Morgunblaðið - 13.01.2001, Blaðsíða 19

AKUREYRI
MORGUNBLAÐIÐ LAUGARDAGUR 13. JANÚAR 2001 19
Til sölu er 204 fermetra iðnaðarhúsnæði við
Fjölnisgötu á Akureyri. Stór hurð er á norðurhlið.
Upplýsingar í síma 893 0040 (Gísli)
Iðnaðarhúsnæði við Fjölnisgötu
TÓNLEIKAR verða haldnir í safn-
aðarheimili Dalvíkurkirkju á morgun,
sunnudaginn 14. janúar, og hefjast
þeir kl. 17.
Flytjendur á þessum tónleikum
eru Unnur Faidia Vilhelmsdóttir,
píanó, Vigdís Klara Aradóttir á saxó-
fón og Gudio Bäumer.
Á efnisskránni eru verkin Lombric
eftir Francios Rossé, Dou-Sonata eft-
ir Sofiu Gubaidulina, Adria eftir
Christian Lauba og Three Quarks for
Muster Mark eftir Randolph Peters.
Unnur hóf nám í píanóleik sjö ára
gömul, en píanókennaraprófi lauk
hún árið 1990 frá Tónlistarskólanum í
Reykjavík og einleikaraprófi ári síð-
ar. Hún stundaði framhaldsnám í
Bandaríkjunum og lauk doktorsprófi
haustið 1997. Hún hefur verið virk í
tónlistarlífinu eftir að hún kom heim
þaðan. Unnur kennir nú við Tónlist-
arskóla Kópavogs.
Vigdís Klara lauk fyrst prófum í
klarinettleik og á saxófón, en hélt þá
til framhaldsnáms í Sviss og dvaldi
auk þess eitt ár í Bandaríkjunum við
tónlistarnám. Hún hefur leikið með
nokkrum kammerhópum meðfram
kennslu, nú síðast í Sviss, en Vigdís
býr nú á Dalvík og kennir við tónlist-
arskólann þar.
Tónleikar
á Dalvík
FIMM tilboð bárust í smíði tengi-
byggingar milli FSA og Sels á Ak-
ureyri og voru þau öll yfir kostnaðar-
áætlun. Tilboðin voru opnuð hjá
Ríkiskaupum í vikunni.
SS Byggir ehf. átti lægsta tilboðið,
tæpar 15,4 milljónir króna, eða rúm-
lega 101% af kostnaðaráætlun sem
hljóðaði upp á tæpar 15,2 milljónir
króna. Össi ehf. bauð rúmar 16,4
milljónir króna, eða um 108% af
kostnaðaráætlun, Trésmiðja Ásgríms
Magnússonar bauð 16,8 milljónir
króna, eða rúmlega 110% af kostn-
aðaráætlun, Stáltak hf. bauð 17,5
milljónir króna, eða um 115% af
kostnaðaráætlun og Fjölnir ehf. bauð
rúmar 18 milljónir króna, eða tæp
119% af kostnaðaráætlun.
Jón Sigurðsson hjá Ríkiskaupum
sagði að eftir væri að fara yfir tilboðin
en að stefnt væri að því að ganga frá
samningi um verkið á næstu tveimur
vikum. Áætluð verklok samkvæmt út-
boðinu eru þann 20. maí í vor.
SS Byggir bauð lægst
í byggingu FSA og Sels
Öll tilboðin
yfir kostn-
aðaráætlun
FORSVARSMENN BGB-Snæfells
hafa ákveðið að setja á fjögurra tíma
næturvakt í frystihúsi félagsins á
Dalvík síðar í þessum mánuði, frá kl.
03-07. Þessi breyting kallar á fleira
starfsfólk en alls hafa um 50 atvinnu-
umsóknir borist til fyrirtækisins eða
mun fleiri en Sigurður Jörgen Ósk-
arsson yfirverkstjóri átti von á og
hægt er að verða við. Hann sagðist
frekar hafa verið hræddur um að fá
ekki nóg af fólki í vinnu.
Hjá fyrirtækinu hefur að jafnaði
verið 40 stunda vinnuvika fyrir utan
tilfallandi yfirvinnu eins og gengur í
slíkum rekstri. Með þessari nýju vakt
er verið að auka vinnsluna í landi og
bæta við 40 hálfum stöðum en ekki
liggur fyrir á þessari stundu hversu
margir verða ráðnir til starfa, þar
sem eitthvað er um að núverandi
starfsmenn ætli að bæta við sig vinnu.
Sigurður Jörgen sagði að á næt-
urvaktinni yrði unninn fiskur sem
yrði svo fluttur ferskur daglega beint
á markað erlendis með flugi. Hann
sagði fyrirtækið hafi sent prufusend-
ingar af ferskum fiski utan en að nú
ætti að fara að auka þann útflutning.
„Við höfum verið að gera lengri
samninga og um meira magn en áð-
ur.“
Sigurður Jörgen sagði að hráefnis-
öflunin hafi gengið upp og ofan og að
meira væri af smáfiski í aflanum nú.
Pökkunarstöð félagsins í Hrísey var
flutt til Dalvíkur fyrir um einu ári,
eins og flestum er kunnugt, og hefur
rekstur hennar gengið vel þetta
fyrsta ár á Dalvík. „Við erum alltaf að
ná betri og betri tökum á þessu og þá
um leið meiri afköstum og þau mark-
mið sem menn settu sér við flutning-
inn hafa gengið eftir. Hjá fyrirtækinu
starfa um 60 manns við vinnsluna.“
BGB Snæfell hyggst setja á fjögurra tíma næturvakt
Um 50 atvinnuumsóknir
hafa borist fyrirtækinu
♦ ♦ ♦