Morgunblaðið - 12.04.2003, Side 71

ÍÞRÓTTIR
MORGUNBLAÐIÐ LAUGARDAGUR 12. APRÍL 2003 71
FÓLK
 ÓLAFUR Jóhannesson, þjálfari
knattspyrnuliðs FH, fékk að líta
rauða spjaldið þegar lið hans tapaði,
1:0, fyrir ÍBV í leik um 5. sætið í Can-
ela-bikarnum á Spáni í gær. Ólafur
átti þá orðaskipti við Braga Berg-
mann dómara sem vísaði honum burt
af varamannabekknum.
 VILHJÁLMUR H. Vilhjálmsson,
sem lengi lék með Þrótti R. og Fram,
var í gær úrskurðaður í þriggja leikja
bann í deildabikar KSÍ. Vilhjálmur,
sem nú leikur með Hvöt á Blönduósi,
var rekinn af velli gegn Magna um
síðustu helgi. Hann nær ekki að ljúka
banninu fyrr en á næsta ári því Hvöt
á aðeins tvo leiki eftir í keppninni í ár.
 ÁGÚST Þór Ágústsson og Harald-
ur Guðmundsson, knattspyrnumenn
úr Breiðabliki, æfa þessa dagana hjá
íslensk/enska félaginu Stoke City
ásamt tveimur yngri piltum úr félag-
inu. Þá eru tvær knattspyrnukonur
úr Breiðabliki, Bjarnveig Birgis-
dóttir og Elín Anna Steinarsdóttir, á
leið til æfinga hjá Fortuna Hjörring í
Danmörku.
 HÓLMAR Örn Rúnarsson skoraði
tvö mörk fyrir 1. deildarlið Keflavík-
ur sem vann úrvalsdeildarlið Fram,
3:2, í æfingaleik í Egilshöll í fyrra-
kvöld.
 ÚRVALSDEILDARLIÐ KA tapaði
í fimmta skipti í sex leikjum í deilda-
bikar KSÍ í gærkvöld, nú 0:3 fyrir 1.
deildarliði Stjörnunnar í Boganum á
Akureyri. Sautján ára piltur, Guðjón
Baldvinsson, skoraði eitt marka
Stjörnunnar og er hann markahæsti
leikmaður liðsins í deildabikarnum,
hefur skorað 3 af 7 mörkum þess.
 ÍSLENSKIR handknattleiksmenn
verða í sviðsljósinu í dag þegar leikið
verður í undanúrslitum þýsku bikar-
keppninnar í handknattleik í Ham-
borg. Patrekur Jóhannesson og
Guðjón Valur Sigurðsson verða með
Tusem Essen þegar liðið mætir Ein-
ar Erni Jónssyni og samherjum í
Wallau Massenheim.
 Í HINNI viðureign keppninnar
reyna liðsmenn Flensburg og Göpp-
ingen með sér. Úrslitaleikurinn fer
síðan fram á sunnudag og verður
hann einnig í Hamborg.
 BRESKU kylfingarnir Justin Rose
og Peter Baker mæta til leiks á Hval-
eyrina í Hafnarfirði 28. júlí nk. og etja
kappi við fremstu kylfinga landsins í
Canon PRO/AM 2003. Þetta er
fjórða sumarið í röð sem Canon og
Nýherji bjóða upp á þetta mót og fá
til landsins þekkta erlenda kylfinga í
fremstu röð í heiminum.
 BJÖRGVIN Sigurbergsson hafn-
aði í 25.-31. sæti af 125 keppendum á
úrtökumóti EuroProTour í golfi sem
lauk í Englandi í gær. Hann lék á 72
höggum í gær, einu yfir pari vallar-
ins, og samtals á 291 höggi, eða 10 yf-
ir pari. Á næstu dögum skýrist hvaða
keppnisrétt þessi frammistaða gefur
honum á mótum í vor og sumar.
