Gerðir kirkjuþings - 2009, Qupperneq 91

91
12. gr. Fasteignanefnd ásamt viðkomandi presti fer með málefni prestsseturs og
almennt fyrirsvar þeirra. Nefndin fer með stjórn prestssetursjarða gagnvart prestum á
prestssetursjörðum samkvæmt ábúðalögum eftir því sem við getur átt og gegnir
hlutverki leigusala gagnvart presti í prestsbústað með þeim afbrigðum sem leiðir af
sérstöðu prestssetra.
Fasteignanefnd setur prestum haldsbréf vegna afnota þeirra af prestssetrum. Skal það
liggja fyrir þegar prestsembætti er auglýst.
Fasteignanefnd gerir leigusamninga vegna prestssetra, hluta prestssetra eða réttinda,
sem þeim tilheyra, aðra en þá sem prestum er heimilt að gera skv. ákvæðum
haldsbréfa.

13. gr. Prestur hefur varðveisluskyldu gagnvart prestssetri, sem hann situr, enda þótt
hann njóti ekki allra hluta þess.
Prestur skal gera fasteignanefnd þjóðkirkjunnar og prófasti viðvart án tafar ef hann
telur að hlunnindi, ítök, greiðslumark, gæði eða réttindi prestssetursjarðar séu illa nýtt,
vanrækt eða hætta á að þau gangi undan.
Um eftirlitsskyldu prófasta fer eftir ákvæðum gildandi starfsreglna um prófasta hverju
sinni.

14. gr. Prestssetur skal ávallt tekið út við viðtöku og skil prests á því.
Prestur á rétt á úttekt er hann tekur við prestssetri eða ef verulegar endurbætur hafa
farið fram á prestsbústað eða ef hann tekur við hluta prestsseturs sem hann hefur ekki
haft til umráða áður.
Við úttekt prestssetursjarða skal fylgja ákvæðum ábúðalaga eftir því sem við á.
Kostnaður, vegna úttektarmanna þ.e. ferðakostnaður og vinna, skal greiddur af
kirkjumálasjóði og presti.

15. gr. Prestur hefur öll lögmæt og eðlileg afnot prestsseturs meðan hann gegnir
embætti samkvæmt haldsbréfi og gildandi starfsreglum hverju sinni. Prestur hefur
umsjón með prestssetri og nýtur arðs og hlunninda samkv. ákvæðum í haldsbréfi.
Prestur getur eigi ráðstafað prestssetri eða réttindum sem því tengjast, þannig að það
bindi kirkjumálasjóð og/eða þannig að ráðstöfun gildi lengur en hann gegnir embætti
sínu, án samþykkis fasteignanefndar og annarra lögmæltra aðilja hverju sinni.
Prestur getur ekki, án samþykkis fasteignanefndar, ráðstafað prestssetri nema í
samræmi við eðlileg og hefðbundin not þess.
Alla samninga, sem fela í sér varanlega skerðingu eða breytingu á prestssetri, ásýnd
þess - eða viðbætur við prestssetrið - gerir fasteignanefnd, svo og löggerninga vegna
réttinda sem undanskilin kunna að vera afnotarétti prests.

16. gr. Presti er heimilt, með samþykki fasteignanefndar, að leigja prestssetur að hluta
eða í heild, þriðja aðila um skamma hríð, t.d. meðan prestur er í leyfi.
Prestur í leyfi ber hvorki ábyrgð á né ber hann kostnað af prestssetri að hluta eða í
heild ef afleysingaprestur fær það til afnota og leigu samkvæmt samningi við
fasteignanefnd.

17. gr. Að fengnu skriflegu leyfi sviðsstjóra fasteignasviðs hefur prestur umsjón með
og kostar minniháttar lagfæringar á prestssetri umfram það sem presti er skylt skv.
gildandi lögum hverju sinni.