Félagsbréf - 01.12.1959, Page 22

BIRGIR SIGURÐSSON:
ÁNING
Hröð er förin
örskömm dvöl
á áningarstað
verum því hljóð
hver snerting
er kveðja
í hinzta sinni.
ÞÖGUL ORÐ
Þú hefur sagt mér
að þar sem dagur og nótt
haldast í hendur
og draumurinn vakir
á augum svefnsins
hafi sál þín búið sér hvílu
Og þú hefur sagt mér
að laða heim ljóð mín á ný
og gefa þeim hjarta sem hljómar
við andardrátt þeysins
sem hvíslar við glugga og dyr
Svo þau rísi úr sál minni
og hverfi til þín
þar sem þú hvílir í draumi
með þögul orð á vörum.