KR sigraði Fylki, 3:2, í úrslitaleik Can-
ela-bikarsins sem fram fór í Canela á
Suður-Spáni síðdegis í gær. Að leik
loknum var Veigar Páll Gunnarsson úr
KR útnefndur besti leikmaður mótsins
en hann lék mjög vel í öllum þremur
leikjum KR-inga og skoraði í þeim
fjögur mörk.
Björn Viðar Ásbjörnsson kom Fylki
yfir strax á 2. mínútu. Seint í fyrri
hálfleik skoruðu Kristinn Hafliðason
og Veigar Páll fyrir KR með tveggja
mínútna millibili og Veigar bætti
þriðja markinu við snemma í síðari
hálfleik. Jón B. Hermannsson minnk-
aði muninn fyrir Fylki 10 mínútum fyr-
ir leikslok og Árbæingar sóttu nokkuð
á lokakaflanum en náðu ekki að jafna.
Grindvíkingar unnu nokkuð örugg-
an sigur á Skagamönnum, 3:0, í leik
um þriðja sætið en þar skoruðu Alfreð
Jóhannsson, Ray Anthony Jónsson og
Páll Guðmundsson mörkin á síðustu 25
mínútunum.
ÍBV vann FH, 1:0, í leik um fimmta
sætið. Allt stefndi í vítaspyrnukeppni
þegar Steingrímur Jóhannesson skor-
aði sigurmarkið með síðustu spyrnu
leiksins.
Afturelding vann Úrvalslið Úrvals-
Útsýnar, varamennina úr hinum lið-
unum, 7:6, í vítaspyrnukeppni eftir
markalaust jafntefli í leiknum um 7.
sætið.
„Þetta var mjög vel heppnað mót í
alla staði og ég tel engan vafa á að það
muni festa sig í sessi á næstu árum,“
sagði Eyjólfur Ólafsson, knatt-
spyrnudómari, við Morgunblaðið en
hann hafði umsjón með mótinu.
KR vann á Spáni og
Veigar maður mótsins
Í SEPTEMBER hófst forkeppni
Íslandsmóts karla í handknattleik
og henni lauk 30. mars. Á þriðju-
dag hófst úrslitakeppni, sem beðið
hefur verið eftir í allan vetur, og
fyrir þrjú lið, Þór, HK og FH, lauk
henni tveimur sólarhringum síðar
– í fyrrakvöld. Þá höfðu þessi félög
fengið einn heimaleik allt tímabilið
sem virkilega skipti máli. Hann
tapaðist, og nú tekur sumarfríið
við.
Þór fékk 250 áhorfendur á þenn-
an eina alvöru heimaleik sinn á Ís-
landsmótinu í vetur, HK fékk 320
og FH, gamla handboltastórveldið,
fékk 800. Varla eru gjaldkerar
þessara ágætu félaga ánægðir með
afraksturinn. Var það þess virði að
bíða allan veturinn eftir þessum
eina leik?
Svo virðist vera. Allt bendir til
þess að gjaldkerarnir og aðrir
fulltrúar félaganna muni rétta upp
hönd á ársþingi HSÍ þegar tillaga
um keppnisfyrirkomulag næsta
tímabils verður borin upp til at-
kvæða. Þar verður lagt til að spila
tvöfalda forkeppni í staðinn fyrir
einfalda og enda á nákvæmlega
sama hátt – með útsláttarkeppni
um Íslandsmeistaratitilinn.
Hvers konar sjálfseyðingar-
stefna er þetta? Hvers vegna eru
forráðamenn félaganna svona
blindir á það sem máli skiptir í
íþróttinni þar sem þeir eiga hags-
muna að gæta? Hvers vegna vilja
þeir halda áfram með marklitla
forkeppni í sjö mánuði og reyna
síðan að fá fólk til að mæta á leik-
ina (eða leikinn) sem máli skipta
þegar komnir eru páskar og grasið
farið að grænka?
