Frjáls verslun - 01.04.2007, Blaðsíða 54

54 F R J Á L S V E R S L U N • 4 . T B L . 2 0 0 7
L A X V E I Ð I
nálægt 15 milljörðum króna. Að þessum
félögum frátöldum er algengast að einstakir
veiðileyfasalar leigi eina þekkta lax- eða sil-
ungsveiðiá og sjái um sölu veiðileyfa í hana
en á því eru nokkrar undantekningar.
Sum af smærri stangaveiðifélögunum eru
með nokkur ársvæði á leigu og í þeim hópi
er Stangaveiðifélag Keflavíkur hvað öflugast.
Þá leigja sumir einstaklingar fleiri en eitt
vatnasvæði. Nefna má að Pétur Pétursson og
erlendur félagi hans leigja veiðirétt í Vatns-
dalsá, Reykjadalsá í Reykjadal og Skálm-
ardalsá á Vestfjörðum.
Ástþór Jóhannsson leigir veiðirétt í
Straumfjarðará á Snæfellsnesi og Mýrarkvísl
í Suður-Þingeyjarsýslu með öðrum, Einar
Sigfússon er annar eigandi Haffjarðarár og
leigir auk þess veiðirétt í Víkurá í Hrútafirði
og Ásgeir Ásmundsson leigir Skógá og aust-
urbakka Hólsár, svo að nokkrir af hinum
smærri leigutökum séu nefndir.
Loks er því við að bæta að Svisslendingur
að nafni Doppler leigir Ormarsá og Deild-
ará, sem báðar eru í nágrenni Raufarhafnar,
og hefur auk þess haft ítök í Haukadalsá.
Veiðileyfi í fyrrnefndu árnar tvær hafa ekki
verið til sölu á almennum markaði.
Stangaveiðitímabilið hefst 1. apríl ár hvert
en þá byrjar veiði í ýmsum vötnum sem og
í nokkrum sjóbirtingsám á Suðurlandi og
Norðurlandi. 1. maí er síðan heimiluð veiði í
enn fleiri vötnum og nægir í því sambandi að
nefna Elliðavatn og Þingvallavatn. Laxveiði-
tímabilið hefst hins vegar ekki fyrr en 1. júní
ár hvert en þar sem lítil laxgengd hefur verið
fyrstu veiðidagana í flestum ám sem opnaðar
eru svo snemma, hefur opnunin víðast hvar
verið að færast aftar.
Opnun í Norðurá var að þessu sinni að
morgni 5. júní og síðar þann dag hófst lax-
veiðin í Blöndu. Í mörgum ánum hefst lax-
veiðin ekki fyrr en 20. júní og í enn öðrum
er ekki heimilt að hefja veiðar fyrr en komið
er fram í júlí. Samkvæmt lax- og silungs-
veiðilögunum má stunda veiðarnar í 105
daga í straumvatni og lýkur laxveiðitímanum
því víðast hvar fyrir lok septembermánaðar.
Þar sem sjóbirtingur er í aðalhlutverki eru
veiðarnar yfirleitt heimilaðar til 10. október
ár hvert og ekki er óalgengt að framlenging
fáist til 20. október þar sem stofnar sjóbirt-
ings eru taldir vera í góðu ástandi.
Verð á silungsveiðileyfum
Verð á stangaveiðileyfum er ákaflega misjafnt
svo ekki sé meira sagt. Ódýrustu silungs-
veiðileyfin kosta e.t.v. 500 til 1.000 krónur
fyrir stöngina en dýrustu silungsveiðileyfin
eru í bestu sjóbirtingsánum þar sem þau geta
kostað hátt í 30 þúsund krónur fyrir stöng-
ina.
Verð veiðileyfa í bestu urriðaveiðiánum
(staðbundinn urriði) er sennilega hæst í Laxá
í Mývatnssveit og Laxárdal eða hátt í 15 þús-
und krónur fyrir stöngina á besta tíma og í
Minnivallalæk þar sem leyfin kosta tæpar 13
þúsund krónur.
Fyrir bestu bleikjuveiðileyfin þarf að
greiða tæpar 25 þúsund krónur í Víðidalsá
en þar er þó nokkur laxavon á silungasvæð-
inu og tekur veiðileyfaverðið mið af því.
Fyrir venjulegt fólk, sem hefur gaman af því
að kasta fyrir silung án þess að eyða of miklu
fé í veiðileyfin, er Veiðikortið sannkölluð
snilldarlausn en handhafar þess geta veitt á
38 vatnasvæðum víðs vegar á landinu fyrir
aðeins 5.000 krónur.
Verð á laxveiðileyfum
Verð á laxveiðileyfum er svo allt annar hand-
leggur. Þar endurspeglast verðið á leyfunum
Í skýrslu Hagfræðistofnunar frá árinu 2004 segir:
„Niðurstöður úttektarinnar gefa til kynna að stangaveiðin leggi mun meira til þjóð-
arbúsins en áður hefur verið ætlað. Bein, óbein og afleidd áhrif stangaveiði innlendra
og erlendra veiðimanna eru áætluð á bilinu 7,8 til 9,1 milljarðar króna á ári. Þar af
er gert ráð fyrir að sölu- og leigutekjur veiðifélaganna séu á bilinu 868 til 961 milljón
króna og að viðbótartekjur leigutaka séu á bilinu 173 til 228 milljónir króna á ári.
Útgjöld innlendra veiðimanna til neyslu á innlendri vöru eða þjónustu eru metin á
bilinu 501 til 543 milljónir króna á ári og útgjöld erlendra stangveiðimanna á bilinu
201 til 403 milljónir króna. Samtals eru því beinu áhrifin talin vera á bilinu 1,7 til 2,1
milljarðar króna á ári. Óbein og afleidd áhrif eru talin vera 6,1 til 7,0 milljarðar króna
á ári.
Af þessum niðurstöðum má ráða að tekjur veiðifélaga og leigutaka séu aðeins lítill
hluti af þeim efnahagslegu umsvifum sem lax- og silungsveiði á stöng á Íslandi hafa í
för með sér, eða um 13%.“
Árið 2004
(Tölur í milljónum kr.)
Sölu- og leigutekjur veiðifélaga915
Viðbótartekjur leigutaka 200
Bein útgjöld innlendra
veiðimanna tengd veiðinni 522
Bein útgjöld erlendra
stangveiðimanna tengd veiðinni 222
Samtals bein áhrif1.859
Önnur eyðsla.
Samtals óbein og afleidd áhrif 6.550
Niðurstaða:
Efnahagsleg umsvif lax-
og silungsveiði á stöng 8.409
(Unnið upp úr skýrslu Hagfræðistofnunar)