Ársrit um starfsendurhæfingu - 2017, Blaðsíða 47
VIÐTAL
Í hverju felst samráðið við ráðgjafana og
fulltrúa VIRK?
„Í flestum tilvikum er um að ræða einhvers
konar markmiðssetningu sem er rædd í
upphafi. Rætt er um starfshlutfall, jafnan
er í svona samningum byrjað í lágu hlutfalli
og það síðan aukið eftir því hvernig gengur.
Sömuleiðis er gott fyrir fyrirtækið að geta
rætt við ráðgjafa um styrkleika viðkomandi
starfsmanns annars vegar og þess sem ber
að gæta að sérstaklega hins vegar. Ég held
líka að þessi góðu samskipti við ráðgjafa
VIRK séu að nýtast á þeim vettvangi einnig.
Það er vegna þess að vinnuveitandinn
miðlar auðvitað umsögnum og yfirsýn til
ráðgjafans varðandi það, hvernig viðkomandi
starfsmanni gengur á vinnumarkaðinum.“
Réttur maður á réttum stað
Er mikið mál að taka á móti einstaklingum
sem hafa verið í samstarfi við VIRK?
„Ég myndi alls ekki segja að það væri
mikið mál. Hins vegar þarf vinnuveitandinn
að vera meðvitaður um að ekki er um
hefðbundna ráðningu að ræða. Ráðningin
þarf því að vera gerð með því hugarfari
að viðkomandi vinnuveitandi ætli sér að
gefa einstaklingnum, sem kemur frá VIRK,
meiri tíma eða öðruvísi svigrúm í þjálfun en
almennt gengur og gerist. Mín reynsla er
að sú að mannauðurinn og starfskraftarnir
sem fyrirtækið fær með ráðningunum vegi
svo langtum þyngra en nokkuð annað
í ferlinu. Það þarf líka að gæta þess að
vanda vel til ráðningarinnar sjálfrar gagnvart
starfsmanninum. Til þess að láta þetta
takast frábærlega þarf maður að vera
nokkuð sannfærður um að þarna sé réttur
maður á réttum stað.“
Hvernig hefur þessum tveimur
einstaklingum gengið að vinna með
samstarfsfólkinu?
„Í þessum tveimur tilvikum sem ég hef
reynslu af hefur einstaklingunum sem
voru ráðnir með stuðningi Virk gengið
framúrskarandi vel að vinna með fólkinu
sem fyrir var. Í því sambandi tel ég að það
skipti afar miklu máli að samstarfsfólk sé
upplýst um það fyrirfram að ráðningin sé
unnin í samstarfi við VIRK. Ég lagði mikla
áherslu á það í upphafi að fyrirtækið og
starfsmenn þess væru jákvæðir í viðhorfum
sínum gagnvart samstarfinu við VIRK.
Reynsla mín er að þegar starfsmenn fá
upplýsingar um VIRK og þá starfsemi sem
fer þar fram þá séu þeir strax mjög jákvæðir.
Það er einmitt þetta jákvæða viðhorf sem
hjálpar til, bæði fyrir starfsmanninn sem er
að koma úr endurhæfingunni og jafnframt
við alla þjálfun. Í raun má segja að þjálfun
nýrra starfsmanna fari að stórum hluta
fram með samstarfi við þá sem fyrir eru í
viðkomandi deild fyrirtækisins.“
Hæfileikar fram úr vonum
Höfðu þessir tveir starfsmenn sérmenntun
á einhverju sviði?
„Já, annar þeirra er lærður í kvikmyndagerð
og í því starfi er hann vægast sagt mjög
hæfileikaríkur. Það sem kom mér svo
skemmtilega á óvart var að hæfileikarnir hans
og frumkvæði í starfi náðu svo langt umfram
það sem ég hafði nokkurn tíma gert mér vonir
um. Umræddur starfsmaður er mjög hæfur og
hefur reynst allt í senn kvikmyndatökumaður,
ljósmyndari og grafískur hönnuður.
Hvað hinn einstaklinginn snertir kom það
mér einnig skemmtilega á óvart að sá
starfsmaður er svo röskur til verka að fljótt
kom í ljós að verkefnasviðið varð fljótlega
miklu fjölþættara en ég hafði gert ráð fyrir.“
Mælir með vinnusamningum
„Ég hvet fyrirtæki hiklaust til þess að skoða
vinnusamninga í samstarfi við VIRK, einkum
þegar um er að ræða hlutastörf sem gætu
með tíð og tíma aukist í full stöðugildi,“ segir
Rakel.
„Oft er það þannig að fyrirtæki bíða
með slíkar ráðningar í lengstu lög vegna
kostnaðar. Með vinnusamning skapast
tækifæri til þess að leysa úr þessu á
einfaldan hátt. Annars vegar með ráðningu
hæfileikaríkra einstaklinga og hins vegar
með mótframlagi sem lækkar launakostnað
meðan á samningnum stendur. Ég held að
það séu alltof fá fyrirtæki sem gera sér grein
fyrir hve mikil tækifæri felast í vinnusamningi
og mæli með því, einkum fyrir smærri
fyrirtæki, að þessi leið sé skoðuð.“
Hvað standa svona vinnusamningar lengi?
„Þeir eru oftast miðaðir við sex mánuði
en það er of stuttur tími samkvæmt
minni reynslu. Í báðum tilfellum hef ég
talað fyrir framlengingu á samningi – og
það ekkert síður fyrir starfsmanninn en
vinnuveitandann. Ég hef komist að raun um
að svigrúmið sem þarf til starfsþjálfunar og
svigrúmið sem þarf bæði fyrir starfsmanninn
og vinnuveitandann til þess að læra á
styrkleika og getu viðkomandi tekur lengri
tíma en þessa sex mánuði. Ég myndi
mæla með því að fyrirtæki sem gera
vinnusamninga við fólk sem hefur verið í
samstarfi við VIRK ræði þetta strax í upphafi.
Með tólf mánaða samingum eru miklu meiri
líkur á að vinnustaðasamningur sé búinn
að skila af sér framtíðarráðningu eða í það
minnsta að starfsmaðurinn hafi öðlast fulla
starfsgetu.“
Hafa þessi tveir einstaklingar verið kvíðnir
vegna þessa að samningurinn rennur fljótt
út?
„Já, ég tel að sex mánaða vinnusamningar
búi til óþarfa kvíða hjá nýráðnum
starfsmönnum því oftar en ekki eru þetta
einstaklingar sem þú vildir mjög gjarnan
byggja upp meira sjálfstraust hjá.“
Hefur þú sagt forráðamönnum annarra
fyrirtækja frá reynslu þinni af samstarfi
við VIRK?
„Já ég hef gert það og væri til í að gera
meira af því. Mín upplifun af þessum
tveimur ráðningum sem Hringbraut gerði við
einstaklinga sem komu úr samstarfi við VIRK
er þess eðlis að ég tel að vinnumarkaðurinn
hefði misst af miklum mannauði hefði þessum
starfsmönnum ekki auðnast að komast til
starfa þar á ný. Það er þess vegna sem ég
tel að það sé allra hagur að kynna sér vel út á
hvað ráðning gengur við þá einstaklinga sem
koma úr samstarfi við VIRK.“
Texti: Guðrún Guðlaugsdóttir
Mín upplifun af
þessum tveimur
vinnusamningum
sem Hringbraut gerði
við einstaklinga sem
komu úr samstarfi
við VIRK er þess
eðlis við að ég tel að
vinnumarkaðurinn
hefði misst af miklum
mannauði hefði
þessum starfsmönn-
um ekki auðnast að
komast til starfa
þar á ný.“
47virk.is