Strandapósturinn - 01.06.2012, Síða 7

7
Dagur eitt – 18. júní
Lagt var af stað frá Umferðarmiðstöðinni 18. júní kl. 9:00. Þar
komu flestir í rútuna en ein var tekin upp í Mosfellsbæ, þrír voru
teknir upp í við göngin og loks þau tvö síðustu í Borgarnesi.
Þá voru allir átján ferðafélagarnir mættir til leiks auk Steinda
bílstjóra.
Nú lá leið okkar norður í land. Við ókum Norðurárdalinn yfir
í Húnavatnssýslu þar sem tekinn var smá útúrdúr og farið að
skoða Kolugljúfur. Þar gekk hópurinn um og skoðaði fossinn á
meðan Brynja, Gurrý, Inga og Guðrún dekkuðu borð með hinu
marg fræga móakaffi sem var boðið upp á alla daga í þessari ferð
og gerði jafnmikla lukku nú eins og undanfarin ár. Síðan var
haldið af stað með smá stoppi á Blönduósi því að ekki er
salernisaðstaða við Kolugljúfur. Svo varð hún Brynja að láta
stimpla í alla passana okkar sem hún fékk í Borgarnesi.
Næsta stopp var á Akureyri og þar gat fólk gengið um og skoðað
eða bara haft það eins og það vildi í tvo klukkutíma. Margt var að
sjá, t.d. voru „bíladagar“ þarna á þessum tíma og nýja Ráðhúsið er
mjög glæsilegt. Þá var komið að því að halda á hótelið okkar,
Skjaldarvík, þar sem hótelstýran, hún Dísa, tók vel á móti okkur.
Þar dvöldum við í góðu yfirlæti næstu þrjár nætur á þessum
heimilislega og notalega stað.
Guðrún Steingrímsdóttir formaður
Sumarferð
Átthagafélags
Strandamanna
2011
18.–22. júní