Són - 01.01.2004, Page 81

ÁFANGAR II 81
2.3.4 Gustaf Fröding og Sigurjón Friðjónsson
Sænska skáldið Gustaf Fröding hafði talsverð áhrif á Íslandi og ljóð
hans mörg voru þýdd. Eftir Fröding er vormorgunljóð og er þetta
upphafið:12
Vårens vindar äro ljuva,
glädjens vemod milt de tala
till en själ, som sörjt sig sjuk,
livets vårfröjd kuttrar duva,
kvittrar gråsparv, visslar svala
gungar björkens krona mjuk.
Þessa sekvensu (sjá um sekvensur síðar) þýðir Sigurjón Friðjónsson
og birtir undir nafninu „Vormorgunn“ í Heyrði ég í hamrinum en hleypir
þar að forliðum auk þess sem ekki verður sagt að hann nái því
hljómaspili vorsins sem Fröding sýnir svo listilega:13
Mjúkt og viðkvæmt vorið talar,
vermir barn í kjöltu þagnar,
er sært og þreytt af sorgum er.
Um ást og fegurð erla hjalar,
og í runni þröstur fagnar;
við blæ í limi leikur sér.
2.4 Frumort
2.4.1 Brynjúlfur Jónsson frá Minna-Núpi og Valdimar Briem
Brynjúlfur Jónsson frá Minna-Núpi virðist næstur á eftir Matthíasi
Jochumssyni til að nota þetta rím í ljóðinu „„Fellur mitt forlagatjald““
sem birtist í bókinni Kvæði:14
Fellur mitt forlaga-tjald;
fer jeg úr mannanna heimi
mig þegar varir það minnst.
Á jeg ei ævinnar vald;
ókomni tíminn hvað geymi,
engum að uppgötva vinnst.
12 Fröding (1957:266)
13 Sigurjón Friðjónsson (1940:51).
14 Brynjólfur Jónsson frá Minna-Núpi (1889:63).