Árbók Háskóla Íslands - 01.04.1967, Blaðsíða 13
11
hinnar íslenzku framkvæmdanefndar var prófessor Ólafur
Bjarnason. Ætla ég, að það sé næsta gildismikið fyrir Háskól-
ann að tengja slíkar ráðstefnur við skólann og eigi lítil land-
kynning að því að fá merka vísindamenn til landsins.
Heimspekideild stofnaði til námskeiðs í íslenzku hér í sumar
fyrir stúdenta, einkum frá Norðurlöndum. Þátttakendur voru
28. Dvöldust þeir um sex vikna skeið hér á landi og luku
prófi við námskeiðslok. Forstöðumaður námskeiðsins var Bald-
ur Jónsson lektor. Þessi námskeið eiga sér alllanga sögu, og
var fyrsta námskeiðið haldið fyrir forgöngu dr. Sigurðar Nor-
dals árið 1936. Eftir heimsstyrjöldina hafa námskeiðin verið
haldin nokkrum sinnum og með mismunandi hætti. Er nú feng-
inn fastur grundvöllur undir námskeið þessi, sem ætlunin er,
að haldin verði þriðja hvert ár hér á landi undir yfirstjórn
heimspekideildar. Hafa þau gegnt mikilsverðu hlutverki bæði
um kennslu í íslenzku svo og um að skapa tengsl milli þátt-
takenda innbyrðis og við land vort og fræðimenn hér á landi.
Kennarar á þessu námskeiði voru ýmsir kennarar í heimspeki-
deild, en nokkrir aðrir fræðimenn fluttu þar einstaka fyrir-
lestra.
Nýr búnaður, stólar og borð, hefir verið smíðaður í hátíða-
sal Háskólans, en eldri húsgögnin voru mjög úr sér gengin.
Eru hinir nýju stólar hreyfanlegir, en ekki festir í gólfið svo
sem hinir eldri voru. Hátíðasalur verður framvegis til ýmissa
nota. Á vetrum verður hann notaður sem lestrarsalur alla virka
daga, en þó verða þar fundahöld og fyrirlestrar o. fl., þegar
þörf krefur. 1 hátíðasal er lestraraðstaða fyrir 50—60 stúdenta.
Þá verður hátíðasalur einnig prófstofa til frambúðar. Eru
stóraukin not af hátíðasal miðað við það, sem áður var.
I málefnum háskólabókasafns hefir ýmislegt skipazt á betri
veg. Heimild hefir fengizt til ráðningar nýs starfsmanns, og
fjárveiting til safnsins hefir hækkað úr 400.000 kr. í 700.000
kr. samkvæmt fjárlagafrumvarpi, og er það hvorttveggja þakk-
arvert. Þá hafa verið settar fram tillögur um ráðningu nýs
bókavarðar, sem ætlunin er, að fáist einkum við allsherjar-
skráningu fræðirita, sem til eru hér á landi. Hefir lengi verið