Morgunblaðið - 10.06.2015, Qupperneq 38

38 FRÉTTIRInnlent
MORGUNBLAÐIÐ MIÐVIKUDAGUR 10. JÚNÍ 2015
VIÐTAL
Karl Eskil Pálsson
karlesp@simnet.is
„Fyrirtækið er orðið 26 ára, við
stofnuðum Mat og Mörk á þeim
fræga degi, bjórdeginum þann 1.
mars árið 1989. Fyrirtækið hefur
alltaf verið rekið á sömu kennitöl-
unni, enda hefur okkur gengið
ágætlega og starfsfólki hefur fjölg-
að verulega á þessum árum,“ segir
Bjarni Rúnar Sigurðsson fram-
kvæmdastjóri, sem á og rekur
matvælafyrirtækið Mat og Mörk á
Akureyri. Fyrirtækið framleiðir
meðal annars samlokur, langlokur,
pastarétti, pizzur, kjötbollur, fiski-
bollur, sósur og ýmis salöt, auk
þess sem rekin er vaxandi veislu-
þjónusta í fyrirtækinu.
„Tengdamóðir mín átti og rak
matvælafyrirtækið Mat og við
keyptum reksturinn af henni
ásamt tveimur öðrum fjölskyldum,
þannig hófst þetta allt saman. Á
sama tíma keyptum við líka sam-
lokugerðina Mörk, einnig hérna á
Akureyri og sameinuðum fyr-
irtækin undir nafninu Matur og
Mörk, þannig að það fór aug-
ljóslega ekki mikill tími í að finna
nafn á fyrirtækið. Stundum er ég
spurður um nafnið og þetta er sem
sagt skýringin, við skelltum ein-
faldlega saman nöfnunum á tveim-
ur fyrirtækjum, flóknara er það nú
ekki. Auðvitað vorum við í nokk-
urn tíma að ná tökum á rekstr-
inum, enda hálfgerðir nýgræðingar
í slíkum rekstri, en þetta hafðist
allt saman á tiltölulega skömmum
tíma og með aðstoð góðs fólks. Á
þessum árum var burðarásinn í
rekstrinum framleiðsla á sam-
lokum, pizzum og fiskibollum og í
dag eru samlokurnar nokkuð stór
hluti starfseminnar en aðrar vörur
hafa bæst við í gegn um tíðina.“
Samlokugerðin Mörk var í upp-
hafi til húsa við Glerárgötu og
starfsmenn voru í upphafi á bilinu
fjórir til fimm. Síðan var starfsem-
in flutt að Furuvöllum, en á þeim
tímapunkti var fyrirtækið Kjöt og
réttir keypt og framleiðsluvörur
fyrirtækisins bættust jafnframt
við.
„Í upphafi ársins 1999 keyptum
við núverandi húsnæði fyrirtækis-
ins, sem er við Frostagötu. Hús-
næðið var allt standsett þannig að
það stæðist ýtrustu kröfur í mat-
vælaiðnaði og nýja húsnæðið gerði
okkur jafnframt kleift að færa út
kvíarnar. Í byrjun 2002 bættist við
salatagerð Norðlenska og fimm ár-
um síðar keyptum við sósugerð
Búbótar á Húsavík. Þetta voru lítil
fyrirtæki, enda er það ekki á
stefnuskránni að stækka mikið í
einu, heldur viljum við sjá fyrir-
tækið dafna áfram sem hæfilega
lítið matvælafyrirtæki sem fram-
leiðir úrvals vöru og veitir góða
þjónustu.“
Bjarni segir að sumarið sé mesti
annatíminn og veðrið hafi áhrif á
söluna.
„Þegar við byrjuðum voru
rækju- og roastbeef-samlokur
langvinsælastar og núna aldar-
fjórðungi síðar er staða sú sama,
það er bara þannig. Grænmeti hef-
ur sótt í sig veðrið og við höfum
svarað þeirri eftirspurn með ýms-
um hætti. Yfir vetrartímann starfa
hérna á bilinu 12-14 manns, en á
sumrin eru starfsmenn mun fleiri,
enda er sumarið annasamasti árs-
tíminn. Fólk á ferðalögum kaupir
gjarnan samlokur og skyldar vörur
sem við framleiðum. Við finnum
líka fyrir auknum ferðamanna-
straumi, ferðafólki þykir þægilegt
að kaupa samlokur og salöt á
ferðalögum. Sumarið er sem sagt
okkar tími og veðrið getur líka
haft töluverð áhrif á söluna. Vöru-
flokkunum hefur fjölgað mikið á
þessum árum, enda höfum við
keypt upp þrjú fyrirtæki og bætt
við okkur þeirra vörum. Norður-
land er okkar helsta markaðs-
svæði, en á undanförnum árum
höfum við verið að fikra okkur inn
á höfuðborgarsvæðið með ýmsar
vörur sem hafa lengri líftíma, svo
sem pizzur, salöt og sósur.“
Hörð samkeppni
„Já, þetta er harður bransi, það
er ábyggilegt. Okkar keppikefli er
að vera með góða framleiðslu og
veita lipra og snögga þjónustu.
