Bændablaðið - 08.10.2020, Síða 17

Bændablaðið | Fimmtudagur 8. október 2020 17
Alþjóðahafrannsóknaráðið
(ICES) hefur birt ráðgjöf sína um
veiðar ársins 2021 fyrir uppsjávar-
stofna. Leggur það til meiri veiðar
á norsk-íslenskri vorgotssíld en
minna af makríl og kolmunna.
Ekki er í gildi samkomulag milli
þeirra þjóða sem stunda veiðar á
norsk-íslenska síldarstofninum,
makríl og kolmunna um skiptingu
aflahlutdeildar og hver þjóð því sett
sér aflamark. Það hefur haft þær
afleiðingar að frá árinu 2013 hafa
veiðar verið umfram ráðgjöf ICES.
Norsk-íslensk vorgotssíld
Ráðgjöf ICES hvað varðar norsk-ís-
lenska vorgotssíld er í samræmi við
samþykkta aflareglu strandríkja að
afli ársins 2021 verði ekki meiri
en 651 þúsund tonn. Ráðgjöf yfir-
standandi árs var 526 þúsund tonn
og er því um að ræða 24% hækkun
í tillögum ráðsins um afla næsta árs.
Á vefsíðu Hafrannsókna stofnunar
segir að ástæða þess sé fyrst og
fremst að 2016-árgangur í stofnin-
um reynist sterkur og gert er ráð fyrir
að hann komi inn í veiðina á næsta
fiskveiðiári af meiri þunga. Áætlað
er að heildarafli ársins 2020 verði
um 694 þúsund tonn sem er 32%
umfram ráðgjöf.
Makríll
ICES leggur til, í samræmi við nýt-
ingarstefnu á makríl sem mun leiða
til hámarks afraksturs til lengri tíma
litið, að afli ársins 2021 verði ekki
meiri en 852 þúsund tonn. Ráðgjöf
yfirstandandi árs var 922 þúsund
tonn og því er um að ræða tæplega
8% lægri ráðgjöf nú.
Það skýrist af bæði minnkandi
hrygningarstofni og lægra mati á
honum nú en á síðasta ári. Lækkun
á ráðgjöf hefði orðið meiri ef ekki
hefði komið til endurmat og hækk-
un á veiðihlutfalli viðmiðunarmarka
sem ráðgjöfin byggir á.
Kolmunni
ICES leggur til, í samræmi við lang-
tímanýtingarstefnu á kolmunna, að
afli ársins 2021 verði ekki meiri en
929 þúsund tonn. Ráðgjöf yfirstand-
andi árs var 1,2 milljón tonn og er
því um að ræða 20% lækkun á ráð-
gjöf frá í fyrra.
Ástæðan fyrir lækkun á aflamarki
er minnkandi hrygningarstofn sökum
lítillar nýliðunar síðustu fjögur ár.
Áætlað er að heildarafli ársins
2020 verði tæplega 1,5 milljón tonn,
sem er 27% umfram ráðgjöf. /VH
Einhugur var á aðalfundi Strand-
veiði félagsins Króks, sem haldinn
var á Patreksfirði fyrir skömmu,
um að hafna með öllu frumvarpi
sjávarútvegsráðherra um að
stjórna grásleppuveiðum með
aflamarki.
Í umræðum um frumvarp sjáv-
arútvegsráðherra um atvinnu- og
byggðakvóta kom fram mikil
gagnrýni á uppsetningu varðandi
skiptingu 5,3% pottsins. Menn töldu
hana ruglingslega, meðal annars að
skiptingin væri ekki útskýrð með
tölum sem sýndu hvernig hún hefði
orðið miðað við veiðiheimildir á
yfirstandandi fiskveiðiári.
Fundurinn var sammála um að
hvika ekki frá samþykkt aðalfund-
ar LS 2019 að allir dagróðrabátar
fengju línuívilnun.
Hlutfall línuívilnunar verði aukið
Strandveiðifélagið Krókur leggur
til að línuívilnun verði haldið fyrir
línubáta og hlutfall hennar aukið í
samræmi við ályktanir LS; 30% fyrir
handbeitta línu, 20% sé lína stokkuð
upp í landi og 10% fyrir vélabáta.
Auk þess leggur Strand veiði-
félagið Krókur til að tryggðir verði
48 dagar í strandveiðikerfið, svæð-
isskipting verði afnumin og ráðherra
verði heimilt að banna sókn á rauð-
um dögum.
Strandveiðifélagið Krókur leggur
til að undanþága fyrir „eldri menn“
verði leyfð varðandi notkun afladag-
bókarappsins og krefst auk þess að
það verði einfaldað til muna.
/VH
Aðalfundur Strandveiðifélagsins Króks:
Slæleg stjórnun grásleppuveiða
Ráðgjöf Alþjóðahafrannsóknaráðsins:
Veiðar verði auknar á norsk-
íslensku vorgotssíldinni
– en dregið úr makríl- og kolmunnaveiðum
Alþjóðahafrannsóknaráðið (ICES)
vill að dregið verði úr veiðum á
kolmunna.
Lagt er til að veiðar á norsk-íslensku
síldinni verði auknar um 24%.
Ráðgjöf ICES miðar við 8% samdrátt
í makrílveiðum.