Frjáls verslun - 01.02.2005, Blaðsíða 114

114 F R J Á L S V E R S L U N • 2 . T B L . 2 0 0 5
FÓLK
V
öxtur Samskipa hf. er ævintýri lík-
astur og á nokkrum árum hefur
félagið náð þeim áfanga að kallast
alþjóðlegt flutningafyrirtæki. Það er
að þakka öflugri stjórn og starfsfólki sem
trúir því að allt sé hægt, sé viljinn fyrir
hendi,“ segir Lilja Dóra Halldórsdóttir, sem
nýverið settist í stjórn Samskipa.
„Stjórnarsetan í Samskipum hf. kom
þannig til að haft var samband við mig og
eftir stutta íhugun ákvað ég að slá til, enda
verkefnið spennandi. Ég hlakka til að takast
á við það og vonandi get ég lagt mitt á vogar-
skálarnar við frekari framþróun félagsins og
þau ögrandi verkefni sem vinna þarf að.“
Eftir að Lilja Dóra útskrifaðist frá laga-
deild HÍ fór hún að starfa sem lögfræðingur
Skeljungs. „Það var ágætur skóli atvinnulífs-
ins, margs konar verkefni sem féllu til í stóru
fyrirtæki og gott samstarfsfólk.
Árið 1998 flutti ég og fjölskylda mín til
Belgíu vegna starfa Jónasar, mannsins míns,
fyrir Eftirlitsstofnun EFTA. Upphaflega átti
þetta að vera 2-3 ára dvöl, en okkur leið mjög
vel úti og árin urðu sex áður en við vissum af.
Ég var svo heppin að fá að starfa að ýmsum
verkefnum í Eftirlitsstofnuninni sem sér-
fræðingur frá Íslandi, en stærstu verkefnin
voru á sviði opinberra útboða og landamæra-
eftirlitsstöðva fyrir fisk. Þá fór ég í tveggja
ára MBA-nám við Vlerick skólann í Leuven,
sem var gríðarlega skemmtilegt og kynntist
ég þar fólki víðs vegar að úr heiminum. Sam-
félag Íslendinga í Belgíu er einstakt, þarna
búa um 300 manns, flestir þekkjast og margir
hittast reglulega, í og utan vinnu.“
Lilja Dóra kom aftur heim til Íslands
fyrir rúmu ári og hóf störf í Háskólanum í
Reykjavík. „Þar gegni ég stöðu aðjunkts. Ég
kenni í ýmsum námskeiðum í BS-náminu
og í stjórnendaskóla HR, flestum tengdum
stjórnun og stefnumótun fyrirtækja. Tíminn
í HR hefur verið einstaklega lærdómsríkur
og gefandi, bæði samstarfsfólk og nemendur
starfa hér af miklum krafti og metnaði sem
smitar út frá sér. Mér finnst mikils virði hvað
nemendur og kennarar eiga opin og góð
samskipti, ólíkt því sem ég kynntist í námi
mínu í lagadeild HÍ á sínum tíma, þar sem
prófessorar voru ósnertanlegir og kærðu
sig jafnvel ekki um spurningar í tímum. Það
eru auðvitað forréttindi að vakna á hverjum
morgni og hlakka til að fara í vinnuna, finna
að maður hefur einhverju að miðla en ekki
síst að fá tækifæri til að vinna með frábæru
fólki og læra eitthvað nýtt sjálfur.“
Áhugamálin eru og hafa alltaf verið mörg
hjá Lilju Dóru. „Ég reyni að komast nokkuð
reglulega út í náttúruna, á skíði, í bakpoka-
ferðalag eða jeppaferð. Þá á fjölskyldan
tvo hunda sem eru miklir gleðigjafar. Fjöl-
skyldan er annars stærsta áhugamálið en
það tók sinn tíma að koma henni allri aftur
heim á frón, börnin komu í haust, hundarnir
komu svo fyrir jól og um þessar mundir er
Jónas að klára störf sín hjá ESA. Þar með
er kominn punktur aftan við Belgíuævintýri
fjölskyldunnar – í bili,“ segir Lilja Dóra.
TEXTI: ÍSAK ÖRN SIGURÐSSON
MYND: GEIR ÓLAFSSON
„Vöxtur Samskipa hf. er ævintýri líkastur og á nokkrum árum hefur félagið náð þeim áfanga
að kallast alþjóðlegt flutningafyrirtæki. Það er að þakka öflugri stjórn og starfsfólki sem trúir
því að allt sé hægt, sé viljinn fyrir hendi,“ segir Lilja Dóra Halldórsdóttir.
Halldórsdóttir
í stjórn Samskipa
Lilja Dóra
Nafn: Lilja Dóra Halldórsdóttir.
Fædd og uppalin: Í Vestmannaeyjum.
Foreldrar: Halldór Guðbjarnason,
forstjóri VISA, og Steinunn
Brynjúlfsdóttir, meinatæknir.
Menntun: Stúdent frá MR
og kandídatspróf frá lagadeild HÍ.
MBA frá Vlerick í Belgíu.
Fjölskylduhagir: Gift Jónasi Fr. Jónssyni,
lögmanni og MBA, framkvæmdastjóra
Eftirlitsstofnunar EFTA (ESA).
Börn Lilju Dóru og Jónasar: Steinunn Dóra
14 ára og Jónas Rafnar 7 ára.