Bændablaðið - 01.12.2022, Side 7

7Bændablaðið | Fimmtudagur 1. desember 2022
LÍF&STARF
G lænýjar vísur frá Ingólfi
Ómari Ármannssyni bárust
í pósthólf þáttarins. Líkt og
allur kveðskapur hans, þá eru vísurnar
af bestu gerð:
Linar sút og sára kvöl,
sálartetri hlýnar,
þegar rennur áfengt öl
oní kverkar mínar.
Þess eru líka dæmi að Bakkus fylgi
með í hestaferðum. Því fylgir með
ofanskráðri vísu ein hestavísa frá Ingólfi
Ómari:
Eykur fljótur fiman gang,
for og grjóti þeytir.
Yfir hnjótur vítt um vang
vökrum fótum beitir.
Nokkurt efni hefur birst undanfarið
eftir Jón Ingvar Jónsson, einn ástsælasta
hagyrðing samtíðar sinnar, en Jón Ingvar
lést þann 26. ágúst og var jarðsunginn 4.
október síðastliðinn.
Í minningu hans fylli ég það sem lifir
þáttar. Vel er viðeigandi að skrá fyrst stutt
aðventuljóð eftir Jón Ingvar:
Sjá! Frúin, hún ryksugar, fægir og
þvær
og flest sem að húsverkum lýtur
hún leysir, sá starfi er konum svo kær
og kvenlega eðlið sín nýtur.
Af alúð og natni hún undirbýr jól
svo ekki er mikið um næði,
en skáldið er hugsi í hægindastól
og heillast af ósömdu kvæði.
Rökvísi er hægt að beita í brag:
Krunki hrafn við kaldan sæ
kemur júní eftir maí.
Kyssi báran kalda sker
koma jól í desember.
Staddur á tjaldstæði orti Jón Ingvar:
Þegar myrkrið missir vald
og morgungeislar lýsa
skríður örþreytt inn í tjald
útitekin skvísa.
Á ferð með Iðunnarfélögum orti Jón:
Yfir kæra frónið fríða
furðu léttir enn
gúmmídekkjagriðung ríða
gamlir kvæðamenn.
Einn nánasti vinur Jóns Ingvars meðal
hagyrðinga var Sigrún Haraldsdóttir, sem
tók saman það efni sem hér er birt. Til
Sigrúnar orti Jón Ingvar:
Í æsku varstu ósköp góð,
og efni mikið þóttir,
en svo fórst þú að semja ljóð
Sigrún Haraldsdóttir.
Hárið er farið að þynnast:
Áður helst minn hróður jók
hárið þykkt og mikið.
Drottinn gaf og Drottinn tók,
Drottinn fór yfir strikið.
Jón Ingvar starfaði sem leiðsögumaður
um langt árabil. Um þá iðju orti hann
tvær vísur:
Þegar völlur þiðnar senn
og þokar mjöll af grundum
upp á fjöll og ferðamenn
fer ég öllum stundum.
Í lífinu vel er ég liðinn
og Laufeyju strýk ég um kviðinn
hvern einasta dag
og af því fékk slag
því ég er svo andskoti iðinn.
Í göngutúr um borgarlandið orti Jón:
Beautiful er borg mín öll
og björt í senn
þar sem konur væta völl
og veggi menn.
Umsjón:
Árni Geirhjörtur Jónsson
kotabyggd1@gmail.com
310MÆLT AF
MUNNI FRAM
Bergur Jónsson og Olil Amble voru valin
Ræktunarmenn ársins 2022 á haustráðstefnu
fagráðs í hrossarækt sunnudaginn 20.
nóvember síðastliðinn. Þau kenna hross sín
við Ketilsstaði á Völlum og Syðri-Gegnishóla
í Flóa. Þetta er í sjötta sinn sem þau hljóta
titilinn.
Ráðstefnan, sem var haldin í Sprettshöllinni,
var vel sótt en meðal dagskrárliða var kynning
Úndínu Ýr Þorgrímsdóttur dýralæknanema á
rannsókn á magasárum í hrossum og erindi
Þorvaldar Kristjánssonar kynbótadómara um
sögu Landsmóta og þátttöku kynbótahrossa.
Í framhaldi fóru gestir ráðstefnunnar yfir
spurningar sem fagráð var búið að setja niður
auk þess sem orðið var gefið frjálst. Var þetta
byrjunin á umfjöllun sem fagráð ætlar sér að
taka með í mótun á framtíðarsýn Landsmóta
og aðkomu hrossaræktar og kynbótahrossa
að þeim.
Allmörg verðlaun voru veitt á ráðstefnunni.
