Bændablaðið - 19.09.2019, Blaðsíða 34

Bændablaðið | Fimmtudagur 19. desember 201934
SKÓGRÆKT &SKIPULAG
Garðabær skipuleggur golfvöll á 15 hektara skóglendi
Skógræktarfélag Garðabæjar
fékk við stofnun þess úthlutaða
53 hektara, svokallað Smalaholt,
til skógræktar frá Ríkisspítölum
árið 1988. Gangi áform um
nýtt skipulag Vífilsstaðalands
í Garðabæ eftir mun um 15
hektarar, eða 1/3 af skóginum í
Smalaholti, víkja fyrir golfvelli.
Kristrún Sigurðardóttir, formaður
Skógræktarfélags Garðabæjar, segir
að lítið samstarf hafi verið haft við
félagið vegna áformanna og að
stjórnin hafi fyrst heyrt um þau í
fjölmiðlum. Kynning á skipulaginu
var þann 11. desember síðastliðinn
og rennur frestur til að gera
athugasemdir við það út 6. janúar
2020.
Fréttum fyrst af
tillögunni í fjölmiðlum
„Aðdragandi málsins er að Garða­
bær keypti Vífilsstaðalandið af
ríkinu 2017 og í framhaldi af því
var haldin samkeppni um skipulag
svæðisins og vinningstillagan notuð
sem útgangspunktur varðandi
framtíðarskipulag svæðisins sem
gildir til 2030.
Við hjá Skógræktarfélaginu
vorum að mestu sátt við vinnings­
tillöguna enda ekki verið að skerða
skógræktarsvæðið í Smala holti
nema að takmörkuðu leyti.
Félagsmenn í Golfklúbbi Garða­
bæjar voru aftur á móti mjög ósáttir
við vinningstillöguna á legu golf­
vallarins, samkvæmt ummælum í
frétt í Morgunblaðinu vorið 2018.
Með þeirri frétt var birt mynd af
nýjum 9 holu golfvelli. Helmingur
af golfbrautunum voru teiknaðar inn
í skóginn í Smalaholti samkvæmt
tillögunni sem fylgdi fréttinni.
Tillagan var kynnt á fjölmennum
fundi hjá golfklúbbnum og fréttum
við fyrst þá af málinu í fjölmiðlum.
Í framhaldinu höfðum við sam­
band við yfirvöld í Garðabæ og
báðum um fund með bæjarstjóra,
þar mættu einnig skipulagsstjóri
Garðabæjar og formaður skipulags­
nefndar. Við spurðum meðal annars
hvort hugmynd golfara sem birtist í
Morgunblaðinu hefði verið unnin í
samvinnu við bæjaryfirvöld, en fátt
var þá um svör.“
Meðferðarheimili
Barnastofu í Smalaholti
„Það næsta sem gerðist var í des­
ember 2018 þegar við fréttum fyrst
af því í fjölmiðlum að búið var að
gefa vilyrði fyrir byggingu með­
ferðarheimilis Barnastofu í skóg­
inum í Smalaholti. Ferlið hafði
staðið í nokkra mánuði og á þeim
tíma var aldrei haft samband við
Skógræktarfélagið eða farið fram á
samráð af nokkru tagi. Gert er ráð
fyrir einum hektara af landi undir
heimilið auk veglagningar að því.
Skógræktarfélagið var jákvætt að
meðferðarheimili risi á Smalaholti,
en óskað var eftir við bæinn að hafa
eitthvað um það að segja hvar það
væri staðsett. Samkvæmt tillögu
skipulagsins var lóð heimilisins
fyrst staðsett í landgræðsluskóg­
inum. Félagið hafði gert samning
við Skógræktarfélag Íslands um
landgræðsluskóg, sem hófst með
landsátaki á Smalaholti þann 10. maí
1990 er frú Vigdís Finnbogadóttir
forseti gróðursetti fyrstu plönturnar
ásamt þingmönnum kjördæmisins,
bæjarfulltrúum og félagsmönnum
Skógræktarfélagsins. Sumarið 1990
gróðursettu íbúar, nemendur skóla
og leikskóla bæjarins á Smalaholti
um 70 þúsund trjáplöntur.
