Strandapósturinn - 01.06.2021, Side 172

171
Að lokum
Eins og áður er getið hætti ég störfum við Barnaskólann á Borðeyri vorið
1980 eftir 23 ára starf sem skólastjóri og kennari. Það var alltaf mikið
að gera þau árin sem ég kenndi á Borðeyri. Börnin voru mörg og fyrstu
árin var starfandi heimavist í skólanum fyrir börnin úr sveitinni. Svo tók
skólaaksturinn við og þá fóru börnin heim að kvöldi og komu síðan aftur
í skólann að morgni og þannig er það enn í dag. Það var mikil og góð
breyting þegar skólaaksturinn hófst, bæði fyrir börnin og heimili þeirra,
sem og líka fyrir starfsfólk skólans.
Vegna mikilla anna í skólanum varð svo ýmislegt útundan hjá mér sem
ég hefði kosið að hafa í betra lagi svo sem skýrslugerðir og fundarhöld.
Ég var lengi eini fasti kennarinn við skólann og kaus ég að nota tímann
til annarra hluta, sem mér fundust nauðsynlegri, svo sem til hjálpar þeim
nemendum sem seinfærir voru í lestri eða stærðfræði. Skýrslur, svo sem
nemendaskrár, skrifaði ég við skólalok hvert vor og eru þær geymdar í
skólanum, sem og líka nemendaskrár margra liðinna ára.
Nú er ég að verða áttræður og minnið er farið að svíkja mig. Því hefði
verið gott ef ég hefði getað leitað í fundargerðir og aðrar ritaðar heimildir,
en því miður er því ekki til að dreifa af ofangreindum ástæðum. Ég álít þó
að flest sem ég hef skráð hér á undan sé rétt, en eflaust ekki allt.
Þorbjörn Bjarnason lést nokkru eftir að hann skrifaði þessa grein eða 3. október 2016.
Gömul skólahúsgögn úr Barnaskólanum á Borðeyri.