Gátt - 2014, Qupperneq 15

15
F r Æ Ð s L U M i Ð s t Ö Ð A t V i N N U L Í F s i N s
g á t t – á r s r i t – 2 0 1 4
Símenntunarmiðstöð Vesturlands undirbýr nú raunfærnimat
fyrir félagsliða- og leikskólaliða- og stuðningsfulltrúabraut
og mun 45 einstaklingum í Norðvesturkjördæmi gefast
kostur á að taka þátt í matinu. Þessu til viðbótar er fólk hvatt
til að kynna sér raunfærnimat í iðngreinum á vegum Iðunnar.
Í árslok er stefnt að því að 120 einstaklingar hafi fengið
færni sína metna til eininga og eigi þannig kost á að ljúka
námi á skemmri tíma en ella. Í því felst mikil hvatning fyrir
fólk til að halda áfram námi og ljúka því sem það er byrjað á.
Fræðsluerindrekstur
Á vegum símenntunarmiðstöðvanna hefur fræðsluerind-
rekstur verið aukinn með því að fjölga heimsóknum til fyrir-
tækja þar sem fjölbreytt námsframboð er kynnt og starfs-
tengdu námi komið á fót í samræmi við þarfir fyrirtækjanna
og óskir stjórnenda og starfsfólks. Þegar ríflega átta mán-
uðum af líftíma verkefnisins er lokið er búið að heimsækja
að minnsta kosti 175 fyrirtæki og stofnanir og koma á um 50
námskeiðum með ríflega 500 þátttakendum.
Nokkur fyrirtæki hafa bæst í hóp þeirra sem fá fræðslu-
stjóra að láni sem greinir markvisst þarfir fyrir fræðslu innan
fyrirtækjanna og útbýr í kjölfarið fræðsluáætlun sem hægt
er að byggja á til framtíðar. Fyrirtæki og stofnanir geta sótt
um styrki til að kosta ráðgjöfina og ávinningurinn er umtals-
verður. Haldin hafa verið fjölmörg námskeið hjá fyrirtækjum
og stofnunum, svo sem lyftaranámskeið, skyndihjálparnám-
skeið, tölvunámskeið, íslenskunámskeið fyrir útlendinga,
starfstengd námskeið fyrir aðila í ferðaþjónustu og svo mætti
áfram telja. Fjölmörg sérsniðin námskeið fyrir fyrirtæki og
stofnanir eru auk þess í undirbúningi.
Íslenskukennsla fyrir innflytjendur
Einn liður í tilraunaverkefninu er að standa fyrir ráðstefnu um
bestu leiðir í íslenskukennslu í samvinnu við Menntun núna
í Breiðholti í Reykjavík. Fjölmenningarsetur tók einnig þátt í
undirbúningi ráðstefnanna. Tvær ráðstefnur voru haldnar í
október 2014. Sú fyrri fór fram á Ísafirði og sú seinni í Gerðu-
bergi í Breiðholti. Báðar voru ráðstefnurnar vel sóttar og voru
þátttakendur alls 120.
Markmið ráðstefnanna var að kynna ólíkar kennsluað-
ferðir sem þróaðar hafa verið undanfarin ár við íslensku-
kennslu og kynna sömuleiðis áhrifaríkar aðferðir til að efla
þátttöku innflytjenda í samfélaginu. Menntamálaráðherra,
innanríkisráðherra og félagsmálaráðherra voru á meðal fjöl-
margra framsögumanna. Nýleg stefnumótun Innflytjenda-
ráðs var meðal annars kynnt til sögunnar og sagt var frá
reynslu fólks af því að flytja til landsins og læra tungumálið.
Í tengslum við Menntun núna í Norðvesturkjördæmi
verða haldin starfstengd íslenskunámskeið með túlki til
að auðvelda þátttakendum að læra tungumálið og öðlast
þjálfun í málinu á vinnustaðnum.
Samstarf fræðsluaðila
Eitt meginmarkmið tilraunaverkefnisins er að auka samstarf
atvinnulífs og fræðsluaðila í kjördæminu um starfstengt
nám. Fyrir tilstuðlan verkefnisins hafa orðið til nokkur ný
samstarfsverkefni sem efla námsframboð framhaldsskólanna
í héraði. Samstarf Fjölbrautaskóla Norðurlands vestra (FNV),
Farskólans og Fisktækniskólans hefur leitt til nýrrar náms-
brautar í fisktækni við FNV sem nú er boðið upp á í fyrsta
sinn. Við Menntaskólann á Ísafirði er hafið nám í skipstjórn í
tengslum við raunfærnimat í skipstjórn sem Fræðslumiðstöð
Vestfjarða skipuleggur. Við Menntaskóla Borgarfjarðar hefur
verið boðið upp á þjónustunámskeið fyrir fólk sem vinnur við
framlínustörf í verslun og þjónustu og hafa nemendur skól-
ans getað sótt námskeiðið sem hluta af sínu námi. Við Fjöl-
brautaskóla Vesturlands á Akranesi hefur aðsókn að iðnnámi
aukist umtalsvert og má rekja þá aukningu að einhverju leyti
til starfa fræðsluerindreka á Vesturlandi sem einnig starfar
við skólann.
A Ð L o K U M
Að hækka menntunarstig er langtímaverkefni. Heildarár-
angur þessa tilraunaverkefnis verður því ekki metinn til
fulls fyrr en að nokkrum árum liðnum. Ljóst er að verkefnið
hefur leitt margt jákvætt af sér, svo sem aukna samvinnu
fræðsluaðila, bæði innan skólastiga og þvert á skólastig.
Vitundarvakning um raunfærnimat hefur orðið og tækifæri
fólks í dreifðum byggðum til að ljúka raunfærnimati hafa
aukist. Þekking á fjölbreyttum kennsluaðferðum við íslensku-
kennslu hefur aukist og íslenskukunnátta innflytjenda sem
hafa sótt námskeið mun að vonum aukast. Hinar fjölmörgu
heimsóknir fræðsluerindreka á vinnustaði hvetja starfsfólk
og stjórnendur til að huga betur að námi og nú þegar hefur
aðsókn að starfsmenntun aukist milli ára, þar á meðal í skip-
stjórnarnám, fisktækninám og fleiri námsgreinar. Samvinna
fræðsluaðila og atvinnulífs hefur eflst og mun vafalaust
halda áfram að styrkjast á næstu árum, atvinnulífi og íbúum
í kjördæminu til heilla.