Morgunblaðið - 01.05.2001, Blaðsíða 6
FORSETI danska þingsins, Ivar
Hansen, og eiginkona hans, Karen
Marie Hansen, komu í opinbera
heimsókn til Íslands sl. sunnudag
ásamt fylgdarliði, í boði Halldórs
Blöndals, forseta Alþingis.
Danski þingforsetinn átti fund
með forseta Alþingis í gær í Al-
þingishúsinu og fór vel á með þing-
forsetunum sem aðallega ræddu
Evrópumálin og tengsl Íslands og
Danmerkur í gegnum tíðina.
Halldór Blöndal kvað samstarf-
þjóðanna afar ánægjulegt og benti
sérstaklega á samskipti Íslendinga
og Dana í Norðurlandaráði.
„Síðustu ár hafa utanríkismál
orðið fyrirferðarmikil í norrænu
samstarfi. Samstarf þessara
tveggja þjóða á sér aldagamla sögu
og styðst við gamlar hefðir og vin-
áttu þjóðanna. Þegar maður kemur
til Kaupmannahafnar finnst manni
að maður eigi svolítið í borginni
því hvarvetna kemur maður á staði
þar sem bestu synir Íslands fengu
menntun sína og dvöldu um lengri
eða skemmri tíma. Norðurlanda-
samstarfið tekur í dag einnig yfir
mörg svið, menntunar og vísinda,
svo dæmi séu tekin og þegar til
lengri tíma er litið hefur Norð-
urlandasamstarfið skipt mestu í
menningargeiranum og heldur
áfram að hafa mikla þýðingu fyrir
þjóðirnar,“ sagði Halldór. Hann
benti auk þess á að tengsl Dana við
Evrópusambandið hefðu einnig
spilað stórt hlutverk.
„Reynsla mín sem ráðherra var
sú að það var gott að eiga Dani að
þegar á reyndi og ég tel að við get-
um ennþá mikið af þeim lært og
þeir af okkur. Á meðan Danir voru
einir Norðurlandaþjóða í Evrópu-
sambandinu nutum við þess í sam-
bandi við ýmislegt sem við þurftum
að koma á framfæri við Evrópu-
sambandið og svo er enn þótt fleiri
Norðurlandaþjóðir hafi komið
þangað inn.“
Hansen tók undir orð starfs-
bróður síns og sagði samstarf þjóð-
anna hafa ríka sögulega merkingu.
„Íslendingar hafa til þessa
ákveðið að standa utan Evrópu-
sambandsins en Danmörk innan
þess. Þess vegna viljum við tryggja
að Ísland hafi örugga stöðu innan
sambandsins í samstarfi okkar við
Evrópusambandið. Það skal einnig
tekið fram að við virðum ákvörðun
og rétt þjóðarinnar til að standa
utan við þetta samstarf,“ sagði
Hansen. Hann sagði samstarf nor-
rænu þingforsetanna einnig alltaf
hafa verið til fyrirmyndar enda
hefði rík hefð skapast fyrir því
samstarfi sem ræktað væri með op-
inberum heimsóknum sem þessari.
Frá Alþingi hélt Hansen ásamt
fylgdarliði í forsætisráðuneytið til
fundar við Davíð Oddsson forsætis-
ráðherra. Því næst hitti Hansen
formenn þingflokkanna, Sigríði A.
Þórðardóttur, þingflokksformann
Sjálfstæðisflokksins, Bryndísi
Hlöðversdóttir, þingflokksformann
Samfylkingarinnar, Hjálmar Árna-
son, varaformann þingflokks
Framsóknarflokksins, og Ögmund
Jónasson, þingflokksformann
Vinstri hreyfingarinnar græns
framboðs.
Þaðan var haldið til Bessastaða á
fund með Ólafi Ragnari Grímssyni,
forseta Íslands. Norræna eld-
fjallastöðin var því næst heimsótt
þar sem Freysteinn Sigmundsson,
forstöðumaður, tók á móti gest-
unum. Síðdegis fór Hansen á fund
utanríkisráðherra, Halldórs Ás-
grímssonar. Að loknum fundi
þeirra var haldið aftur í Alþing-
ishúsið þar sem þingforsetinn
fylgdist með þingfundi af þingpöll-
um og ávarpaði svo þingmenn úr
forsetastóli. Öðrum degi heimsókn-
arinnar lauk loks á kvöldverði í
boði forseta Alþingis í Ráð-
herrabústaðnum.
Heimsókn þingforsetans lýkur í
dag og mun þingforsetinn fara
ásamt fylgdarliði í útsýnisferð um
Reykjavík áður en haldið verður í
Hitaveitu Suðurnesja í Svartsengi
þar sem Albert Albertsson, aðstoð-
arforstjóri, tekur á móti gestunum.