Eftir að við leituðum eftir sam­
starfi varðandi staðsetningu á
meðferðar heimilinu kom í ljós að
það var vilji til þess og komið til
móts við okkar sjónarmið,“ segir
Kristrún.
Golfvöllurinn skal
koma og skógurinn víkja
„Á fundi síðastliðið vor vorum
við beðin um að merkja inn á loft­
mynd af Smalaholti hvaða svæði
Skógræktarfélagið væri tilbúið að
gefa eftir undir golfvöllinn og von­
aðist stjórnin að þarna væri kom­
inn grundvöllur fyrir samstarfi milli
aðila.
Í ágúst síðastliðinn erum við
kölluð til fundar þar sem skipulags­
yfirvöld leggja fram tillögu um golf­
völl í Smalaholti sem var keimlík
tillögu Golfklúbbi Garðabæjar frá
2018. Á sama fundi leggjum við
fram loftmyndina með hugmyndum
félagsins varðandi hvaða svæði við
værum tilbúin að gefa eftir undir
golfvöllinn.
Í nóvember síðastliðinn var annar
kynningarfundur þar sem lögð var
fram svipuð tillaga varðandi golf­
völlinn og á fyrri fundi. Við létum í
ljós mikla óánægju á fundinum með
skipulagstillöguna þar sem ekkert
tillit hafði verið tekið til sjónarmiða
Skógræktarfélagsins.
Í lok fundar lagði Gunnar
Einars son bæjarstjóri til við Snorra
Vilhjálmsson golfvalla hönnuð að
hann þétti golfbrautir þannig að
ekki væri farið inn á félags reiti
sem Lions klúbbur Garðabæjar,
Lionsklúbburinn Eik, Kiwanis­
klúbburinn, Rótarý klúbburinn
Görðum og Kvenfélag Garðabæjar
hafa ræktað skóg í 30 ár og útbúið
áningarstaði þar sem félagsmenn
njóta samveru og útivistar,“ segir
Kristrún.
Golfvöllurinn meira
virði en skógurinn
Að sögn Kristrúnar kom greinilega
fram á fundinum að um lokatillögu
væri að ræða og að ekki yrði tekið
frekara tillit til okkar sjónarmiða.
„Sagt var að falleg tré skyldu fá að
standa. Okkur jafnvel boðið að flytja
tré, eins gáfulega og það hljómar úr
hávöxnum skógi.
Þrátt fyrir að bæjaryfirvöld í
Garðabæ telji sig hafa haft samráð
við Skógræktarfélagið hefur það
samráð einungis verið á einn veg.
Golfvöllur er greinilega meira virði
en útivistarskógurinn í Smala­
holti, segir Kristrún Sigurðardóttir,
formaður Skógræktarfélags Garða­
bæjar. /VH
Kristrún Sigurðardóttir, formað-
ur Skógræktarfélags Garðabæjar,
segir að þrátt fyrir að bæjaryfirvöld
í Garðabæ telji sig hafa haft sam-
ráð við Skógræktarfélagið hafi það
samráð einungis verið á einn veg.
Golfvöllur er greinilega meira virði
en útivistarskógurinn í Smalaholti.
Núverandi golfvöllur Golfklúbbs Garðabæjar að hluta og hluti skógarins í Smalaholti. Guli ramminn afmarkar það
svæði sem lagt er til að tekið verði undir golfvöll samkvæmt nýja skipulaginu. Fjólubláar línur eru stígar og slóð-
ar um skóginn. Stígarnir eru um einn og hálfur kílómetri innan gula rammans. Skógurinn nær að landamerkjum
Kópavogs, það er að segja íbúðarhúsunum sem sjást á kortinu.
