Morgunblaðið - 02.02.2005, Blaðsíða 19

MORGUNBLAÐIÐ MIÐVIKUDAGUR 2. FEBRÚAR 2005 19
MINNSTAÐUR
Útsölunni lýkur 5. febrúar
Enn meiri afsláttur síðustu dagana
Klappastíg 44 - sími 562 3614
Innleggsnótur og gjafakort í fullu gildi á útsölunni
AKUREYRI
STARFSMENN verktakafyrir-
tækisins GV grafna á Akureyri
lentu í hremmingum á Möðru-
dalsöræfum sl. laugardagskvöld.
Þeir voru á leið frá Eskifirði til
Akureyrar með bíla og tæki og
lentu þrír bílanna í gríðarlegu
hvassviðri með tilheyrandi
grjótregni og urðu fyrir miklum
skemmdum. Guðmundur Gunn-
arsson, framkvæmdastjóri GV
grafna, sagði að tjónið á bílum
og tækjum fyrirtækisins næmi
hundruðum þúsunda króna.
Einnig urðu miklar skemmdir á
veginum á löngum köflum og
nemur það milljónum króna.
„Skiltið fyrir Möðrudalsöræf-
in, sem staðsett er á Egilsstöð-
um, sýndi 12 metra á sekúndu
og við vorum því hvergi bangn-
ir. Þegar við komum að
skarðinu milli Möðrudals og
Víðidals skall á okkur þvílíkur
ofsavindur að grjóti rigndi yfir
bílana. Þá fauk klæðningin af
veginum fyrir framan nefið á
okkur og hafði reyndar fokið af
víða á leiðinni.“
Fremstur þessara þriggja bíla
GV grafna var flutningabíll með
tengivagn, þá vörubíll og aftast-
ur var Guðmundur á litlum pall-
bíl. Hann sagði að framrúðan og
lakkið hefðu skemmst á flutn-
ingabílnum, framrúðan á vöru-
bílnum brotnaði, lakkið
skemmdist og hlífar fuku af
honum. Rúða í gröfu sem var
uppi á vörubílnum brotnaði og
hlífar fuku af henni. Þá eyði-
lögðust þrjár rúður í pallbílnum
hjá Guðmundi og ein þeirra,
hliðarrúða hægra megin að aft-
an, sprakk inn í bílinn. Þá er
bíllinn mikið dældaður og lakkið
ónýtt. „Þetta var ekkert sand-
fok, heldur miklu frekar grjót-
fok. Á þessum stað var vind-
urinn kominn á öfuga hlið. Við
höfðum haft vindinn á vinstri
hlið bílsins en á þessum 20–50
metra kafla þar sem þetta gerð-
ist var vindurinn á hægri hlið.
Það voru tveir fólksbílar á eftir
mér, annar þeirra lítill og ég
skil ekki hvernig hann náði að
hanga á veginum. En það brotn-
uðu rúður í báðum fólksbílun-
um.“
Guðmundur sagði að eftir
þessi ósköp hefðu menn haldið
för sinni áfram og komist klakk-
laust til Akureyrar þótt víða
hafi verið mjög hvasst á leiðinni.
Guðni Nikulásson, rekstrar-
stjóri Vegagerðarinnar á Egils-
stöðum, sagði að klæðningin
hefði fokið af veginum meira og
minna á nokkrum stöðum en
samtals væri um að ræða 800–
1000 metra kafla. „Þarna var
foráttuveður og þetta eru ótrú-
lega miklar skemmdir. Mestar
eru skemmdir á leiðinni frá
Skarðsá að Möðrudalsleið. Við
erum að reyna að vinna við
bráðabirgðaviðgerð en það er
ljóst að tjónið hleypur á millj-
ónum króna,“ sagði Guðni.
Bílar skemmdust og klæðningin flettist af veginum
„Þetta var ekki sand-
fok heldur grjótfok“
Morgunblaðið/Kristján
Skemmdir Eigendur GV grafna gáfu lögreglunni á Akureyri
skýrslu í gær um þær skemmdir sem urðu á bílum og tækjum fyrir-
tækisins um helgina. Hliðarrúða í pallbílnum á myndinni brotnaði,
framrúðan eyðilagðist, lakkið eyðilagðist, auk þess sem bíllinn dæld-
aðist töluvert. Það eru því engar ýkjur að veðrið hafi verið vont.
300 þúsund í styrk | Stjórn Ein-
ingar-Iðju hefur samþykkt að styrkja
Iðnaðarsafnið á Akureyri um 100
þúsund krónur á ári næstu þrjú árin.
Stjórn safnsins fór þess nýlega á leit
við verkalýðsfélagið að það gerðist
einn af stuðningsaðilum safnsins til
næstu þriggja ára, en stjórnin er að
leita til ýmissa aðila á Akureyri til
þess að koma fjárhag safnsins á
traustari grunn en hann er nú á.
Lenging flugbrautar | Ein at-
hugasemd var gerð við tillögu að
breytingu á aðal- og deiliskipulagi
flugvallarsvæðsins á Akureyri. Þá
komu fram þrjár athugasemdir sem
beindust eingöngu að deiliskipulagi
svæðisins. Athugasemd við breytingu
á aðal- og deiliskipulagi kom frá Um-
hverfisstofnun, þar sem stofnunin
ítrekar umsögn sína frá 23. nóvember
2004. Hún telur ljóst að fram-
kvæmdir samkvæmt skipulagstil-
lögunum myndu hafa töluverð áhrif á
svæði sem eru mikilvæg fyrir fugla
sem varp- og fæðuöflunarsvæði og
telur að endurskoða eigi skipulags-
áætlanirnar til að draga úr áhrifum
framkvæmda á fuglalíf. Þá telur
stofnunin rétt að ekki verði farið í
frekari efnistöku á Leirunum fyrr en
farið hefur fram úttekt á hugs-
anlegum áhrifum hennar.