Vel fór á með starfsbræðrunum Halldóri Blöndal og Ivar Hansen í Alþingishúsinu í gærmorgun. Þingforsetinn danski heimsótti forseta Íslands, Ólaf Ragnar Grímsson, að Bessastöðum síðdegis.
Morgunblaðið/Þorkell
Forseti danska þingsins
í opinberri heimsókn
FRÉTTIR
6 ÞRIÐJUDAGUR 1. MAÍ 2001 MORGUNBLAÐIÐ
AÐ mati Tómasar Zoëga, geðlæknis,
sem rannsakað hefur Atla Guðjón
Helgason, sem ákærður er fyrir
morðið á Einari Erni Birgissyni 8.
nóvember sl., var morðið framið fyr-
ir hreina slysni. Þetta kom fram við
fyrirtöku málsins í gær í Héraðs-
dómi Reykjavíkur, þar sem Tómas
gaf skýrslu fyrir dómi. Hann bar að
ákærði hefði alla tíð sneytt hjá átök-
um og að hann væri hvorki ofbeldis-
fullur né hættulegur.
Morðið á Einari heitnum hefði
ekki verið undirbúið, heldur virtist
það hafa verið framið í kjölfar
stympinga. Ákærða og Einari hafi
orðið sundurorða, Einar orðið reiður
og ákærði hörfað undan honum hálf-
an hring í kringum bifreið Einars,
uns hann greip hamar úr aftursæti
bifreiðarinnar og sló Einar. Í fram-
haldi af því hafi ákærði tekið órök-
réttar ákvarðanir. Fram kom að
neysla amfetamíns hafði aukist mjög
síðustu mánuðina fyrir verknaðinn
og hafi fíkniefnaneysla átt sinn þátt í
því að hann missti stjórn á sér með
áðurgreindum afleiðingum.
Aðalmeðferð málsins hefst 3. maí.
Tómasar Zoëga átti að bera vitni við
aðalmeðferðina en vegna fyrirséðrar
fjarveru var vitnisburði hans flýtt.
Morðið á Einari Erni
Birgissyni hreint slys
að mati geðlæknis
MENNIRNIR tveir sem í gær-
kvöldi voru úrskurðaðir gæsluvarð-
hald til 7. maí nk. eru taldir við-
riðnir skotárás við íþróttasvæði
Íþróttafélags Reykjavíkur við
Skógarsel í Breiðholti um klukkan
21.30 á sunnudagskvöld.
Að sögn lögreglu var um mann-
drápstilraun að ræða, enda skotið á
bifreiðir með mönnum innanborðs.
Einn var fluttur á sjúkrahús, þó
ekki með skotáverka. Áverkarnir
bentu til að hann hefði sætt bar-
smíðum en lögreglan telur ekki
ólíklegt að ekið hafi verið á hann.
Alls voru fimm menn á aldrinum
20 til 30 ára handteknir í tengslum
við málið. Lögreglan hefur lagt
hald á skotvopn, sem notað var, en
upplýsir ekki hverskonar vopn er
um að ræða, þ.e. haglabyssu,
skammbyssu eða því um líkt. Ekki
fæst heldur uppgefið hversu mörg-
um skotum var hleypt af. Skotið
var á tvær bifreiðir og þær
skemmdar.
Málið er einstakt að
mati lögreglunnar
Lögreglan upplýsir ekki að svo
stöddu um ástæður árásarinnar og
hefur ekki staðfest sögusagnir um
að mál þetta tengist uppgjöri í
fíkniefnaheiminum. Þó hefur feng-
ist upplýst að sumir mannanna
fimm hafi komið við sögu lögregl-
unnar áður vegna fíkniefna- og
þjófnaðarmála. Yfirheyrslur yfir
mönnunum stóðu yfir í gær og mið-
aði vel að sögn lögreglu.
Að sögn Harðar Jóhannessonar,
yfirlögregluþjóns í Reykjavík, telst
mál af þessu tagi einstakt. Lög-
reglan hafi á undanförnum árum
orðið vör við vopn í tengslum við
fíkniefnamál. „Vopnum og tilvist
þeirra fylgir auðvitað ákveðin ógn-
un; menn geta notað þau. Það er
kannski komið að því, ég veit það
ekki. Það er í sjálfu sér einstakt að
þetta skuli gerast,“ sagði Hörður.
Málið er áfram í rannsókn lög-
reglu sem verst frekari fregna af
því enn sem komið er.
Morgunblaðið/Ásdís
Viðbúnaður lögreglu á vettvangi var mikill í fyrrakvöld. Hér er lögreglan á vettvangi árásarinnar við Skóg-
arsel. Stórsá á bifreiðinni eftir skotárásina. A.m.k. þremur skotum var skotið á hana.
Fimm menn handteknir vegna skotárásar
við Skógarsel í Breiðholti á sunnudag
Málið rannsakað sem
tilraun til manndráps