hefur
nýst mér vel í öðru starfi mínu. Ég vil þakka Pétri mjög góð kynni, hann er drengur góður,
sanngjarn, ákveðinn og fastur fyrir, úrræðagóður og með góða nærveru. Ég held að við
getum öll tekið undir það.
Ég óska honum af öllu hjarta góðs bata.
Þjóðkirkjan hefur orðið fyrir ágjöf og traust til hennar hefur beðið nokkurn hnekki. Það er
því eitt brýnasta verkefni kirkjunnar að endurheimta traust sitt og trúnað og ná til þeirra
sem hafa sagt sig úr þjóðkirkjunni. Þetta gerist ekki af sjálfu sér. Hér verður allt kirkjunnar
fólk að leggjast á eitt, ekki síst kirkjuþing, sem verður að leita allra leiða til að styrkja ásýnd
og stöðu þjóðkirkjunnar hjá þjóðinni.
Ég bið þess að við höfum það í huga hér í dag og endranær og að farsæld og friður megi
fylgja störfum og ákvörðunum þessa aukakirkjuþings.