Fréttablaðið - 20.12.2005, Page 44

4 ■■■■ { jólin 2005 } ■■■■■■■■■■■■■■■■■■■■■■■■■■■■■■■■■■■■■■■■■■■■■■■■
„Þetta var þannig að mamma gamla
var alltaf með alla fjölskylduna á
jóladag. Svo stækka fjölskyldur eins
og gengur og gerist og það varð of
mikið stress og álag fyrir mömmu
að standa í að sjá um allan matinn
og halda svona stóra veislu,“ segir
María Guðmundsdóttir, fyrrverandi
ritstjóri hjá útgáfufélaginu Heimi.
„Þá þróaðist þetta þannig hjá okkur
að við systkinin ákváðum bara að slá
saman í jólaveislur og hver og einn í
fjölskyldunni kemur með eitthvað.“
Alls eru þetta um 35 manns
sem mæta í jólaboðin í fjölskyldu
Maríu, en þau systkinin skiptast á að
halda boðið. Þau borða yfirleitt það
sama, hefðbundinn jólamat, heitt
hangikjöt með kartöflumús og öllu
tilheyrandi ásamt síld, rækjuhlaupi,
rækjum í aspas, magálum, eplasalati
og öðrum réttum sem hæfa köldu
borði á jóladag. Móðir Maríu mætir
að sjálfsögðu í boðin en hún er
hætt að þurfa að sjá um veitingar.
Barnabörn hennar eru farin að sinna
eftirréttunum.
„Þetta er svona fremur
hefðbundinn matseðill sem helgast af
því að við vorum vön að fá þennan
mat á jóladag í foreldrahúsum í
gamla daga og flestir vildu halda
sig við þessa hefð, ekki síst börnin
okkar,“ segir María. „Við skiptum
með okkur verkum þannig að allir
innan þessara fimm fjölskyldna
taka eitthvað að sér. Vanalega þarf
gestgjafinn lítið að sjá um annað en
að bjóða upp á húsnæðið, diska, glös
og þess háttar, svo hans hlutverk er
minna í undirbúningnum af því að
hann heldur boðið. Þetta hefur gefið
mjög góða raun.“
Annað sem þetta fyrirkomulag
gerir, að sögn Maríu, er að fólk
verður áhugasamara um jólaboðið
og hlakkar meira til að mæta. „Þarna
eru allir þátttakendur. Allir slá saman
og þetta verður minni vinna fyrir
hvern og einn, en samt jafnglæsilegt
jólahlaðborð og er ekki nein
brjálæðisleg vinna fyrir einhvern
einn aðila, sem er náttúrulega mikið
álag, sérstaklega þar sem flestar
konur vinna úti í dag,“ segir María.
Jólaboðið gert
einfalt
María Guðmundsdóttir og systkini hennar fjögur brugðu
á stórsniðugt ráð þegar móðir þeirra tók að eldast og
fjölskyldan að stækka og stór jólaboð urðu heldur mikil
vinna fyrir eina roskna konu.
Innkaupalisti
MARÍU GUÐMUNDSDÓTTUR
FYRIR 30 MANNA MATARBOÐ
Forréttur:
500 gr rækjur (í 2 form)
1 dós kræklingur
3-4 egg (harðsoðin)
2 bréf Toro-hleypir (Aspas-gelé)
Skreytt með niðurskorinni
papriku og gúrkum
Í sósu þarf majónes og/eða
sýrðan rjóma og sweet relish
2x200 gr dósir kartöfluflísar
3 tegundir síld
3-4 pk rúgbrauð
Aðalréttur:
3 kg hangilæri
2,0-2,4 kg hangiframpartur
2 pk ca 0,5 kg magáll
2,6-3,0 kg bökunarkartöflur fyrir
kartöflumús
2 heildósir grænar baunir
Heimalagað rauðkál ( 1 meðal-
stórt rauðkálshöfuð, 2-3 msk
svínafeiti/smjör eða smjörlíki,
1 stór laukur, 4 epli, 3dl
rauðvínsedik eða rifsberjasaft,
10 negulnaglar, salt og síróp)
Jólasalat (smjör, hveiti, mjólk,
150 gr rauðbeður + safi, 3 epli,
sinnep, salt og smá sykur)
Laufabrauð 20-30 stykki
Eftirréttur
Heimalagaður ís um 6 lítrar
karamellusósa ( sykur, rjómi
soðið vatn)
ískex
Kaffi og konfekt

Gos, Egils malt 12x0,5 l
Egils appelsín 6x2 lítra flöskur.
Þeir sem vilja taka með sér
rauðvín eða bjór.
Matseðillinn
Fjölskylda Maríu hefur haldið
lista yfir hvað þarf í jóladagsboð
fyrir 30 manns og deilir
hún listanum með lesendum
Fréttablaðsins.
Forréttur:
Rækjuhlaup ( með rækjum,
skelfiski og eggjum) borið
fram með kokteilsósu og
kartöfluflísum. Síld og rúgbrauð.
Aðalréttur:
Hangikjöt, magáll, kartöflumús,
grænar baunir, heimalagað
rauðkál, jólasalat (epla-og
rauðbeðusalat) ásamt laufabrauði.
Desert.
Heimalagaður ís, heimalöguð
karamellusósa og ískex. Kaffi og
konfekt.
María Guðmundsdóttir, fyrrverandi ritstjóri, að elda rauðkál í eldhúsinu sínu.