Tímarit Máls og menningar - 01.02.1960, Page 55

JÓN FRÁ PÁLMHOLTI
SAUNGUR VÉLANNA í TOGARANUM MÁNA
Skipið nötrar
Eg sit á kassa í vélarúminu og hlusta á saung vélanna
taktfastan þúngan slátt málms við málm
Skipið nötrar
Það urgar í smurníngslausum koppum
og stigarnir titra undan snöggum fótatökum
Ég sezt aftur og hlusta
kliðmjúk er ángan orðanna sem koma til mín
og hverfa í taktþúngan vélsláttinn án þess ég fái gripið þau
Ég sit aðeins og hlusta
Þeir segja:
Það er eingin ást í þessum gjallandi hávaða
þetta er ekki saungur hinnar frjósömu móður
ekki kliður læks eða lýngilmur
Við þreytumst afþví vélarnar bergmála ekki saunginn í brjóstum okkar
Ég sit og hlusta
Við skulum ekki verða þreyttir á vélunum
Við höfum skapað þessar vélar og gefið þeim afl
Strit þeirra færir okkur brauð og leiki
og sparar heilum okkar og vöðvum áreynslu
Við skulum gleðjast yfir þessum saung og hverfa ánægðir til kvenna
okkar og barna
Skipið nötrar
Ég sit og hlusta á saung vélanna
taktfastan þúngan slátt málms við málm
og Lífið og Dauðinn takast í hendur yfir borðstokkinn
45