Strandapósturinn - 01.06.2021, Síða 98

97
veikinnar og svo aftur 1952 skulda þeir kr. 2.382,15 krónur en það ár
urðu fjárskipti vegna veikinnar bæði í Bitru og Kollafirði. Næst sést skuld
viðskiptamanna í efnahagsreikningi félagsins 1957 og flest ár eftir það
fram til 2004 að kaupfélagið hættir rekstri. Þá stendur skuld viðskipta-
manna í 21.723 krónum og innistæða viðskiptamanna í innlánsreikningi
kaupfélagsins var 0 krónur.Framan af, allt fram yfir 1970, voru skuldir
viðskiptmanna óverulegar skammtímaskuldir, meðan beðið var eftir lána-
fyrirgreiðslu vegna framkvæmda. En eftir 1970 hefst mikið framkvæmda-
tímabil á félagssvæðinu. Menn byggðu hús og keyptu vélar og tæki í ríkara
mæli en áður og kaupfélagið annaðist innkaup á byggingarefni og vélum
og gjaldfærði kostnaðinn á viðskiptareikning viðkomandi með þeim afleið-
ingum að skuldir mynduðust. Kaupfélagsstjórar og stjórn félagsins voru þó
alltaf á varðbergi gagnvart skuldasöfnun viðskiptamanna eins og sést best í
fundargerðabók félagsins af stjórnarfundi þann 6. janúar 1970:
2. Einnig var ákveðið að full aðgát skyldi höfð með peninga og
ávísanaúttekt hjá þeim er ekki eiga innistæðu fyrir því í kaupfélaginu.
Og á stjórnarfundi 9. maí sama ár stendur:
… Rætt var um hvort þeir bændur er ekki gerðu að fullu upp í félaginu
um sl. áramót, skyldu fá afhentan áburð nú í vor, án þess að setja
einhverja tryggingu.
Samþykkt var, að til þess að fá afhentan áburðinn, skyldu þeir
undirrita yfirlýsingu um að allar afurðir af búinu, eða andvirði þeirra,
skyldu renna til félagsins, þar með talin hlunnindaafrakstur, svo sem
selskinn, dúnn, rekaviður, grásleppuhrogn og öll önnur hlunnindi
er til kunna að falla og ætluð eru til sölu. Einnig var samþykkt að
reynt skyldi að semja við þá er skulda um greiðslu á þeim skuldum er
voru við síðustu áramót, eða þeim gefinn kostur á að setja einhverja
veðtryggingu á greiðslu skuldanna.
Af þessu sést að stjórn og framkvæmdastjóri kaupfélagsins gættu þess vel
að viðskiptamenn söfnuðu ekki óhóflegum skuldum og gengu hart eftir því
að settar væru tryggingar og/eða samið um greiðslur. Enda kom á daginn
að þegar kaupfélagið hætti rekstri 2004 voru nær allar skuldir uppgerðar
og allar innistæður viðskiptamanna greiddar út. Það er fátt sem vitnar
betur um ábyrga stjórn og rekstur félagsins frá upphafi til enda.