Gerðir kirkjuþings - 2009, Síða 40

40
Allsherjarnefnd lítur svo á að skapa þurfi kirkjunni á Þingvöllum traustan grundvöll
með samkomulagi við ríkið með starfsreglum frá kirkjuþingi og tryggja henni bæði
stöðu sóknarkirkju og helgidóms þjóðarinnar.

Allsherjarnefnd bendir á að þrátt fyrir margvíslega erfiðleika íslensku þjóðarinnar í
kjölfar efnahagshrunsins haustið 2008, þá hefur verið unnið gott starf víða um land.
Þjóðkirkjan hefur verið virkur samstarfsaðili á þeim vettvangi sem ein af grund-
vallarstofnunum samfélagsins. Mikilvægt er að kirkjan boði áfram bjartsýni og von
meðal þjóðarinnar og sé ávallt boðin til þjónustu. Víða eru sóknarfæri sem kirkjan
þarf að huga að og efla þannig starf sitt landi og lýð til blessunar.

Hjálparstarf kirkjunnar
Á kirkjuþingi 2009 var kynning á starfi og stefnu Hjálparstarfs kirkjunnar.
Allsherjarnefnd fagnar því góða starfi sem Hjálparstarf kirkjunnar vinnur og vakið
hefur verðskuldaða athygli. Engu að síður þarf að efla hjálparstarf bæði innan lands
og utan, því ávallt er þörf á því að rétta þeim hjálparhönd sem minna mega sín og eru í
erfiðleikum og neyð. Æ fleiri söfnuðir landsins tengjast Hjálparstarfinu beint með
föstum fjárframlögum eða styrkja starfið á annan hátt og ber að þakka það.
Hjálparstarf er hluti af safnaðarstarfi og því er stefnt að því að allir söfnuðir
þjóðkirkjunnar komi með einum eða öðrum hætti að starfinu. Mikilvægt er að fulltrúar
safnaðanna í Hjálparstarfinu kynni það í sóknum og á héraðsfundum. Þakka ber þeim
fjölmörgu einstaklingum sem leggja Hjálparstarfinu lið, og sýna þar með þann
kærleika í verki sem Jesús Kristur vitnar um. Hjálparstarfið er unnið af kærleika og
gleði og er til blessunar á margvíslegan hátt, bæði heima og erlendis. Einnig er bent á
mikilvægi Sambands íslenskra kristniboðsfélaga sem hefur unnið lofsvert kristniboðs-
og hjálparstarf um 80 ára skeið.