Tuttugu hryssur hlutu heiðursverðlaun fyrir
afkvæmi, en þeim verða gerð nokkur skil
í jólaútgáfu Bændablaðsins. Hans Þór
Hilmarsson hlaut verðlaun fyrir að sýna það
hross sem hlaut hæstu hæfileikaeinkunn án
áverka þegar Sindri frá Hjarðartúni hlaut 9,38,
en það er enn fremur það hross sem hæstu
hæfileikaeinkunn hefur nokkru sinni hlotið (sjá
nánar bls. 26). Sindri er sjö vetra gamall, undan
Stála frá Kjarri og Dögun frá Hjarðartúni.
Stóðhesturinn Fróði frá Flugumýri hlaut
viðurkenningu fyrir hæstu aldursleiðréttu
aðaleinkunn án skeiðs, 9,14. Hann var sýndur
af ræktanda sínum og eiganda, Eyrúnu Ýri
Pálsdóttur. Teitur Árnason er meðræktandi og
Alexandra Hoop meðeigandi. Fróði er 5 vetra
undan Hring frá Gunnarsstöðum og Fýsn frá
Feti.
Þá hlaut stóðhesturinn Viðar frá Skör
viðurkenningu fyrir að hafa hlotið hæstu
aldursleiðréttu aðaleinkunn ársins, 9,04, en
það er líka það hross sem hefur hlotið hæstu
aðaleinkunn nokkru sinni. Viðar er ræktaður
af Karli Áka Sigurðssyni en í eigu Flemming
Fast og Gitte Fast Lambertssen. Viðar 8 vetra
er undan Hrannari frá Kýrholti og Vár frá
Auðsholtshjáleigu. Knapi Viðars, Helga Una
Björnsdóttir, var valin kynbótaknapi ársins.
Fimmtán bú voru tilnefnd til titilsins
ræktunarbú ársins og hlutu aðstandendur þeirra
viðurkenningu á fundinum.
Sem fyrr segir kom svo í hlut Ketilsstaða/
Syðri-Gegnishóla að bera titilinn ræktunarbú
ársins 2022. Bergur og Olil státa af mögnuðum
ræktunarárangri til fjölda ára. Þau standa afar
faglega að sinni ræktun og öllum hliðum
hennar, s.s undirbúningi hrossa, tamninga og
sýningahalds. Verðlaunin í ár byggja á níu
sýndum hrossum, en átta þeirra fengu fyrstu
verðlaun í kynbótadómi og var aldursleiðrétt
meðaleinkunn þeirra 8,21 og meðalaldur 5,8
ár. Auk einstaklingssýndra hrossa hlutu fjórar
hryssur úr þeirra ræktun heiðursverðlaun fyrir
afkvæmi, þær Álöf og Spes frá Ketilsstöðum og
Heilladís og Skjóða frá Selfossi. Þá hlutu tveir
stóðhestar úr ræktun þeirra fyrstu verðlaun
fyrir afkvæmi en það eru bræðurnir Álfarinn
og Álfaklettur frá Syðri-Gegnishólum en sá
síðarnefndi hlaut Orrabikarinn á Landsmótinu
í ár sem efsti stóðhesturinn í sínum flokki
afkvæmahesta.
Þess má geta að búið hlaut einnig titilinn
Keppnishestabú ársins 2022 á verðlaunahátíð
Landssambands hestamannafélaga fyrr í
nóvembermánuði. Í umsögn sambandsins
kemur fram að hross frá búinu séu í
verðlaunasætum móta um allan heim, m.a.
sem landsmeistarar í Sviss og Þýskalandi
og úrslitahestar á Landsmóti í mismunandi
greinum. /ghp
Hrossaræktendur verðlaunaðir
Aðstandendur tilnefndra ræktunarbúa ársins stilla sér upp fyrir myndatöku með forsvarsmönnum Bændasamtaka Íslands og fagráðs í hrossarækt.
Myndir / GB1
Úndína Ýr Þorgrímsdóttir dýralæknanemi.
Olil Amble situr hér Álfaklett frá Syðri-
Gegnishólum sem hlaut Orrabikarinn á
Landsmóti. Mynd / KollaGr
Viðar frá Skör og Helga Una á Landsmóti í sumar. Mynd /Óðinn Örn - Eiðfaxi
Helga Una Björnsdóttir var valin
kynbótaknapi ársins.
Sveinn Steinarsson, formaður deildar hrossabænda, Brynja Amble Gísladóttir, Bergur
Jónsson, Elin Holst, sem tóku við verðlaunum fyrir hönd Ketilsstaða/Syðri-Gegnishóla, Gunnar
Þorgeirsson, formaður BÍ, og Heiðrún Ósk Eymundsdóttir, varaformaður deildar hrossabænda.
Fróði frá Flugumýri og Eyrún Ýr á Landsmóti
í sumar. Mynd / Óðinn Örn - Eiðfaxi Eyrún Ýr Pálsdóttir tekur við verðlaunum
fyrir Fróða frá Flugumýri.
Þorvaldur Kristjánsson ræddi um þátttöku
kynbótahrossa á Landsmótum.