Tímarit Máls og menningar - 01.11.2015, Page 2

2 TMM 2015 · 4
Frá ritstjóra
Brynhildur Þórarinsdóttir starfar sem dósent við Háskólann á Akureyri
en hefur einnig skrifað bækur fyrir börn, þar á meðal endursagnir á Njálu,
Eglu og Laxdælu sem hún hlaut Norrænu barnabókaverðlaunin fyrir árið
2007. Ástæða er til að vekja sérstaka athygli á grein hennar hér í heftinu um
lestrarátak menntamálaráðherra og þeirrar stofnunar sem hann hefur kosið
að byggja upp, Menntamálastofnunar, á sama tíma og skólabókasöfn eru
fjársvelt og lítið gert til að efla yndislestur annað en að halda ræður og láta
börnin syngja með Ingó veðurguði að það sé gott að lesa. Lestur greinarinnar
skilur eftir þá tilfinningu með manni að nú standi til að slíta sundur „Gagn
og gaman“ og skilja „gagnið“ eitt eftir en senda „gamanið“ í burtu.
Af öðru efni þessa heftis má nefna enn eitt snilldarviðtal Kristínar Ómars­
dóttur við kollega, að þessu sinni við Auði Övu Ólafsdóttur. Hér er líka ný
saga eftir Gerði Kristnýju; Jón Yngvi Jóhannsson bókmenntafræðingur
skrifar um fótboltabækur Gunnars Helgasonar og Stefán Valdemar Snævarr
setur Megas í póstmódernískt samhengi á afmælisári trúbadorsins. Andrés
Eiríksson sagnfræðingur í Dublin og ljóðaþýðandi gerir bráðskemmtilega
og afar fróðlega grein fyrir ævi og störfum þjóðskálds Íra, Williams Butler
Yeats á hundrað og fimmtíu ára afmæli skáldsins og birtir tvær þýðingar á
ljóðum hans.
Og er þá fátt eitt talið af fjölbreyttu efni TMM.
Guðmundur Andri Thorsson