Bændablaðið - 01.12.2022, Síða 15

15Bændablaðið | Fimmtudagur 1. desember 2022
Mikil aukning
í stangveiði
Hafrannsóknastofnun hefur birt
bráðabirgðatölur fyrir stangveiðar
á laxi sumarið 2022.
Samkvæmt tölunum var heildar­
fjöldi stangveiddra laxa árið 2022
um 45.300 fiskar, sem er um 24,2 %
aukning frá árinu 2021 og um 8,5%
yfir meðalveiði áranna frá 1974.
Heildarfjöldi stangveiddra laxa
í íslenskum ám sumarið 2022 var
um 45.300 fiskar, sem er um 8.800
fleiri laxar en veiddust sumarið
2021. Aukningin milli ára var því
um 24,1% og var veiðin í sumar
um 8,5% yfir meðalveiði áranna
frá 1974­2021. Ef veiðin er skoðuð
eftir landshlutum, þá var veiðin í
þeim öllum meiri en sumarið 2021,
nema á Vestfjörðum.
Gönguseiðaslepping viðbót við
náttúrulega framleiðslu
Á heimasíðu Hafrannsókna­
stofnunar segir að við samanburð
á langtímaþróun á stangveiði þurfi
að taka tillit til þess að laxar úr
gönguseiðasleppingum séu viðbót
við náttúrulega framleiðslu ánna,
auk þess sem sumir fiskar veiðast
oftar en einu sinni þegar veitt og
sleppt er í stangveiði. Laxveiðinni
er því skipt upp í laxa af villtum
uppruna, laxar sem upprunnir eru
úr sleppingum gönguseiða og laxar
sem er sleppt aftur í stangveiði, veitt
og sleppt.
Veiði á villtum laxi hefur síðustu
sjö ár verið undir langtímameðaltali,
1974 til 2021, með lágmarki árið
2019 þegar aðeins veiddust 24.078
laxar. Laxveiði í ám sem byggja
veiði á sleppingum gönguseiða var
alls um 10.500 laxar sumarið 2022,
sem er ríflega 2.700 löxum meira
en veiddist 2021, þegar 7.764 laxar
veiddust.
Veiði á villtum laxi
Þegar litið er til veiða á villtum laxi
eingöngu, ekki úr seiðasleppingum,
og leiðrétt hefur verið með tilliti til
endurveiði laxa vegna veiða og
sleppa, var heildarstangveiði villtra
laxa árið 2022 um 27.800 laxar, sem
er um 21,7% aukning frá 2021 og
18,6% undir meðaltali frá 1974.
Fjöldi þeirra laxa sem ganga
í ár er annars vegar háður fjölda
seiða sem ganga úr ánum til sjávar
og hins vegar hversu margir lifa
sjávardvölina af og skila sér til baka
í árnar. Almennt hefur dánartala
laxa í sjó í Norður­Atlantshafi farið
vaxandi, en ástæður þess eru ekki
þekktar. Bent hefur verið á þætti eins
og loftslagsbreytingar, meðaflaveiði,
áhrif fiskeldis og breytingar á
búsvæðum í fersku vatni. /VH
Stangveiði á laxi í íslenskum ám frá 1974 - 2022. Veiðinni er skipt í landaðan
afla og veitt og sleppt, annars vegar fyrir villtan lax og hins vegar fyrir
hafbeitarlax. Tölur frá 2022 eru bráðabirgðatölur. Lárétt brotalína er árleg
meðallaxveiði áranna 1974-2022, blátt er afli á villtum laxi, grænt er villtur
lax sem er sleppt, rautt er afli á hafbeitarlaxi og fjólublátt er hafbeitarlax sem
er sleppt. Mynd / Hafrannsóknastofnun
bbl.is
Vilja hesthúsalóðir sem fyrst
Petra Kristín Kristinsdóttir,
formaður Hestamannafélagsins
Sindra, hefur skrifað sveitarstjórn
Mýrdalshrepps erindi fyrir hönd
félagsins þar sem kallað er eftir
því að drifið verði í að auglýsa lóðir
undir hesthús í Vík.
Hún gerir um leið athugasemd við
hversu seint gengur að klára málið og
auglýsa lóðir.
Í erindinu segir hún að það sé farið
að þrengjast verulega að þeim sem
nýta hesthúsið í þorpinu. Erfitt sé að
komast að og frá aðstöðunni á reiðveg
vegna fjölda ferðamanna, bæði á
bílum og gangandi vegfarenda.
Þrjú hús fyrir 155
félagsmenn
Svæði Hestamanna­
félagsins Sindra nær
frá Álftaveri í austri og
að Markarfljóti í vestri.
Um 155 félagsmenn
eru skráðir í Sindra
en hesthúsin í Vík eru
aðeins þrjú talsins og
þar af hýsir eitt þeirra hestaleigu
eingöngu. „Einnig eru þau sem eiga
hesthús næst sjónum orðin uggandi
vegna ágangs sjávar þar. Það er
því von okkar að Mýrdalshreppur
drífi í að klára málin og
auglýsa lóðir, sem allra
fyrst svo hægt sé að
fara að nýta þetta svæði
og svo í framhaldinu
fara að vinna í að gera
reiðvöll og vonandi
reiðhöll þegar frá líður,
því það stendur okkur
fyrir þrifum að hafa ekki
almennilega aðstöðu í
sveitarfélaginu,“ segir Petra Kristín.
Sveitarstjórn þakkaði fyrir erindið á
síðasta fundi sínum og fól skipulags­
og byggingarfulltrúa að auglýsa
lóðir þegar hægt er. /MHH
Petra Kristín og Stormur
frá Ytri-Sólheimum.