Gerðir kirkjuþings - 01.01.2012, Side 57

57
þeirra var sú hvort kjósandi vilji að í nýrri stjórnarskrá Íslands verði ákvæði um þjóðkirkju
Íslendinga óbreytt frá því sem nú er. Kirkjuráð óskaði þá eftir því að biskup hlutaðist til
um að undirbúin yrði kynning fyrir sóknarnefndum og þjóðkirkjumönnum um stöðu
þjóðkirkjunnar í núgildandi stjórnarskrá og löggjöf og að tillögur yrðu lagðar fyrir næsta
kirkjuráðsfund. Í því sambandi skýrði biskup frá því að haldinn hefði verið samráðsfundur
um kynningu á stöðu þjóðkirkjunnar og að í undirbúningi væri vefur þar sem settar yrðu
fram upplýsingar um ríki og kirkju svo og svör við nokkrum grundvallarspurningum.
Á fundi þann 20. júní 2012 samþykkti kirkjuráð svofellda ályktun:
„Kirkjuráð minnir á að hin evangelísk lúterska þjóðkirkja er einn mikilvægasti grunn-
þáttur samfélagsins, opin, lýðræðisleg almannahreyfing sem heldur uppi þjónustu og
mannræktarstarfi um landið allt, opinber og lögbundin stofnun sem myndar ramma um
trúarhefð meirihluta þjóðarinnar, einstaklinga, fjölskyldna og heimila, og heldur utan um
mikilvæga arfleifð og minningu og menningu samfélagsins.
Í samfélagi þar sem æ fleiri trúarhreyfingar, trúarhættir og trúarhugmyndir hasla sér völl
og kalla til áhrifa felst menningarlegur og samfélagslegur styrkur í því að hafa opna og
rúmgóða þjóðkirkju sem stendur vörð um grundvallargildi á traustum stoðum sögu og
menningar.
Í vaxandi fjölmenningu hefur þjóðkirkjan stuðlað að virðingu og skilningi milli trúarbragða
og menningarheima. Þjóðkirkjan er auk þess einn mikilvægasti menningarmiðill í landinu
og gegnir lykilhlutverki gagnvart þeim veiku í samfélaginu og sem samstarfsaðili við þau
sem vinna að réttlæti og friði í heiminum.
Mikilvægt er að pólitísk og samfélagsleg sátt sé um þjóðkirkjuna sem og aðrar grund-
vallar stofnanir menningar og samfélags.
Kirkjuráð hvetur til þess að við væntanlega þjóðaratkvæðagreiðslu um stjórnarskrá verði
þess minnst, og að ný stjórnarskrá lýðveldisins Íslands geymi ákvæði um hina evangelísk
lútersku þjóðkirkju eins og verið hefur. Jafnframt því verði staða og réttindi annarra trú–
og lífsskoðunarfélaga tryggð með hliðstæðum hætti og gert var í stjórnarskrá Noregs en
þar segir:
„Allir þegnar ríkisins skulu njóta frelsis til trúariðkunar. Norska kirkjan, evangelísk-lútersk
kirkja er þjóðkirkja og skal sem slík njóta stuðnings ríkisins. Nánar skal það ákvarðað með
lögum. Öll trú- og lífsskoðunarfélög skulu njóta stuðnings með ámóta hætti.“
Í 19. gr. tillagna stjórnlagaráðs, að nýrri stjórnarskrá, sem afhentar voru forseta Alþingis
29. júlí 2011 segir:
„Í lögum má kveða á um kirkjuskipan ríkisins.
Nú samþykkir Alþingi breytingu á kirkjuskipan ríkisins og skal þá leggja það mál undir
atkvæði allra kosningabærra manna í landinu til samþykktar eða synjunar“.
Á fundi kirkjuráðs þann 13. ágúst 2012, þar sem m.a. var rætt um undirbúning
aukakirkjuþings þann 1. september 2012, var samþykkt að flytja tillögu til þingsályktunar
um að áfram yrði ákvæði um þjóðkirkjuna í stjórnarskrá lýðveldisins Íslands.
Aukakirkjuþing sem haldið var þann 1. september 2012 samþykkti svofellda ályktun: