Gerðir kirkjuþings - 01.01.2012, Blaðsíða 84

84 85
Nefndin leggur til að horft verði til þeirra sem hafa nú þegar þekkingu, reynslu og
fræðsluefni til að miðla til kirkjunnar og í því sambandi bendum við á samtökin „Blátt
áfram“ og efnið „Verndum þau“ sem er á vegum Barnaverndarstofu. Einnig viljum við
benda á dr. Berglindi Guðmundsdóttur sálfræðing sem væri tilbúin til samstarfs ef eftir
því væri leitað.
Á fundi nefndarinnar með Berglindi í júní síðastliðinn var því velt upp hvernig við gætum
hagað þeirri vinnu sem eftir er. Svo hægt væri að móta tillögur að fyrirmyndar viðbrögðum
kirkjunnar í kynferðisbrotamálum, einelti svo og öðrum ofbeldismálum. Nefndinni var
falið af kirkjuþingi 2011 að útvíkka verksvið sitt með það af leiðarljósi að allt ofbeldi færi í
farveg þannig að hægt væri að taka á því og vinna með það. Það var skoðun Berglindar að
hægt væri að fella saman forvarnir sem ættu við kynferðisofbeldi, einelti og annað ofbeldi.
Nefndin leggur það til að búin verði til aðgerðaráætlun fyrir sóknir landsins sem hefur það
að markmiði að verja þolendur annars vegar og starfsfólk kirkjunnar hins vegar. Fyrsta
skrefið væri fræðsla, annað skrefið væri aðgerðaráætlun og síðan yrði þetta útfært betur.
Grunnur lagður sem byggt væri ofan á.
Dr. Berglind er tilbúin að leggja kirkjunni lið hvað varðar þessa vinnu.
Það er skoðun nefndarinnar að það eigi að bjóða upp á öfluga fræðslu. Mikilvægt er að
allir sem starfa með einum eða öðrum hætti á vettvangi þjókirkjunnar þurfi og eigi að sitja
einhver námskeið og þá fyrst námskeið sem snýr að forvörnum. Þá þurfa allir sömuleiðis
að þekkja þau viðbrögð sem ber að fara eftir kunni einhver mál að koma upp.
Það var mikill áfangi þegar þjóðkirkjan setti á stofn fagráð og mótaði viðbrögð við
kynferðislegu ofbeldi. Æskilegt er að meta verkefni fagráðs og skoða hvernig best verður
búið að starfi þess áfram. Skynsamlegt er að fara yfir reglur um fagráðið og athuga hvort
þær þurfi að endurskoða og hvort æskilegt sé að víkka starfsemi þess er varða viðbrögð
gegn öðru ofbeldi. Leggur nefndin áherslu á að það sé gert í samvinnu við það góða fagfólk
sem starfar í fagráði þjóðkirkjunnar.
Eins og kynnt var í áfangaskýrslu nefndarinnar á kirkjuþingi árið 2011 náðist sátt
milli þjóðkirkjunnar og þriggja af þeim fjórum konum sem nefndar eru í skýrslu
rannsóknarnefndarinnar. Þann 10 júlí síðastliðinn var gengið frá niðurstöðu og sátt milli
þjóðkirkjunnar og Guðrúnar Ebbu Ólafsdóttur.
Nefndin hefur nú lokið því verkefni sem henni var falið á kirkjuþingi 2011. Við þökkum
öllu því góða fólki sem hefur komið á fund nefndarinnar og miðlað okkur af þekkingu
sinni og reynslu.
Við bendum á áfangaskýrslu úrbótanefndar sem skilað var til kirkjuþings 2011 til frekari
upplýsingar um störf nefndarinnar.