Ársrit um starfsendurhæfingu - 2024, Page 18

SVO KOM
KJARKURINN
MAREN BRYNJA KRISTINSDÓTTIR
„Í BAKSÝNISSPEGLINUM SÉ ÉG AÐ UMSÓKN MÍN
UM ÞJÓNUSTU HJÁ VIRK ÁTTI SÉR TÖLUVERÐAN
AÐDRAGANDA,“ SEGIR MAREN BRYNJA KRISTINSDÓTTIR
ER VIÐ SITJUM SAMAN Í FALLEGRI STOFU HENNAR
Á FJÓRÐU HÆÐ Á SELTJARNARNESI. FYRIR
UTAN GLUGGANN BLASIR HAFIÐ VIÐ Í ÖLLUM
SÍNUM MARGBREYTILEIKA OG HIMININN ÞESSA
MORGUNSTUND ER BAÐAÐUR Í MORGUNSÓL EN FYRIR
MAREN BRYNJU VAR ÚTLITIÐ EKKI ALLTAF BJART ÞEGAR
HÚN GLÍMDI VIÐ KULNUN.
Fyrir mér er kulnun samspil margra
þátta. Þar spilar inn í starfið sjálft,
eiginleikar fólks, starfsandinn, umhverfið
í vinnunni, stjórnun og menningin hjá
fyrirtækinu – og svo auðvitað einkalífið. Allir
þessir þættir höfðu eitthvað að segja hjá
mér en mismikið. Ég hafði unnið tæplega
20 ár hjá sama fyrirtækinu, sem er stórt
og alþjóðlegt. Ég hafði verið í mismunandi
hlutverkum þessi ár. En síðustu árin áður en
ég veiktist var ég í mjög krefjandi verkefnum.
Ég hef alltaf verið staðsett á Íslandi en unnið
mikið í alþjóðlegum verkefnum, einkum
síðustu ár,“ segir Maren Brynja.
18 virk.is