Skinfaxi - 01.11.1938, Síða 25

SKINFAXI
105
Ber ég kveðju bænum gamla,
strýtukambi og steinahjalla,
kambahlíð og kambabrúnum,
Goðaborg og Goðsteinsmýri.
Heilsa ég þér, Hafnartangi,
sæbrattur með sölvafjöru,
Eyfreyjarnes með ótal skúta,
þangbása og þaraflúðir.
Ber ég þér kveðju, Búlandstindur,
fjallajöfur furðulegi,
hamragoði hvass á brúnir,
heiðurssmíð hagleiksjötna.
Heilsa ég þér, Hálsfjall góða,
djásnum prýtt og dýrum steinum,
hjöllum, stöllum, rákum, rindum,
rauðum skriðum, fossum, tindum.
Ber ég þér kveðju, Berufjörður,
vogumskornu vinastrendur.
Blómgist bú, blessist arinn,
flytjist föng í fagra voga.
Heilsa ég dýrum Djúpavogi,
hafnavali, vogasóma,
sem að klettafaðminn fagra
breiðir móti báti hverjum.
Heill þér, Papey, hafs í auga,
hamraborgin hafna-prúða,
gestrisni og glæsimennsku
heimkynni, og höfðingslundar.
Vaki fólk og vaki dísir
yfir fögru Austurlandi,
þar sem áður átti ég Ieiðir;
spretti blóm í spori hverju.