Sem betur fer hefur það tekist og
við eigum í viðskiptum við nánast
alla sölustaði hérna fyrir norðan
sem selja vörur eins og við erum
að framleiða. Við höfum verið ein-
staklega heppin með starfsfólk,
sem skiptir afskaplega miklu máli.
Sú sem hefur starfað lengst fyrir
utan mig, hefur verið hérna í um
tuttugu ár. Líklega er meðalstarfs-
aldurinn yfir tíu ár, sem segir sína
sögu. Við reynum eftir megni að
versla við norðlensk fyrirtæki,
enda er lykilatriði í svona rekstri
að vera með ferskt og nýtt hráefni.
Megnið af ferskvörunni fáum við
frá fyrirtækjum á Eyjafjarðar-
svæðinu, þannig að við getum
nokkuð auðveldlega uppfyllt óskir
viðskiptavinanna um ferskleika,“
segir Bjarni.
Hann segir að salan hafi ekki
dregist saman í kjölfar efnahags-
hrunsins. Hins vegar hafi öll að-
föng hækkað nánast á einum degi,
sem ekki hafi verið hægt að setja
út í verðlagið á einu bretti.
„Bankahrunið hafði þess vegna
umtalsverð áhrif og reksturinn gaf
ekki mikið af sér í langan tíma í
kjölfarið, en þetta hafðist allt sam-
an.“
Rækjusamlokan vinsælust
„Nei, rækjusalatið er nánast
eins og það var fyrir 26 árum, það
hafa ekki verið gerðar miklar
breytingar á uppskriftinni og við
komum ekki til með að breyta
henni á meðan rækjusamlokan er
svona vinsæl. Svipaða sögu er að
segja um roastbeef-samlokuna,
uppskriftin er nánast sú sama. Það
skiptir ekki máli hvort um er að
ræða Raufarhöfn, Akureyri eða
Hvammstanga, þessar samlokur
eru yfirleitt alltaf efstar á vinsæld-
arlistanum. Og rækjusalatið er vin-
sælast af þeim fjölmörgu brauð-
salötum sem við framleiðum,
þannig að rækjan virðist falla
landanum afskaplega vel í geð. Ég
hef svo sem enga skýringu á þess-
um vinsældum rækjunnar ár eftir
ár og áratug eftir áratug. En
svona er þetta og þá er bara að
svara eftirspurninni með góðu hrá-
efni. Ég held að rækjusamlokan
komi til með að halda velli áfram,
rétt eins og Prins Pólóið.“
Veðrið hefur áhrif
á viðskiptin
„Já, já, veðrið hefur mikil áhrif á
söluna á sumrin. Við framleiðum
ýmsar tegundir af grillsósum og
salötum og ef veðurspáin er góð,
verðum við þess strax vör í aukn-
um pöntunum frá söluaðilum. Ef
langtímaspáin fyrir næstu helgi
lofar góðu, þurfum við að taka tillit
til þess, það gengur ekki að eiga
ekki til sósur og salöt á lager, þeg-
ar allir vilja fá tvöfaldan skammt.
Ef kalt er hins vegar í veðri, selj-
ast grillsósurnar ekki eins vel.“
Þegar framkvæmdastjórinn er
spurður um uppháhaldssamlokuna
sína, er hann ekki lengi að svara:
„Eigum við ekki að segja að
kalkúnalangloka sé í upphafi, mér
þykir hún afskaplega góð og sjálf-
sagt er maður búinn að sporð-
renna nokkrum slíkum í gegnum
tíðina,“ segir Bjarni Rúnar Sig-
urðsson að endingu.
Hrásalat Megnið af ferskvörunni kemur frá fyrirtækjum á Eyfjafjaðarsvæðinu.
Ljósmyndir/Karl Eskil Pálsson
Veðurspáin Ef veðurspáin gerir ráð fyrir góðu veðri, þarf að taka tillit til þess í framleiðslunni.
Rækjusamlokan heldur alltaf velli
 Sumarið er mesti annatíminn hjá Mat og Mörk á Akureyri  Ferskt hráefni lykillinn að starfsem-
inni  Kalkúnalangloka í uppáhaldi hjá framkvæmdastjóranum  Veðrið hefur áhrif á framleiðslu
Hæfilega lítið Ekki ætlunin að stækka fyrirtækið mikið í einu, segir Bjarni Rúnar Sigurðsson, framkvæmdastjóri.
sími 553 9990
nutima@nutima.is
Opið frá 10-17 virka daga www.nutima.is
5ára
ábyrgð