Morgunn - 01.12.1969, Blaðsíða 39

MORGUNN
121
skapaðan hlut að flytja slíka jólahugleiðingu nú svona löngu
fyrir jólin. Það gerir ekki betur en að menn fáist til að hlusta
á þær á sjálfri hátíðinni, hjá okkar ágætu sóknarprestum.
Og hvaða von er þá til þess, að þið viljið hlusta á slíkan lestur
hjá mér nú, gömlum presti, sem löngu er hættur störfum.
Auk þess er ég svo gamaldags í hugsun, að ég kann alls ekki
við að flytja prédikun í danssal.
Eins og ég sagði áðan, hef ég alla tíð verið töluvert veikur
fyrir konum. Ég skammast mín ekkert fyrir að játa það. Ég
held, að það séu fleiri karlmenn en ég með því marki brennd-
ir. Mér finnst jafnvel mega lesa það út úr frásögn sjálfrar
Ritningarinnar, að svo hafi verið um ættföður okkar allra
— Adam. Það er að minnsta kosti ekki getið um það, að hann
hafi verið neitt sérstaklega sæll og ánægður í allsnægtunum
austur í Eden á meðan hann var þar einsamall. Hafði hann
þó nóg af öllu, og hvorki var þar dýrtíð né verðbólga til þess
að hrella hann.
Annars verð ég að játa það, þó ég sé prestur, að ég hef
aldrei getað trúað sköpunarsögunni bókstaflega. Ég fæ með
engu móti skilið, að Guði hafi nokkurn tíma geta dottið það
í hug í alvöru, að þessi veröld gæti komizt af án konunnar,
eða getað ætlazt til þess af Adam, að hann yndi sér í aldin-
garðinum kvenmannslaus ár eftir ár eða jafnvel til eilífðar.
Og ætli hún væri ekki líka anzi stutt enn í dag ættartalan
frá Adam, ef Evu hefði ekki notið þar við? En Ritningin
segir, að Guð hafi líka fljótlega sansað sig á því, að það er
ekki gott, að maðurinn sé einsamall. Það hlaut líka að vera.
Hins vegar er ég ekki öldungis viss um það, að hann hafi
skapað konuna úr rifi mannsins í bókstaflegum skilningi.
En sé það rétt, þá hefur það áreiðanlega verið langbezta rif-
ið í skrokknum á honum, og að minnsta kosti hefur verið
feitast á því rifi.
Evu er að vísu borið það á brýn, að hún hafi ekki varað
sig á höggorminum og fyrir vikið tælt Adam til syndar,
ginnt hann til að gjöra það, sem bannað var, og svo að segja
troðið upp í hann hinum forboðna ávexti. Af þessu hlauzt