Smalaholt. Sjö ára nemendur Hofsstaðaskóla gróðursetja tré í landi Skóg-
ræktarfélags Garðabæjar árið 1989. Í dag er þar gróinn skógur sem til stendur
að fella fyrir golfvöll.
Frú Vigdís Finnbogadóttir, fyrrverandi forseti, gróðursetur fyrsta tréð í
Smalaholti 10. maí 1990.
Hluti af því greni sem verður fellt ef
stækkun golfvallarins verður.
40% af bæjarlandinu er friðlýst eða undir skógrækt
Þegar gerður var samningur við
Skógræktarfélag Garðabæjar
á sínum tíma var tekið fram að
skógræktin ætti ekki að binda
nýtingu landsins til framtíðar.
Hugmyndin er að það fari þrjár
brautir inn á skógræktarlandið
og því verður mikill hluti skógar-
ins enn til staðar.
Arinbjörn Vilhjálmsson,
skipulagsstjóri Garðabæjar, segir að
búið sé að halda nokkra fundi með
bæði Skógræktarfélagi Garðabæjar
og Golfklúbbi Garðabæjar vegna
málsins og gera nokkrar breytingar
á tillögunni um völlinn.
„Breytingarnar sem gerða hafa
verið eru allar í þá átt að minnka
áhrif vallarins á skógræktina. Við
erum enn að vinna í málinu sem
aðalskipulagsbreytingu og því enn
verið að horfa á stóru línurnar og
ekki enn farið að teikna upp fínni
myndina. Tillagan sem lögð hefur
verið fram er til þess gerð að þeir
sem hafa hagsmuna á gæta vegna
breytinganna geti komið með
athugasemdir.“
Golfvöllur undir íþróttasvæði og
skógræktarsvæði undir golfvöll
Arinbjörn segir að tillagan að því að
gera nýjan golfvöll í skógræktina
komi frá bæjarstjórninni. „Í aðal­
skipulagi Garðabæjar, sem var stað­
fest fyrir tveimur árum, er gert ráð
fyrir breytingum í Vetrarmýrinni
þar sem gamli golfvöllurinn er og
hluti hans tekinn undir framtíðar
íþróttasvæði Garðabæjar.“
Skógræktarsvæði sem reikn­
að er með að fari undir níu holu
golfvöll eru 15 hektarar og segir
Arinbjörn að það þyki ekki mikið.
Gamli golfvöllurinn í Garðabæ var
18 holur á 40 hekturum. Þannig að
nýi völlurinn þykir frekar þröngur.
Hugmyndin er að það fari þrjár
brautir inn á skógræktarlandið og
því verður mikill hluti skógarins
enn til staðar.“
Að sögn Arinbjarnar er ekki
enn búið að áætla hversu mikið
af skóginum þurfi að fella vegna
golfbrautanna enda sé ekki byrjað
að vinna að deiliskipulaginu.
Gróðursetja milli brauta
Arinbjörn segir að einn annar
möguleikinn fyrir golfvöll á
þessu svæði væri með því að
fara út í friðland Garðabæjar í
Vífilsstaðahrauninu og ef það hefði
verið gert er mun lengra á milli þess
hluta gamla vallarins sem stendur
áfram og nýja vallarins.
Arinbjörn er spurður hvort gerð
golfvallarins á skógræktarsvæðinu
sé ekki í andstöðu við þá hug­
mynd að nú eigi að efla skógrækt
í landinu, meðal annars til að auka
kolefnisbindingu. „Við höfum bent
á þetta sjálfir og það gæti allt eins
orðið ákvæði í deiliskipulaginu um
að gróðursetja tré milli brauta og
auka þannig fjölda trjáa á svæðinu.“
Skógræktarsvæðið sem eftir
verður breytt í útivistarsvæði
„Það er alveg ljóst að þegar
gerður var samningur við
Arinbjörn Vilhjálmsson, skipulags-
stjóri Garðabæjar.