Strandapósturinn - 01.06.2021, Qupperneq 101

100
fara horfði í sveitinni. Allt hjálpaði þetta til við að halda rekstri sláturhúss-
ins gangandi út öldina, þrátt fyrir að kröfur um starfsemi sláturhúsa færu
stöðugt vaxandi og sífellt erfiðara yrði að uppfylla þær fyrir lítil sláturhús.
Þannig styrkti sláturhúsið og kaupfélagið samfélagið bæði efnahagslega
og félagslega langt umfram það sem túlkað verður með orðum í lítilli tíma-
ritsgrein.
Harðnar á dalnum
Eins og áður sagði jukust kröfur um aðbúnað og vinnubrögð í slátur-
húsum landsmanna út alla öldina. Samfara því að margvíslegar sam-
félagsbreytingar og erfiðleikar í kjötsölu og rekstri sláturhúsa á landsvísu
kölluðu á samruna sláturhúsa og stærri rekstrareiningar þar sem unnt
væri að koma við meiri hagkvæmni. Til viðbótar má nefna að kröfur
um bætta meðferð matvæla bæði innanlands og erlendis frá, gerðu litlu
sláturhúsunum sífellt erfiðara fyrir. Bættar samgöngur og afkastameiri
flutningatæki á sláturfé flýttu þróuninni, þannig að þegar 20. öldin
kvaddi var augljóst að ekki yrði miklu lengur synt á móti straumnum og
tími endalokanna væri skammt undan.
Frá stofnun Kaupfélagsins 1942 var stöðugt unnið að endurbótum á
húsakosti með það fyrir augum að gera starfsemina skilvirkari og störfin
auðveldari. Áður er minnst á að fyrsta raunverulega sláturhúsið var byggt
á Óspakseyri 1953, en kröfurnar jukust jafnt og þétt og við þeim varð að
bregðast. Árið 1966 var byggð frystigeymsla við sláturhúsið, sem var mikil
nauðsyn. Með tilkomu hennar var unnt að frysta afurðir, sem ekki komust
strax á markað. Auk þess var þar að finna frystihólf sem leigð voru út til
félagsmanna og annarra í sveitinni. Frystihólfin breyttu miklu fyrir íbúana,
því þar var hægt að geyma allskyns matvöru í stað þess að þurfa að salta,
reykja og súrsa allar sláturafurðir til heimilis eins og áður var gert.
Árið 1978 var byggð fjárrétt við sláturhúsið og sú gamla tekin undir
gærusöltun. Ári seinna var enn brugðist við nýjum kröfum og sláturhúsinu
gjörbreytt í samræmi við teikningar sem teiknistofa SÍS hafði unnið 1977
að beiðni stjórnar kaupfélagsins. Við þessa breytingu gat sláturhúsið upp-
fyllt allar kröfur sem þá voru gerðar til starfsemi af þessu tagi.
En þróunin varð ekki stöðvuð.
Þegar 21. öldin leit dagsins ljós var svo komið að rekstur sláturhússins á