Tímarit Máls og menningar - 01.12.1946, Blaðsíða 6

244
TÍMARIT MÁLS OG MENNINGAR
menningar en ef til vill nokkru sinni fyrr. A íslenzka þjóðin að trúa því um
menntamenn sína að þeir ætli að halda að sér höndum og láta allt danka eins
og það er, án þess að sýna í verki að þeir vilji engu síður nýsköpun á sínu
sviði en þá sem öll þjóðin er að reyna að framkvæma á sviði atvinnumála og
verklegra framkvæmda?
í þessum fáu orðum hafa ekki verið boðuð nein ný sannindi; ég býst meira
að segja við því að allur þorri íslenzkra menntamanna sé mér sammála, að
minnsta kosti í hjarta sínu. En af hverju þarf þá að segja þetta? Jú, af því að
allt of margir sjá hvað rétt er í þessu efni en gera lítið eða ekkert til að breyta
eftir því. Ástæðurnar geta verið margvíslegar, en þær eiga eitt sameiginlegt:
/«nr eru ekki gildar. Ef íslenzkir menntamenn sjá hvað hér er í húfi og reyna
ekki að bæta úr því, hafa þeir glatað rétti sínunt til að heita menntamenn.
Orðið er laust; Tímaritið bíður með óþreyju eftir tillögum og rökræðum
um framtíð íslenzkrar menningar.
J.B.