Frjáls verslun - 01.05.2010, Page 129

F R J Á L S V E R S L U N • 5 . T B L . 2 0 1 0 129
BRYNDÍS JÓNSDÓTTIR
framkvæmdastjóri SAMFOK
Nafn: Bryndís Jónsdóttir
Fæðingarstaður: Reykjavík, 14.
desember 1965
Foreldrar: Friðgerður
Benediktsdóttir hjúkrunarritari og
Jón Ísaksson markaðsstjóri
Maki: Egill Viðarsson verkfræðingur
Börn: María Gyða, Hrefna Guðrún
og Viðar Darri
Menntun: B.Ed. frá Kennaraháskóla
Íslands 1991, vinnur að MS-ritgerð í
mannauðsstjórnun
Bryndís Jónsdóttir:
„Hestaveikin hefur
haft áhrif á fyrirætlanir
fjölskyldunnar þetta
sumarið þar sem
Landsmót hestamanna
var blásið af og
hestaferðir ekki inni í
myndinni að svo stöddu.“
„SAMFOK eru samtök foreldra grunnskóla-
barna í Reykjavík. Meginhlutverk samtak-
anna er að standa vörð um réttindi barna
til menntunar og þroska, beita sér fyrir
auknum áhrifum foreldra á skólastarf
og vera sameiginlegur málsvari foreldra
gagn vart stjórnvöldum. SAMFOK á gott
samstarf við foreldrafélög grunnskólanna
og hefur útbúið upplýsingaefni sem nýtist
þeim, meðal annars um foreldrastarf í
skólum, skólaráð og foreldrarölt. Á hverju
hausti höldum við námskeið fyrir stjórnir for-
eldrafélaga, bekkjarfulltrúa og fulltrúa foreldra
í skólaráðum. Þess utan hefur SAM FOK tekið
þátt í og skipulagt ýmis sam starfsverkefni,
málþing, ráðstefnur og fræðslu fundi.
Starf framkvæmdastjóra SAMFOK er
afar áhugavert og fjölbreytt. Ég er eini
starfs maðurinn á skrifstofunni og sinni því
mörgum ólíkum verkefnum, í nánu samstarfi
við stjórn samtakanna. Ég sit í nokkrum
starfs hópum á vegum borgarinnar sem full-
trúi foreldra og er einnig áheyrnarfulltrúi for-
eldra í Menntaráði Reykjavíkur. Þá sinni ég
ráðgjöf til foreldra og býð fram stuðning við
að leysa úr erfiðum málum.“ 
Bryndís er gift Agli Viðarssyni og saman
eiga þau soninn Viðar Darra sem er á fjórða
ári. Úr fyrra hjónabandi á Bryndís Maríu
Gyðu, 17 ára, og Hrefnu Guðrúnu, 14 ára.
„Við búum í Kópavoginum, uppi á Vatnsenda,
þar sem fjölmörg tækifæri gefast til útivistar.
Dýralífið á Vatnsendanum er fjölskrúðugt,
út um stofugluggann hef ég séð hross,
hunda, ketti og kanínur hlaupa hjá og í eitt
skiptið skokkaði refur hinn rólegasti eftir
göngustígnum neðan við húsið.
Ég ólst upp í Seljahverfinu og á tvö yngri
systkini. Að loknu grunnskólanámi fór ég
í MR og útskrifaðist þaðan árið 1985 úr
fornmáladeild. Eftir stúdentspróf fór ég
á námskeið í útvarpsþáttagerð hjá BBC í
London og starfaði síðan um tíma við dag-
skrárgerð á Rás 2 og Ríkissjónvarpinu auk
þess að skrifa um stutt skeið í tímaritin
Mannlíf og Frjálsa verslun. Ég lauk prófi frá
KHÍ 1991 með smíðar sem aðalvalgrein.
Starfaði sem kennari í sex ár en hóf síðan
störf hjá Námsgagnastofnun og síðar BHM
áður en ég söðlaði um og hóf meistaranám
í mannauðsstjórnun við HÍ árið 2007.
Áhugamál númer eitt er hestamennska og
deilir öll fjölskyldan þeim áhuga. Dæturnar
hafa verið duglegar að keppa í hestaíþróttum
en sá stutti er einkum í mokstrinum ennþá
og stendur sig vel. Hesta mennskan og annað
áhugamál, söngur, tengjast í Brokkkórnum
sem saman stendur af hestamönnum og öðru
áhuga fólki um útivist. Kórinn fer gjarnan
í hestaferðir til að ljúka starfsárinu. Farið
var á Löngufjörur í fyrra en fresta þurfti
lokahófinu í ár fram á sumar vegna hesta-
veikinnar. Hestaveikin hefur einnig haft áhrif
á fyrirætlanir fjölskyldunnar þetta sumarið
þar sem Landsmót hestamanna var blásið
af og hestaferðir ekki inni í myndinni að
svo stöddu. Þess í stað munum við fara í
styttri ökuferðir út fyrir bæinn, meðal annars
í Biskupstungurnar, en þar eiga tengda-
foreldrar mínir sumarbústað og sælureit. Ég
hef mikinn áhuga á hvers konar útivist og
íþróttum, ekki síst fótbolta og blaki. Yngri
dóttirin æfir fótbolta með Breiðabliki og í
júlí verður farið með þrjú lið, samtals 44
stelpur, í hennar aldursflokki á USA CUP í
Minneapolis. Öll fjölskyldan ætlar að fylgja
henni þangað.“
Fólk