Són - 01.01.2003, Síða 5

Til lesenda
Rit það sem hér hefur göngu sína er helgað óðfræði en svo nefnast
fræðin um ljóðlist í víðasta skilningi.
Það er skoðun okkar sem að þessu tímariti stöndum að full þörf sé
á að fræði um ljóðlist og ljóðagerð fái nýtt málgagn. Verði þessu riti
vel tekið hyggjumst við halda útgáfunni áfram og gefa þá út tvö hefti
á ári. Leitast verður við að hafa ritið sem fjölbreyttast og því ekki gert
ráð fyrir neinum föstum þáttum nema hvað reynt yrði í öðru hverju
hefti að gefa yfirlit um helstu tíðindi í íslenskri ljóðagerð á fyrra ári.
Sónarljóð nefnum við upphafsljóð ritsins og er „Kyssen“ eftir
Johan Ludvig Runeberg Sónarljóð þessa fyrsta heftis. Er það hér bæði
birt á frummálinu og í þýðingu Helga Hálfdanarsonar, mikilvirkasta
ljóðaþýðanda okkar Íslendinga frá upphafi vega.
Fjallað verður um einkenni ljóða og sögu kveðskaparlistar í ald-
anna rás. Þá er ætlunin að birta í ritinu skáldskap, bæði gamlan og
nýjan, og einnig er gert ráð fyrir að ljóðaþýðingar fái þar sinn sess.
Frá því segir í Eddu Snorra Sturlusonar að skáldamjöðurinn hafi
verið varðveittur í tveim kerum, Són og Boðn, og katlinum Óðreri.
Rit það sem hér kemur fyrir manna sjónir hefur hlotið nafn af hinu
fyrra kerinu og er það von okkar útgefenda að mjöður þess gleðji þá
er á dreypa.
Fyrir hönd Sónarsinna,
Kristján Eiríksson