Saga - 2004, Side 168

Sýningar geta veitt vitsmunalega jafnt sem tilfinningalega upp-
lifun5, æskilegast er að hvort tveggja sé til staðar. Síldarminjasafnið
á Siglufirði býður gestum upp á hvort tveggja, þó að áherslan sé oft
og tíðum meiri á hina tilfinningalegu upplifun. Sýningin á annarri
hæð Róaldsbrakka er hefðbundin og sver sig í ætt við margar aðrar
íslenskar sögusýningar þar sem safngripir, myndir og texti mynda
heild. Gestir fá innsýn í sögu síldveiða og geta fræðst um ákveðna
þætti síldarævintýrisins. Í Bátahúsinu er hönnun sýningarinnar allt
öðruvísi og þar er áhersla lögð á leikmyndahönnun svo að sýning-
argripir verða, líkt og leikmyndir, hluti af þeirri stóru heildarmynd
sem þar er verið að skapa. Vistarverur söltunarfólks í Róaldsbrakka
og bræðslan í Gránu, líkt og Bátahúsið, gefa gestum tækifæri til að
upplifa og skynja á fjölbreyttan hátt þetta tímabil sögu okkar. Hér
þarf ekki ítarlegan texta heldur er gestum gefinn kostur á að fræðast
á óhefðbundinn hátt með því að skynja og upplifa fortíðina.
Það eru ýmsar skoðanir uppi um það hvernig miðla skuli upplýs-
ingum á sýningum. Ég tel að styrkur síldarminjasafnsins felist í því
að áherslan á leikmyndina í miðluninni gengur ágætlega upp en á
safninu eru líka sýningar eins og á neðstu hæð og miðhæð Róalds-
brakka þar sem gengið er meira út frá vitsmunalegri upplifun. Að
styrkja þá hluta frekar myndi í heild einnig styrkja upplifunina í Báta-
húsi og í vistarverum Róaldsbrakka. Að geta boðið upp á svo fjöl-
breytta miðlun er mikilvægur styrkur safnsins eins og tekið var fram
í dómnefndaráliti við val á safninu til Íslensku safnaverðlaunanna.
Safnið ber með sér að vera að mörgu leyti iðnaðar- og tæknisafn,
þar sem áhersla er lögð á veiðar og vinnslu, sérstaklega ýtir
bræðsluhúsið undir þá skilgreiningu, en Micheletti-verðlaunin
voru veitt fyrir framúrskarandi safn á sviði iðnaðar- og tæknisögu.
Síldarævintýrið fól ekki síður í sér menningu og félagslíf og verður
vonandi hægt að gefa þessum þáttum meira vægi í framtíðinni þeg-
ar rými eykst. Síldarminjasafnið á Siglufirði gefur trúverðuga
mynd af síldarsögu Íslands og sú fræðsla sem gestum er veitt á sýn-
ingum safnsins er vel framsett. Aðstandendur Síldarminjasafnsins
á Siglufirði geta verið stoltir af áhugaverðu safni. Hér gefst gestum
kostur á að fræðast um valda þætti úr síldarsögu Íslands en einnig
ferðast stundarkorn til baka í fortíðina og skynja brot af síldarævin-
týrinu og verða þess vísari hversu stóru hlutverki lítill fiskur gegndi
á löngu tímabili í sögu þjóðar.
H R E F N A M. K A R L S D Ó T T I R168
5 Sjá sama rit, bls. 36–44.
Saga haust 2004 - NOTA 30.11.2004 11:33 Page 168