Frjáls verslun - 01.05.2010, Blaðsíða 67
F R J Á L S V E R S L U N • 5 . T B L . 2 0 1 0 67
S T J Ó R N U N
Ingrid Kuhlman, framkvæmdastjóri Þekkingarmiðlunar.
Konur læra frá blautu barnsbeini að samskipti við fólk og það að
tilheyra hópnum sé mikilvægara en að skara fram úr eða standa á
rétti sínum. Konur leggja meiri áherslu á samvinnu og liðsheild en
karlar. Þær einblína á samskipta og þátttökustjórnun og dreifða
ákvarðanatöku. Konur vænta þess frekar af konum en körlum að
þær veiti þeim stuðning og hvatningu. Þær vilja vinna á vinnustað
sem einkennist af skilningi, persónulegum tengslum og heiðarlegum
samskiptum.
Konur taka gagnrýni öðruvísi en karlar. Þær eiga það til að taka
ágreining persónulega og upplifa yfirgang frá öðrum konum sem svik.
Oft er gripið til gamla orðatiltækisins Konur eru konum verstar
þegar konur deila. Konur gera oft miklar og óraunhæfar vænt ingar
til annarra kvenna og dæma kynsystur sínar harðar en samstarfs
menn af hinu kyninu. Rannsóknir á atvinnuviðtölum hafa t.d. leitt
í ljós að ef ráðningarviðtal er framkvæmt af karli og konu á konan
það til að meta kvenumsækjendur lægra en karlinn á meðan þau
meta karlumsækjendur á sambærilegan hátt. Konur eiga líka oft
erfitt með að sætta sig við aðrar konur í forystuhlutverkum og eru
miklu harðari við þær en karlarnir.
10 ATRIÐI SEM STANDA Í VEGI FYRIR STARFSFRAMA KVENNA
Í könnun Catalyst, sem er rannsóknar- og ráðgjafarfyrirtæki sem sérhæfir sig í málefnum kvenna, var spurt hvernig konur gætu
aukið árangur sinn. 61% svarenda sagði að konur þyrftu að þróa með sér kröftugri samskiptastíl. Höfundar könnunarinnar nefna
tíu atriði sem geta komið í veg fyrir að konur veljist til forystu:
1. Að kinka kolli of mikið. Með því að
kinka kolli erum við að segja: „Ég heyri hvað
þú ert að segja. Ég skil þig.“ Hægt er að
mistúlka þetta sem samþykki við hugmyndir.
Það að kinka kolli í sífellu má upplifa sem
veikleika og getur leitt til misskilnings.
2. Að setja spurnartón í röddina í lok
setningar hljómar hikandi eins og verið
sé að spyrja spurningar. Þetta getur dregið
úr trú verðug leikanum og eykur hættu á
að verða ekki tekin alvarlega. Mikil vægt
er að tónhæð lækki í lok setningar þar
sem hækkun tón hæðar þýðir óvissu eða
spurningu á meðan lækkun tónhæðar er
frekar merki um yfirlýsingu.
3. Veik málnotkun. Að setja fram
yfirlýsingu og biðja síðan um staðfestingu,
eins og t.d.: „Þetta er fín hugmynd, finnst
þér ekki?“ „Er þetta ekki frábær vara?“ –
getur dregið úr áhrifum. Vafaorð eins og
„sumir“, „bara“, „vonandi“ og „ég held“ eru
dæmi um veika málnotkun. Mikilvægt er að
tjá sig með öryggi í orðavali og draga ekki
úr afrekum sínum.
4. Að leyfa öðrum að grípa fram í.
Rannsóknir hafa sýnt að karlar grípa oftar
fram í og konur láta oftar taka af sér
orðið. Þær beygja sig oft undir orð karla
og tala líka yfirleitt skemur á opinberum
samkomum.
5. Að tjá sig ekki að fyrra bragði. Sumar
konur bíða þangað til þær fá orðið í stað
þess að vekja athygli á sér og biðja um
orðið. Mikilvægt er að láta skoðun sína
skýrt í ljós og taka virkan þátt í umræðum.
Þetta þarf ekki að vera meira en að
undirstrika það sem einhver annar sagði
eða bæta einhverju nýju við.
6. Að tala of lágt. Konur halda sig oft
meira til baka og trana sér ekki fram
með orðavali og tónhæð. Að tala lágt er
hins vegar merki um óöryggi eða skort
á sjálfstrausti. Ef áheyrendur þurfa að
leggja við hlustir missa þeir áhugann. Það
dregur úr sannfæringarkrafti og athygli ef
hugmyndir eru settar fram með óstyrkum
rómi.
7. Að leyfa öðrum að eigna sér
hugmyndir. Algeng kvörtun kvenna er að
karlmenn eigni sér hugmyndir þeirra. Þegar
þetta gerist er mikilvægt að láta í sér heyra
með því að segja t.d.: „Fyrirgefðu, ég nefndi
þetta fyrir mínútu.“
8. Veik líkamstjáning. Líkamsmál er
tungumál án orða en getur þó sagt meira en
nokkurt annað tungumál. Líkamshreyfingar
eins og að yppa öxlunum, halda ekki
augnsambandi, krossleggja fætur, vera á
sífelldu iði og veikt handaband eru merki
um óöryggi. Það sama á við þegar konur
hlæja óstyrkum hlátri til að taka broddinn
úr því sem þær segja, halla undir flatt eða
brosa. Mikilvægt er að sýna tjáningu sem
endurspeglar öryggi.
9. Að forðast ræðuhöld. Að koma fram
fyrir framan hóp af fólki er tækifæri til að
vera sýnileg og fá athygli. Því er mikilvægt
fyrir konur að yfirstíga óttann og láta
ljós sitt skína með því að taka til máls á
fundum og hafna t.d. ekki boðum um viðtöl.
10. Óviðeigandi klæðnaður. Of háir hælar,
fleginn bolur, stutt pils og of áberandi
andlitsfarði getur haft neikvæð áhrif á
starfsframa kvenna og dregið úr virðingu
og trúverðugleika. Klæðnaðurinn þarf að
endurspegla hlutverkið.
Konur og karlar hafa mismunandi reynslu-
heim. Þau tala ekki um sömu hluti, leika sér
ekki á sama hátt, lesa ekki sömu bækur og
hafa mismunandi sýn á hlutina. Það er hins
vegar styrkur frekar en veik leiki. Mikilvægt
er að ná að nýta sér hæfileika kynjanna til
fulls og laða fram það besta hjá báðum.