Tímarit lögfræðinga - 01.11.1996, Síða 3

LÖGFRÆÐINGA
3. HEFTI 46. ÁRGANGUR NÓVEMBER 1996
NÝTT DÓMHÚS HÆSTARÉTTAR ÍSLANDS
Fimmtudaginn 5. september síðastliðinn var tekið formlega í notkun nýtt og
glæsilegt dómhús Hæstaréttar með hátíðlegri athöfn. Þetta var gleðilegur
atburður fyrir margra hluta sakir, en þó fyrst og fremst fyrir það, að um árabil
hafði nánast öll starfsaðstaða Hæstaréttar verið réttinum ósamboðin svo ekki sé
fastar að orði kveðið, en nú hafði verið úr því bætt. Sú bygging þar sem
Hæstiréttur var til húsa var reist á árunum 1946-1948 og átti að vera dómhús
réttarins til bráðabirgða. Hugmynd Guðjóns Samúelssonar húsameistara mun
hafa verið sú að þessi bygging yrði miðja og aðalinngangur Stjórnarráðsins,
sem síðan átti að bæta álmu við inn með Lindargötu. Hæstiréttur hafði hins
vegar aðsetur þarna í nærri hálfa öld við síversnandi starfsskilyrði, bæði vegna
fjölgunar dómara og starfsfólks réttarins og eins vegna lélegs viðhalds hússins.
Bágborin starfsaðstaða Hæstaréttar var ekki síst áberandi vegna þess að við
aðskilnað dómsvalds og umboðsvalds í héraði árið 1992 fengu velflestir
héraðsdómstólanna viðunandi aðstöðu og sumir ágæta, sem þeir höfðu fæstir
áður. Húsnæðismál íslenskra dómstóla eru nú í mun betra horfi en nokkru sinni
fyrr þótt bæta þurfi um á stöku stað. Nú er svo komið að íslenskir dómstólar
ættu að geta staðist samanburð við dómstóla í nágrannalöndunum að því er
húsnæði varðar að minnsta kosti.
Þótt á sínum tíma væri nokkuð deilt um staðsetningu dómhúss Hæstaréttar þá
urðu það hvorki harðar deilur né langvinnar og ekki verður annað séð en þeir
sem voru á móti því að húsið risi þar sem það nú stendur virðist hvorki sárir né
móðir. Það skiptir nokkru máli að menn uni bærilega sínum hlut að þessu leyti,
enda þótt alvanalegt sé að deilur rísi um það hvar hús skuli standa ekki síst
opinberar byggingar. Er þar skemmst að minnast deilna um staðsetningu húss
Seðlabanka Islands og Ráðhúss Reykjavíkur.
153