Nei, „þjóðaríþróttin“ virðist
ætla að halda áfram á sömu villi-
götunum um ókomin ár. „Nýtt“
keppnisfyrirkomulag verður sam-
þykkt á ársþingi HSÍ. Úrslita-
keppninni, sem er að ganga af
íþróttinni dauðri, hægt og bítandi,
verður haldið gangandi með þeim
afleiðingum að næsta vetur verður
enn slegið met í fækkun áhorfenda.
Handknattleiksforystan þorir ekki
að stíga það eina skref sem getur
bjargað íþróttinni – að taka upp al-
vöru deildakeppni þar sem átta fé-
lög leika í 1. deild, spila fjórfalda
umferð og efsta liðið að henni lok-
inni er Íslandsmeistari. Þá myndu
allir leikir skipta máli og grund-
völlur væri fyrir því að fá áhorf-
endur á leikina allan veturinn og
um leið jafnt og þétt peninga-
streymi í kassann.
Næsta mál: Þegar loksins kom
að úrslitakeppninni langþráðu,
gátu menn ekki verið seinheppnari
með upphaf hennar. Fyrri leikir
átta liða úrslitanna voru leiknir
sama kvöld og stærsti leikur vetr-
arins í Meistaradeild Evrópu í
knattspyrnu, viðureign Real Madr-
id og Manchester United, og leik-
tíminn var meira að segja færður
fram, til kl. 19.15, eins og menn
vildu endilega að um árekstur yrði
að ræða. Þetta kvöld fékk KA, af
öllum liðum, aðeins 350 manns á
heimaleik í úrslitakeppni. „Síðan
trúi ég því ekki að KA-menn ætli
að horfa á Meistaradeildina í fót-
bolta á meðan við erum að reyna að
verja titilinn,“ sagði þjálfari KA á
heimasíðu félagsins eftir leikinn.
Jú, það gerðu reyndar margir
þeirra, sem og stuðningsmenn
annarra liða.
Og aðeins til að flétta samkeppn-
isíþróttinni, körfuboltanum, inn í
þessa umræðu: Þar eru menn líka
fastir í því fari að úrslitakeppni sé
það eina rétta. Ekki meira um það.
En afhverju í ósköpunum eru eng-
in samráð á milli þeirra sem ráða
ferðinni í þessum íþróttagreinum?
Hvers vegna er leikur sem getur
ráðið úrslitum um Íslandsmeist-
aratitil í körfubolta leikinn á sama
kvöldi og leikir í úrslitakeppninni í
handboltanum? Hvers vegna að
slást um athygli fjölmiðlanna þeg-
ar auðvelt hefði verið að dreifa
henni á tvö kvöld? Það var ekkert
um að vera í gærkvöld – þá hefði
verið tilvalið fyrir aðra hvora
íþróttina að vera með sína dagskrá
og njóta athyglinnar óskiptrar.
Víðir Sigurðsson
Var það
þess virði?
MHAIRI Gilmour, skosk landsliðskona í knatt-
spyrnu, er gengin til liðs við ÍBV. Hún kom til
móts við Eyjakonur á Spáni, þar sem þær
hafa dvalið í æfingabúðum í þessari viku, og
hefur gert fjögur mörk í tveimur leikjum í
ferðinni. Þar með verða tveir leikmenn
skoska landsliðsins í röðum ÍBV í sumar en
fyrir er Michelle Barr, sem hefur leikið með
liðinu undanfarin tvö ár og er komin aftur til
Eyja eftir vetrardvöl hjá Doncaster í Eng-
landi.
Gilmour, sem er 22 ára, leikur á miðjunni
og hefur spilað 30 landsleiki fyrir Skotland en
hún kemur frá Kilmarnock. Hún skoraði 2
mörk þegar ÍBV vann FH, 7:1, og gerði önnur
tvö í sigri Eyjakvenna á spænska úrvalsdeild-
arliðinu Deportivo Hispalis, 6:1. Þar gerði
Margrét Lára Viðarsdóttir einnig 2 mörk en
markadrottningin Olga Færseth skoraði
þrennu fyrir ÍBV í leiknum við FH.
