Ársrit um starfsendurhæfingu - 2017, Blaðsíða 43
VIRK
Vaxandi fjöldi rannsókna sýna að fyrirtæki
sem skara framúr þegar kemur að heilsu,
velferð og öryggi starfsmanna á vinnustað
eru einnig þau fyrirtæki sem skila
framúrskarandi fjárhaglsegum árangri á
markaði (Fabius, Loeppke, Hohn, Fabius,
Eisenberg, Konicki & Larson 2016). Í
prófun á þeim fyrirtækjum sem voru með
háa einkunn þegar kom að annaðhvort
heilsu og/eða öryggi eins og það var metið
í ákveðnu gæðaferli (Corporate Health
Achievement Award – CHAA) kom í ljós
að þau sköruðu framúr öðrum fyrirtækjum
sem voru á S&P 500 listanum. Einn af þeim
stöðlum sem metnir voru í gæðaferlinu
tengdist innleiðingu ákveðinna verkferla á
vinnustað (DM) sem draga úr slysum og
sjúkdómum og innleiðingu á stefnum sem
tengjast fjarverustjórnun og endurkomu til
vinnu.
Mikilvægi aðlögunar á
vinnustað
Eins og komið hefur fram hér að framan
þá er það ljóst að það er hagur fyrirtækja
og starfsmanna með skerta starfsgetu að
komið sé til móts við þá í formi aðlögunar
á vinnustað þegar þeir snúa til baka í vinnu
eftir fjarveru vegna veikinda hvort sem
varðar verkefni eða vinnutíma. Fjölmargar
rannsóknir hafa verið gerðar til að greina
þá þætti sem geta auðveldað árangursríka
endurkomu til vinnu eða hindrað hana eins
og sjá má hér til hægri og flesta þessara
þátta má hafa áhrif á með ýmsum íhlutunum
(Cancelliere, Donovan, Stochkendahl,
Biscardi, Ammendolia, Myburgh & Cassidy
2016).
ÞÆTTIR SEM GETA HAFT ÁHRIF
Á ENDURKOMU TIL VINNU (ETV)
ÞÆTTIR SEM GETA AUÐVELDAÐ
ÁRANGURSRÍKA ETV:
• Hærra menntunarstig
• Hærri þjóðfélagsstaða
• Trú á sjálfan sig og bjartsýni gagnvart bata og ETV
• Minniháttar meiðsli/veikindi
• Í starfi þegar veikist
• Þátttaka annarra hagsmunaaðila í ETV- ferlinu
• Vinnuhagræðing/vinnuaðlögun
• Samhæfing á ETV-ferlinu
• Þverfagleg starfsendurhæfing sem tengist vinnustaðnum og öðrum
hagsmunaaðilum
• Samskipti milli hagsmunaaðila snemma í ferlinu
ÞÆTTIR SEM GETA HINDRAÐ
ÁRANGURSRÍKA ETV:
• Hærri aldur
• Miklir verkir eða óvirkni
• Þunglyndi
• Fyrri veikindafjarvera
• Takmörkuð hreyfigeta/takmörkuð geta til þátttöku
• Tímabil án þess að vera með vinnu
43virk.is