Tímarit lögfræðinga - 01.12.1990, Blaðsíða 67

VIII. Eins og getið var um á síðasta aðalfundi hefur sú hugmynd verið rædd að
félagið standi að útgáfu nýs lögfræðingatals, sem er orðin mjög brýn. Mál þetta
hefur verið til ýtarlegrar umfjöllunar á árinu. Stjórnin tók upp viðræður við frú
Ólöfu Bjarnadóttur, ekkju Agnars Kl. Jónssonar og handhafa höfundaréttar að
verkinu Lögfræðingatal, og leitaði eftir heimild hennar til að fá að nota verkið
við gerð hinnar nýju útgáfu. Frú Ólöf lýsti sig reiðubúna til að heimila félaginu
að nota Lögfræðingatal Agnars KI. Jónssonar á hvern þann hátt sem félagið
ákveður og einnig í síðari útgáfum af lögfræðingatali. Samningur var gerður við
frú Ólöfu um þetta afsal, dags. 22. þ.m. Stjórnin hefur því ákveðið að standa að
útgáfu lögfræðingatals og mælist til að sú útgáfa verði liður í starfsemi félagsins
ásamt útgáfu Tímarits lögfræðinga. Verður að telja að vel fari á því að félagið
annist útgáfu þessara tveggja rita og er næsta skref að hrinda verkinu í
framkvæmd. Væntir stjórnin góðrar samvinnu við alla félagsmenn um útgáfuna,
sem verður þá sameiginlegt mál þeirra. Lögmannafélag Islands veitti félaginu
rausnarlegt fjárframlag til þess að festa kaup á höfundaréttinum að Lögfræð-
ingatali Agnars Kl. Jónssonar, og gerði með því félaginu kleift að eignast hann
og er stjórn Lögmannafélagsins þakkaður þessi mikilvægi stuðningur.
Félagið þakkar frú Ólöfu Bjarnadóttur fyrir hlýhug hennar í garð félagsins
sem hún hefur sýnt með afsali sínu, og mun félagið leitast við að gæta sæmdar
Agnars Kl. Jónssonar, heiðursfélaga síns, í hvívetna við útgáfu lögfræðingatals.
IX. Samstarf stjórnar hefur verið prýðilegt, og þakka ég samstarfsmönnum
mínum ánægjulega samvinnu og félagsmönnum öllum fyrir þáttöku í félags-
starfinu.
Garðar Gíslason
193