Málið var kynnt á síðasta fundi um-
hverfisráðs en afgreiðslu frestað. Í
tillögum að breytingum á flugvall-
arsvæðinu er m.a. gert ráð fyrir því
að hægt verði að lengja flugbrautina
á Akureyrarflugvelli um allt að 400
metra til suðurs.
Félagsvísindatorg| Ingólfur Á.
Jóhannesson flytur fyrirlestur í dag,
miðvikudaginn 2. febrúar
kl. 16.30 í stofu L201 á Sólborg og
nefndist hann: Drengir í skólum:
Goðsagnir og veruleiki.
Þar mun hann gefa yfirlit um um-
ræður um stöðu drengja í skólum.
Ingólfur telur að karlmennsku-
hugmyndunum þurfi að breyta og
því ræðir hann leiðir til að stuðla að
jafnréttisuppeldi og áhuga drengja á
svokölluðum kvennastörfum.
LANDAÐUR afli á Akureyri á síð-
asta ári nam 60.688 tonnum, á móti
87.530 tonnum árið áður og munar
þar mestu um minni loðnuafla í fyrra.
Hins vegar jukust tekjur hafnarinnar
um tæplega 20 milljónir króna á milli
ára, voru um 175 milljónir króna í
fyrra á móti um 156 milljónum króna
árið 2003. Munar þar mestu um auk-
inn fjölda skemmtiferðaskipa og
aukna þjónustu við þau. Hörður Blön-
dal, hafnarstjóri Hafnasamlags Norð-
urlands, sagði að um 180.000 tonn af
vörum færu um höfnina á Akureyri
árlega og þar af væri olía um helming-
urinn. Hann sagði að gámaflutningar
sjóleiðina hefðu lagst af en þegar þeir
voru hvað mestir árið 1999, fóru um
höfnina yfir 100.000 tonn af vörum í
gámum.
Hörður sagði að menn hefðu leitað
annarra leiða og að það hefði færst í
vöxt að fyrirtæki væru að taka hingað
frystiskip til fraktflutninga og landa
afla fiskiskipa beint á milli skipa til út-
flutnings. „Þetta er ákveðin tilfærsla,
heildarmagnið sem fer um höfnina er
svipað og undanfarin ár en tekjur
hafnarinnar hafa aukist og þá fyrst og
fremst vegna þess að við erum að fá
hingað fleiri og stærri skemmtiferða-
skip.“
Síðastliðið sumar komu 53
skemmtiferðaskip til Akureyrar og
með þeim rúmlega 32.600 farþegar og
rúmlega 16.000 manns í áhöfn. Að
sögn Harðar verða komur skemmti-
ferðaskipa um 60 næsta sumar. Áætl-
aður fjöldi farþega er 42.000 og um
20.000 manns í áhöfn skipanna.
Þjónusta við skemmtiferðaskip eykst ár frá ári hjá Hafnasamlagi Norðurlands
Samdráttur í
lönduðum afla en
aukning í tekjum
Morgunblaðið/Kristján
Löndun Í gær var unnið við löndun úr Víði EA, frystitogara Samherja, í Fiskhöfninni á Akureyri.
  
  
VALGERÐUR Sverrisdóttir iðnaðarráðherra
opnaði formlega nýjan vef Vaxtarsamnings
Eyjafjarðar, klasar.is, á ráðstefnu sem efnt
var til í gær. Einn helsti sérfræðingur heims á
sviði klasa, Ifor Williams, flutti þar erindi og
var einnig leiðbeinandi á námskeiði sem haldið
var á mánudag til að kynna klasastarfið.
Vaxtarsamningur Eyjafjarðar er samstarfs-
verkefni opinberra og einkaaðila um uppbygg-
ingu atvinnulífs við Eyjafjörð. Unnið er sam-
kvæmt kenningum um fyrirtækjaklasa með
samvinnu fyrirtækja, stofnana og sveitarfé-
laga um eflingu atvinnulífs og bætt umhverfi
fyrir atvinnustarfsemi. Lögð er áhersla á þær
atvinnugreinar sem eru nú þegar sterkar í
Eyjafirði og styðja þær enn frekar til að takast
á við alþjóðlega samkeppni. Fyrirmynd vaxt-
arsamningsins er sótt í þann klasa sem Íslend-
ingar þekkja hvað best, Oulu í Finnlandi, en
dæmi um alþjóðlegt fyrirtæki á því svæði er
hátæknifyrirtækið Nokia. Í kringum það hafa
mörg nýsköpunarfyrirtæki orðið til og byggst
upp í hátækniklasa. Klasar eru skilgreindir
sem landfræðileg þyrping tengdra fyrirtækja,
birgja, þjónustuaðila og stofnana á sérhæfðum
sviðum sem eiga í samkeppni en einnig sam-
vinnu. Skilgreindir hafa verið fjórir klasar á
Eyjafjarðarsvæðinu og verða þeir þunga-
miðjan í Vaxtarsamningi Eyjafjarðar; Matvæ-
laklasi, Ferðaþjónustuklasi, Mennta- og rann-
sóknaklasi og Heilbrigðisklasi.
Ráðstefna um Vaxtarsamning
Mikill áhugi
fyrir verkefninu
Morgunblaðið/Kristján
Vefur Valgerður Sverrisdóttir, iðnaðar- og
viðskiptaráðherra, opnaði nýjan vef
Vaxtarsamnings Eyjafjarðar á ráðstefnu
verkefnisins á Hótel KEA. Við hlið hennar
stendur Sigríður Margrét Oddsdóttir frá
IMG, sem stjórnaði ráðstefnunni.