Frjáls verslun - 01.04.2007, Page 108

108 F R J Á L S V E R S L U N • 4 . T B L . 2 0 0 7
SUMARIÐ ER TÍMINN
„Ég veiddi minn fyrsta
lax í Mýrarkvísl í Suður-
Þingeyjarsýslu í kringum
1980,“ segir Pétur
Björnsson, stjórnarformaður
Ísfells. „Síðan fór ég í árlegan
veiðitúr í Víðidalsá frá árinu
1998 og af og til í Hafralónsá
í Þistilsfirði frá svipuðum
tíma. Vorið 2004 stofnaði ég
veiðifélag ásamt sjö félögum
mínum og tókum við á leigu
Hafralónsá. Síðan hef ég
stundað stangveiði töluvert.“
Pétur segist hafa alist upp
við fiskveiðar þannig að allur
veiðiskapur heilli sig og þá
sérstaklega stangveiði.
„Þegar ég er í stangveiði
hvíli ég hugann frá öllu öðru
en viðfangsefni dagsins en
þetta reynir jafnframt duglega
á líkamann. Auk þess fylgir
þessu mikil útivera og góður
félagsskapur.“
Stærsti laxinn sem Pétur
hefur veitt var 17 pund og og
var hann veiddur í Hafralónsá
sem er uppáhaldsá Péturs.
Þess má geta að Pétur
á sumarbústað í Öxarfirði
í fallegu og vel grónu
umhverfi. Stutt er í nátt-
úruperlur eins og Ásbyrgi,
Dettifoss, Mývatnssveit og á
Melrakkasléttuna sem hann
segir að sé vanmetin perla í
íslenskri náttúru.
Pétur og eiginkona hans
dvelja í bústaðnum lungann
úr sumrinu auk þess að
dvelja þar í nokkra daga á
öðrum árstímum. „Þetta er
okkar annað heimili þannig
að ég sinni vinnu minni
þaðan þegar við dveljum þar
lengi.“
Þess má geta að Litlaá
í Kelduhverfi er í um 15
mínútna akstursfjarlægð
frá bústaðnum og svo er
klukkutíma akstur í árnar í
Þistilfirði og í Laxá í Aðaldal.
Pétur getur því sinnt áhuga-
málinu þegar hann dvelur í
bústaðnum.
Pétur Björnsson:
Stærsti laxinn 17 pund
Pétur Björnsson. „Þegar ég er í stangveiði hvíli ég hugann frá öllu öðru en viðfangsefni dagsins en þetta reynir jafnframt duglega á líkamann.“