Búnaðarrit - 01.01.1989, Page 58

Stofnverndarsjóður styrkti kaup á þremur stóðhestum, þeim Mána 949,
Kára frá Grund og Stjarna frá Melum, eins og sjá má í fundargerð
Stofnverndarsjóðs. Sem betur fer er staða sjóðsins mun betri en ég skrifaði í
fyrra vegna ónógra upplýsinga, sem ég hafði þá.
Ég kom á nokkra fundi hjá hrossaræktarsamböndum s.l. vor og var til
svara um ýmis atriði, sem óskað var eftir, og sagði frá ýmsu úr starfinu.
Hrossarœktarsamband íslands hélt ársfund 30. apríl í Húnavallaskóla á
vegum Hrs. A.-Húnavatnssýslu. Var vel sótt að vanda og Iétt í mönnum,
enda veðrið fallegt. Heimsóttir voru tamningamenn á Mosfelli og Blöndu-
ósi, en ég mun hafa verið að renna í hlað á Laugarvatni er veislunni lauk á
Blönduósi undir miðnættið.
Á Kirkjubce voru hross mæld 19. nóvember með aðstoð Jóns Steingríms-
sonar og Bjarna Þorkelssonar. Folöld eru undan Goða frá Sauðárkróki og
Dagfara frá Kirkjubæ.
Á Hólum íHjaltadal voru tamningatrippi metin 29. apríl af okkur Víkingi
Gunnarssyni og Jóni Friðrikssyni. Tamningarmenn þar í vetur voru þeir
Þórir M. Lárusson og Ágúst Jónsson. Fundir í stjórn kynbótabús voru
haldnir 29. apríl og 22. okt.
Skuggafélagið. Þar voru mæld hross á Skörðugili 21. okt. og í Borgarfirði
10. nóvember. Nokkrir úr félaginu komu saman það kvöld í Nýjabæ og
ræddu horfurnar og var helst hallast að því að reyna að efla félagið, fara með
bestu hryssur undir vissa stóðhesta næsta vor og sjá hvort hægt væri að fá
efnilegan ungfola út úr því, til að halda starfinu áfram um sinn með sömu
stefnu.
Fjalla-Blesi. 8. apríl kom ég til næstum allra félaga, skoðaði trippin og
tamningahross þeirra, en þau voru flest í Ytri-Skógum. Verið er að þjálfa
betur tvo stóðhesta félagsmanna, sem verða þó vart til frambúðar og fátt er
um nógu fína drætti í hrossum þar. Ég bauðst til að útvega í húsnotkun
stóðhestinn Gassa 1036 frá Vorsabæ og var það þegið. Hesturinn kom
austur í maí, en dvaldi þar því miður mjög stutt svo lítið kemur út úr því.
Sigurður í Ytri-Skógum er formaður Fjalla-Blesa, áhugasamur og duglegur.
Kleifahrossin skoðaði ég aidrei sérstaklega og ekki kom fram kynbóta-
hross þaðan í forskoðun vegna fjórðungsmóts .
Fjórðungsmótinu á Kaldármelum eru gerð ýtarleg skil í Árbók hrossa-
ræktar 1988, svo og um starfsemi Stóðhestastöðvar, en í Gunnarsholti var í
haust byggt haughús, vegir og sýningahringvöllur með bílastæðum fyrir
stóðhestastöð.
Ársþing Landssambands hestamanna sat ég á Hótel Sögu í Reykjavík.
Þar hætti störfum vegna annríkis Leifur Kr. Jóhannesson, formaður,
reyndur og athugull félagsmálafrömuður, sem hefði átt að njóta sín í þessu
starfi lengi enn. Við tók Kári Arnórsson, skólastjóri, Fossvogi, sem ég óska
góðs gengis í vandasömu sameiningarstarfi.
56