Skírnir - 01.04.2017, Blaðsíða 253

253landaparís fyrir augu
gera þar stóra mynd í kaffistofu, því á framkvæmdina er ekki minnst
í helsta blaði landsmanna, Morgunblaðinu, gjörvallt árið 1957. Ekki
vitum við heldur hvenær og hvers vegna myndin var fjarlægð, nema
að hún er horfin árið 1964 þegar Jón Thors lögfræðingur hóf störf
í Arnarhváli sem fulltrúi í dómsmálaráðuneytinu (Jón Thors 2017).
Sú aðgerð hefur ekki heldur þótt fréttnæm því dagblöðin geta
hennar að engu.
Þangað til annað kemur í ljós ætla ég að giska á að byrjað hafi
verið á því að leggja korkflísar á gólf kaffistofunnar; það virðist
a.m.k. mega ráða af ljósmyndum sem Andrés Kolbeinsson tók
meðan Hörður var þar að störfum og eftir að verkið var leitt til
lykta. Ég tel líka einsýnt að frumkvæðið að því að nota flísarnar
einnig til veggmyndagerðar hafi komið frá Herði sjálfum, ekki emb-
ætti húsameistara. Að vísu kann embættið að hafa horft til hag-
kvæmninnar af því að nýta til verksins fyrirliggjandi birgðir af
ódýrum efniviði. Hins vegar var notkun á korkflísum til listsköp-
unar af þessari stærðargráðu nánast fordæmalaus á þessum tíma —
sá sem þetta skrifar þekkir ekki önnur sambærileg tilfelli — og því
er líklegast að frumkvæðið hafi verið listamannsins fremur en verk-
kaupandans. Við þetta má bæta að láréttar og lóðréttar korkflís-
arnar eru rökrétt framlenging á því staðlaða einingakerfi (tengt við
hugmyndir um „net“ eða „staðalmát“) sem Hörður beitti fyrir sig
í myndlist sinni og hönnun frá og með 1955, sjá t.d. svart-hvítu
teikningarnar í myndaflokknum Úr formsmiðju og kápurnar sem
hann gerði fyrir tímaritið Birting. Í þriðja lagi tel ég að Hörður hafi
á því stigi búið yfir ákveðinni reynslu af því að kompónera vegg-
myndir úr korkflísum.
Því er ekki að neita að nokkur ljón eru í vegi fyrir fullnægjandi
greiningu á veggmynd Harðar í kaffistofu Arnarhváls. Eins og áður
er getið er hún ekki lengur til og ljósmyndir af henni eru allar svart-
hvítar. Hörður lét eftir sig nokkrar forteikningar að tveimur vegg-
myndum sínum, Danslilju og Vorgleði, en drög að Arnarhváls -
myndinni hafa ekki komið í leitirnar. Því er ýmsum spurningum
varðandi hana, t.a.m. um litaval, enn ósvarað.
Ljósmyndir Andrésar Kolbeinssonar eru líka einu heimildirnar
sem við höfum um áætlaða stærð Arnarhválsmyndarinnar; af þeim
skírnir
Skírnir vor 2017.qxp_Layout 1 31.3.2017 13:24 Page 253