Bændablaðið - 01.12.2022, Page 10

10 Bændablaðið | Fimmtudagur 1. desember 2022
FRÉTTIR
Kolefnisbrúin:
Asparskógur á Suðurlandi
fyrsta skráða verkefnið
Loftslagsverkefnið Kolefnisbrúin
er í eigu Bændasamtaka Íslands og
skógarbænda.
Meginmarkmið þess er að koma
á fót viðskiptasamböndum á milli
bænda og þeirra aðila sem vilja
minnka kolefnislosun sína, þar sem
átt er í viðskiptum með svokallaðar
kolefniseiningar. Nú er unnið að
því að skrá fyrsta verkefnið inn í
Kolefnisbrúna.
Kolefniseiningarnar verða til á
landi bænda og annarra landeigenda
– og geta gengið kaupum og sölum.
Um vottaðar einingar verður að
ræða, samkvæmt viðurkenndu ferli
Skógræktarinnar.
Alþjóðlegur skráningargrunnur
Valur Klemensson, sérfræðingur
í umhverfismálum hjá Bænda­
samtökum Íslands, segir að verkefni
Kolefnisbrúarinnar til framtíðar
verði að fjölga verkefnum í
kolefnisbindingu hjá landeigendum.
Ýmis verkefni komi þar til greina;
nýskógrækt, landgræðsla og
endurheimt votlendis. Öll verkefni
á vegum Kolefnisbrúarinnar verði
skráð í Loftslagsskrá (International
Carbon Registry), sem sé rafrænn
alþjóðlegur skráningargrunnur fyrir
loftslagsverkefni.
„Þeir sem vilja skrá loftslags­
verkefni í Loftslagsskrá og gefa
út kolefniseiningar þurfa að
uppfylla ítarlegar kröfur í samræmi
við alþjóðlegar meginreglur til
loftslagsverkefna,“ segir Valur.
Tuttugu hektara svæði
Að sögn Vals er nú unnið að
skráningu fyrsta verkefnis á vegum
Kolefnisbrúarinnar í Loftslagsskrá
en þar er um að ræða asparrækt á
20 hekturum á Suðurlandi.
„Verkefnið verður unnið
samkvæmt stöðlum Skógarkolefnis,
til að koma á fót viðurkenndu
ferli við bindingu kolefnis með
nýskógrækt.
Skógarkolefni skapar viðmið
fyrir kolefnisbindingu með
nýskógrækt á frjálsum markaði.
Almenningur, stofnanir og fyrirtæki
sem vilja leggja sitt af mörkum
til loftslagsbaráttunnar og binda
kolefni fá þannig fullvissu um
bindingu sína. Loftslagsskrá er í
samstarfi við Skógræktina og eru
skógarkolefniseiningar skráðar í
Loftslagsskrá.“
Kolefnisbrúin sér um skráningu
Valur segir að fyrirkomulagið sé
þannig að landeigandi leggi til
land, safni asparstiklingum og sinni
vinnu við plöntun, auk viðhalds á
girðingum og sjálfum skógunum.
„Kolefnisbrúin sér um skráningu
í Loftslagsskrá og þá vinnu
sem skráningu fylgir, svo sem
ræktaráætlun og samningagerð.
Úttektir og vottun verkefna greiðist
af einingum sem verða til við
verkefni og sér landeigandi um
að ráðstafa einingum til að standa
straum af þeim kostnaði.
Hann segir að Kolefnisbrúin
muni síðan setja upp kerfi til
að bjóða upp kolefniseiningar,
en þær séu eingöngu hugsaðar
fyrir innanlandsmarkað og ekki
færanlegar á milli landa. /smh
Asparskógur á Suðurlandi er fyrsta skráða verkefni Kolefnisbrúarinnar.
Valur Klemensson, sérfræðingur BÍ
í umhverfismálum.
VÖRUR FYRIR ÍSLENSKT SAUÐFÉ
BÚVÖRUR SS
Verslun Fosshálsi 1, 110 Reykjavík | S: 575 6071
Verslun Ormsvelli 4, 860 Hvolsvelli | S: 575 6099
Búvörur SS | S: 575-6070 | www.buvorur.is | buvorur@ss.is
Óerfðabreytt ærblanda
og ýmsar vörur fyrir
sauðfjárbændur fást í
verslunum og hjá
sölumönnum okkar á
landsbyggðinni
Jólaskógarnir opnir á aðventunni
Á aðventunni opna jólaskógar
skógræktarfélaganna í landinu
fyrir þeim sem vilja sækja sér
sjálfir jólatré og styrkja í leiðinni
starf þeirra. Opið er hjá flestum
félögum allar aðventuhelgarnar.
