Gátt - 2004, Síða 5

F R Æ Ð S L U M I Ð S T Ö Ð A T V I N N U L Í F S I N S
5
Ágætu lesendur!
Ég vil byrja á að óska Fræðslumiðstöð atvinnulífsins til
hamingju með fyrsta tölublað ársrits síns sem ætlað er að
vera vettvangur rannsókna og fræðimennsku á sviði full-
orðinsfræðslu og símenntunar hér á landi. Markmiðið
með útgáfunni er að auka umræðu, miðla reynslu og
þekkingu á þessum efnum. Sá metnaður, sem þetta fram-
tak lýsir er lofsverður.
Stofnun Fræðslumiðstöðvar atvinnulífsins var mikilvægur
áfangi í því að efla fullorðinsfræðslu á Íslandi og safna
saman reynslu símenntunarmiðstöðva af námskeiðahaldi
og grunnmenntun fyrir fullorðna einstaklinga, greina þörf
fyrir nám og byggja brýr milli hins formlega og óformlega
skólakerfis. Um þetta var gerður sérstakur samningur
milli menntamálaráðuneytisins og Fræðslumiðstöðvar-
innar á seinasta ári og væntir ráðuneytið mikils af starfi
Fræðslumiðstöðvarinnar að þessum málum á næstu
árum.
Á undanförnum árum hefur verið lögð æ meiri áhersla á
að fólk tileinki sér viðhorf símenntunar, námi sé ekki lokið
í eitt skipti fyrir öll og að fólk verði að halda þekkingu
sinni við með endurmenntun. Hér er verk að vinna gagn-
vart þeim þjóðfélagshópum sem kannanir hafa sýnt að
hafa minnsta tilhneigingu til þess að sækja sér endur-
menntun, þeim sem minnsta hafa menntunina fyrir. Það er
brýnt að Fræðslumiðstöð atvinnulífsins skilgreini á
grundvelli þekkingar sinnar á menntaþörfum fullorðinna
einstaklinga á vinnumarkaði leiðir til þess að gera fólki
kleift að fá fyrra nám og starfsreynslu sína metna. Innan
símenntunarmiðstöðvanna hafa safnast upp reynslu-
sögur um það hvernig fólk með lítinn undirbúning hefur
fengið styrk og hvatningu á námskeiðum til þess að fara
til frekara náms – jafnvel á háskólastigi. Nú er lag að gera
enn betur og tengja saman ólík menntakerfi og brjóta
niður múra sem hamlað hafa fólki leið til náms og þroska.
Ráðuneytið telur brýnt að vinna verði lögð í að lýsa þessum
leiðum þannig að þær séu kunnar og öllum ljósar.
Í þessu sambandi hefur Fræðslumið-
stöðin gert tillögu um mat á tilteknu
námsframboði sem Mímir – símenntun
hefur boðið upp á í fullorðinsfræðslu
á undanförnum árum. Menntamála-
ráðuneytið hefur þegar fallist á að
meta megi 5 námskeið, MFA-skólann,
Landnemaskólann, Jarðlagnatækni,
Grunnmenntaskólann og Aftur í nám,
til eininga á framhaldsskólastigi. Er
þetta gert til þess að auðvelda fram-
haldsskólum að meta fyrra nám fólks
sem sótt hefur sér námskeið utan hins formlega skóla-
kerfis en endanlegt mat á fyrra námi og raunfærni er í
höndum viðkomandi skólameistara eins og segir í
aðalnámskrá framhaldsskóla.
Von mín er sú að vinna Fræðslumiðstöðvarinnar að mati
á óformlegu námi geti orðið til þess að rjúfa vegginn milli
formlega og óformlega skólakerfisins og stuðla að því að
menntastofnanir líti með opnum hug til þeirra einstaklinga
sem óska eftir að stunda nám í framhaldsskólum lands-
ins. Það hefur verið stefna ráðuneytisins að fólk eigi kost
á sveigjanlegu og sanngjörnu mati á áunninni þekkingu
sinni og reynslu og að mið verði tekið af líkindum þess
hvort það geti lokið því námi sem það vill stunda. Vinna
Fræðslumiðstöðvarinnar að þessu verkefni er enn á
byrjunarstigi en mun halda áfram og verður spennandi að
sjá hvaða árangri hún skilar þegar fram líða stundir.
Á V A R P M E N N T A M Á L A R Á Ð H E R R A
Þorgerður Katrín Gunnarsdóttir
menntamálaráðherra
F R Æ Ð S L U M I Ð S T Ö Ð A T V I N N U L Í F S I N S