Eimreiðin - 01.09.1968, Blaðsíða 76

222
EIMREIÐIN
myndir fremur að smásögum eða skáldsögum, þegar verkin koma
endanlega frá höfundinum, þar sem það er auðfarnari og hér á landi
hefðbundnari leið í okkar bókmenntum.
Notkun þeirrar heimildar, sem í þessu frumvarpi er farið fram
á til handa þjóðleiklnisstjóra, mun að sjálfsögðu bera að með þeim
hætti, að menn með drög að leikritum eða hugmyndir að leikhús-
verkum mundu leita til þjóðleikhússtjóra eða hann til þeirra, og það
væri þá algerlega á valdi þjóðleikhússtjórans sjálfs að ákveða það og
meta, hvort umrædd drög að verkurn gætu hæft sviði Þjóðleikhúss-
ins, og hvort hann hefði trú á að höfundurinn mundi ljúka verk-
inu á því ári, sem hann væri á launum hjá Þjóðleikhúsinu. . .
Það er rétt, að góð list verður trauðla sköpuð eftir pöntun fyrir
peninga í boði. Hér er ekki um það að ræða, heldur að heimilt
verði að ráða rithöfund í eitt ár, ef þær aðstæður eru fyrir hendi,
að telja má fullvíst að það mundi ríða baggamuninn varðandi það,
að íslenzkt leikhúsverk kæmist á svið með aðstoð — eða fyrir fram-
lag Þjóðleikhússins. . .“
Að lokum benti flutningsmaður á það, að Þjóðleikhúsið reki
myndarlegan leiklistai'skóla og listdansskóla, og til þessara stofnana,
sem að sjálfsögðu eru nauðsynlegar í starfsemi Þjóðleikhússins, sé
varið miklu fé, en aftur á móti sé vanræktur sá grundvöllur, sem
þarf að vera undirstaða hvers þjóðleikhúss, það er þjóðlegar leik-
bókmenntir.
Hugsun sú, sem fram kemur í þessu seinna frumvarpi Tómasar
Karlssonar, er á vissan hátt skyld hugmyndinni um starfsstyrki, sem
fyrirheit var gefið um að stofnað skyldi til, þegar lögin um lista-
mannalaun voru sett fyrir tveimur árum. Efndir á því loforði hafa
að vísu látið of lengi á sér standa, en ætlunin mun þó vera sú, að
vísir að starfsstyrkjakerfi komi til framkvæmda á árinu 1969. Nefnd
sú, sem menntamálaráðherra skipaði til þess að gera tillögur um
starfsstyrkjakerfið, mun nú hafa skilað áliti, en hugmyndin með
starfsstyrkjunum er meðal annars sú, að örva listamenn til starfa
og gefa þeim tækifæri til þess að ljúka ákveðnum verkefnum, bæði
með beinum fjárstuðningi og annarri vinnuaðstöðu. Mun til þess
ætlazt, að starfsstyrkjunum verði úthlutað af menntamálaráðuneyt-
inu í samráði við Bandalag íslenzkra listamanna, en reglugerð hefur
ekki enn verið sett um þetta efni.
I. K.