Talið er að fyrir hvert keypt
jólatré sé hægt að gróðursetja
önnur 50.
Stafafuran er langvinsælasta
innlenda jólatréð, en þar á eftir
koma sitkagreni og rauðgreni – en
árið 1993 var það vinsælasta tréð.
Í Heiðmörk, við Elliðavatnsbæinn,
hefur Skógræktarfélag Reykjavíkur
um árabil staðið fyrir viðburðaríkri
dagskrá á aðventunni. Jólamarkaður
er haldinn í Elliðavatnsbænum og
jólatrjáasala er úti við á sérstöku
jólatorgi þar sem hægt verður að
njóta jólastemningar.
Barnastund hvern opnunardag
Í Rjóðrinu, rétt við Elliða vatnsbæinn,
verður Barna stund hvern opnunar­
dag klukkan 14.
Frekari upplýsingar um opnunar­
tíma jólaskóganna má finna á vef
Skógræktarfélags Íslands, skog.is.
/smh
Jólastemning við Elliða vatns bæinn
í Heiðmörk. Mynd / smh
Stefnir í takmarkanir
á veiðum grágæsa
Þar sem fjöldi skráðra grágæsa á
talningastöðum á Bretlandseyjum
er 30% færri en fyrir áratug
er sjálfkrafa virkjuð alfriðun á
stofninum vegna aðildar Íslands
að alþjóðasamningi um verndun
farfugla, nema ráðuneytið bregðist
við.
Talningar benda til að grágæs hafi
fækkað um 18% á Íslandi á tímabilinu
2020­2021.
Á meðan heimsfaraldurinn
stóð sem hæst var ekki hægt að
sinna stofntalningu fuglanna á
Bretlandseyjum með fullnægjandi
hætti, samkvæmt Áka Ármanni
Jónssyni, formanni Skotveiðifélags
Íslands.
AEWA samningurinn um verndun
afrísk­evrasískra sjó­ og vatnafugla
nær til fjölda fuglategunda sem verpa
og hafa áningastaði á Íslandi. Samtals
eru 82 ríki, þar með talið Ísland, búin
að lögfesta samkomulagið.
Áki Ármann segir að tölum um
samdrátt stofnsins beri að taka með
fyrirvara og séu þrjú lykilatriði
sem spili þar inn í. Í fyrsta lagi var
stofninn í hæstu hæðum fyrir áratug
síðan – ef stofntölur væru skoðaðar
lengra aftur í tímann myndi sjást
að fjöldi fugla er nokkuð stöðugur.
Í öðru lagi var talning í lamasessi
á Bretlandseyjum á árunum 2020­
2021 vegna útgöngubanns á tímum
heimsfaraldursins og tölur fyrir árið
í ár hafa enn ekki borist.
Í þriðja lagi hafa gæsirnar dvalið
lengur hér á landi vegna góðra hausta,
sem hefur gert talningaraðilum
erlendis erfiðara fyrir að skilgreina
hvaða fuglar eru hluti af breska
stofninum og hverjir áttu viðkomu
á Íslandi. Eftir að lægri stofntölur
bárust að utan var talið að ofveiði ætti
sér stað á Íslandi. Skotveiðifélagið
fór sérstaklega yfir veiðitölurnar
innanlands og var ekkert athugavert
í þeim að finna.
Umhverfis­, orku­ og loftslags­
ráðuneytið fer með framkvæmd
AEWA samningsins á Íslandi.
Samkvæmt svörum þaðan er líklegt
að farið verði í aðgerðir sem miða að
sjálfbærum veiðum, eins og styttingu
veiðitímabils og takmarkanir á sölu.
Hér á landi mun ráðuneytið ásamt
Náttúrufræðistofnun Íslands og
Umhverfistofnun annast verkefnið og
verður haft samráð við Bændasamtök
Íslands, Skotvís, Fuglavernd og
Samband íslenskra sveitarfélaga í
samræmi við lögin um vernd, friðun
og veiðar á villtum fuglum og villtum
spendýrum og mögulega fleiri aðila.
Útfærsla og tímasetning er óljós á
þessari stundu. Ekki er reiknað með
að grágæsin verði alfriðuð. /ÁL
Hugsanlegt er að takmarkanir verði gerðar á veiðum á grágæs frá og með
áramótum, þar sem Ísland er aðili að alþjóðlegum samningi um verndun
sjó- og vatnafugla. Mynd / Óskar Andri