Ný skosk skorar
grimmt fyrir ÍBV
JEROEN van Wetten, 23 ára hollenskur knatt-
spyrnumaður, verður til reynslu hjá Fröm-
urum næstu dagana. Þeir fara í dag til Farum
í Danmörku þar sem þeir dvelja í æfingabúð-
um til miðvikudags og van Wetten kemur til
móts við þá þar. Hann er á mála hjá hollenska
úrvalsdeildarliðinu Roosendaal og hefur skor-
að mikið fyrir varalið félagsins, en hefur að-
eins fengið tækifæri í tveimur leikjum með því
í úrvalsdeildinni í vetur. Til stóð að van Wett-
en kæmi til reynslu hjá ÍBV en ekkert varð af
því.
„Við ætlum að skoða þennan leikmann, sem
við vitum í sjálfu sér mjög lítið um. Okkur
vantar sóknarmann þar sem útlitið er ekki
gott með Þorbjörn Atla Sveinsson, sem hefur
ekki getað æft með okkur undanfarna sex
mánuði vegna meiðsla,“ sagði Brynjar Jóhann-
esson hjá meistaraflokksráði Fram við Morg-
unblaðið í gær.
Fram prófar
Hollending
ÓLAFUR Th. Árnason frá Ísafirði sigraði mjög örugglega í
göngu karla með frjálsri aðferð á Skíðamóti Íslands í Hlíðarfjalli
í gær. Það gerði Elsa Guðrún Jónsdóttir frá Ólafsfirði einnig og
þá sigraði Jakob Einar Jakobsson frá Önundarfirði í flokki pilta
17-19 ára en hann keppir fyrir Ísfirðinga. Karlarnir gengu 15
km, piltarnir 10 km og konurnar 5 km. Þau Ólafur Th., Elsa
Guðrún og Jakob Einar hafa öll titla að verja frá síðasta lands-
móti.
Ólafur sagði að aðstæður í Hlíðarfjalli hefðu verið hrikalegar,
„þetta var eins og að skíða í sykurkari þar sem verst var,“ sagði
Ólafur. Hann sagði að aðstæður hefðu verið heldur skárri ofar í
fjallinu. „Maður kemur alla vega til með að muna eftir þessu
landsmóti vegna aðstæðnanna,“ bætti Ólafur við og hann ætlar
sér sigur í keppni með hefðbundinni aðferð í dag.
Elsa Guðrún og Jakob Einar tóku undir með Ólafi og sögðu
aðstæður hafa verið erfiðar en bæði ætla þau sér sigur í göng-
unni í dag. „Þrátt fyrir erfiðar aðstæður hafa menn lagt hart að
sér og gert brautina eins góða og hægt er. Það er líka mun betra
að keppa við þessar aðstæður en að verða af landsmóti,“ sagði
Jakob Einar. Elsa Guðrún sagði að snjórinn hefði verið linur og
að ekki hefði verið hægt að skauta neðst í brautinni en að að-
stæður hefðu verið betri ofar í brautinni.
Ólafur Björnsson frá Ólafsfirði hafnaði í öðru sæti í göngu
karla en hann var dæmdur úr leik. Ólafur varð fyrir því að
brjóta annað skíðið sitt í brautinni og skipti um skíði en það
reyndist brot á reglum keppninnar. Annað sætið kom því í hlut
Magnúsar Eiríkssonar frá Siglufirði en hann er á 52. aldursári.
Magnús varð jafnframt Íslandsmeistari í flokki 50 ára og eldri og
Birgir Gunnarsson frá Sauðárkróki í flokki 35-49 ára. Athygli
vakti hversu fáir keppendur mættu til leiks, eða alls 13 í þessum
þremur flokkum.
Morgunblaðið/Kristján
Ólafur Th. Árnason, göngugarpur frá Ísafirði, skautar í brautinni í Hlíð-
arfjalli. Hann sigraði í 15 km göngu karla með frjálsri aðferð í gær.
„Þetta var eins
og að skíða
í sykurkari“
Aðstæður voru erfiðar í keppni í göngu á Skíðamóti Íslands í Hlíðarfjalli