Litli Bergþór - 01.06.2022, Blaðsíða 57

Litli-Bergþór 57
Erlendur og Kristín giftu sig 1922
og bjuggu fyrst á Brekku. Sama dag
giftu sig Þorsteinn bróðir hennar
og Ágústa Jónsdóttir og hófu
búskap á Vatnsleysu, en sagt var
að Kristín hefði sett það skilyrði að
vildi Erlendur eiga sig myndi hann
flytja að Vatnsleysu. Árið 1927
fluttu þau allavega þangað og tóku
til ábúðar vesturhluta jarðarinnar
á móti Þorsteini og Ágústu, sem
bjuggu á austurhlutanum og áttu
fjölskyldurnar þar langt og gott
sambýli, sem varir enn.
Afi og amma eignuðust fimm börn
og lifðu fjögur til fullorðinsára:
Björn f. 1924, d. 2005, sem
lengi var bóndi í Skálholti, Ingu
Sigurlaugu (Sillu) f. 1926, d. 2012,
húsfreyju í Reykjavík, Jóhönnu
Ingveldi, f. 1927 sem dó á fyrsta ári, Sigurð föður
minn f. 1930, bónda og hreppstjóra á Vatnsleysu og
Magnús Gunnar f. 1932, d. 2013, lengi skrifstofumann
hjá Pósti og síma. Á eystri bænum urðu börn Þorsteins
og Ágústu níu talsins, öll á svipuðum aldri og pabbi
og hans systkini, svo það var oft kátt á hjalla í þessum
stóra frændsystkina hópi skilst mér.
Það má segja að hreppstjóra embættið hafi gengið í
ættir, því Erlendur afi varð hreppstjóri eftir Björn föður
sinn á Brekku og faðir minn Sigurður Erlendsson svo
hreppstjóri eftir hann. Varð hann sá síðasti sem gegndi
því starfsheiti hér í Tungunum, áður en embættið var
lagt niður um aldamótin síðustu.
Mér er minnisstætt hvað afi var góður í hugarreikningi.
Þegar hann þurfti að leggja saman talnabálka, renndi
hann fingri niður dálkinn og skrifaði svo niðurstöðuna.
Ég er hræddur um að það séu fáir nú til dags með svona
þjálfun í hugarreikningi, þó margir séu talnaglöggir
enn og muni ártöl og símanúmer. Í þá daga voru heldur
ekki til aðrar reiknivélar en hausinn.
Móðir mín Jóna Ólafsdóttir er fædd 1937, er ættuð af
Suðurnesjum og uppalin í Keflavík. Foreldrar hennar
voru Ólafur Bergsteinn Ólafsson f. 1911, d. 1976
og Guðlaug Einarsdóttir f. 1905, d. 1965. Systkini
hennar voru Sólveig (sammæðra) f. 1926, d, 2018,
Guðrún f. 1929, d. 2010, Bergþóra Hulda f. 1932, d.
1939, Lúlla María f. 1934, d. 2019, Ólafur Bergsteinn
f. 1940, d. 2014 og Bergþóra Hulda f. 1942, d. 2020.
Mamma var að uppvarta á Tryggvaskála þegar þau
pabbi kynntust. Hann skrapp inn til að fá sér kaffibolla
meðan verið var að gera við eitthvert tæki á verkstæði
og þar með voru örlögin ráðin. Hún fór eftir það á
húsmæðraskólann á Laugarvatni og þau faðir minn
giftust í framhaldi af því. Ég kom svo í heiminn
1956. Síðan snérist líf hennar um húsmóðurstörf
og barnauppeldi á stóru sveitaheimili. Það voru oft
margir við eldhúsborðið, mikil vinna við þvott og
þrif. Þegar við Ingibjörg byrjuðum að koma austur,
fannst Ingibjörgu ómögulegt að bæta fleirum við
eldhúsborðið hjá mömmu, svo ég bað foreldra mína
um landskika undir sumarbústað, sem varð svo okkar
sælureitur.
Við erum fimm systkinin, en auk mín eru það Kristín
(1958), Guðmundur (1962), Ásta Rut (1966) og Sylvía
(1976) og erum við nú öll búsett hér í Tungunum.
Eftir að börnin komust á legg vann mamma um tíma
í mötuneyti sláturhússins í Laugarási með Maju í
Skálholti og fleirum, en annars vann hún ekki utan
heimilis. Auðvitað voru það viðbrigði fyrir hana
þegar bærinn tæmdist, en sem betur fer eignuðust þau
Sylvíu nokkuð seint og Halla og Bragi eignuðust líka
Kristrúnu á svipuðum tíma, sem hleypti lífi í bæina.
Foreldrar mínir hafa búið alla sína búskapartíð á
Vatnsleysu og búa hér enn í sínu íbúðarhúsi og eru
bara þokkalega ern þrátt fyrir háan aldur. Þau stunduðu
áður blandaðan búskap með öllu sem því fylgir og
eftir að Gummi tók við búinu hefur pabbi haldið áfram
að létta undir, dytta að og snyrta. Þau tóku auðvitað
þátt í félagssörfum sveitarinnar, eins og kórstarfi
og leikfélagi og móðir mín starfaði í kvenfélaginu.
Fyrir utan hreppsstjórastörfin var faðir minn einnig í
hreppsnefnd um tíma og starfaði sem sláturhússtjóri
í Laugarási síðustu 10 árin sem slátrað var þar, 1978-
Landróverinn sómir sér vel fyrir framan nýja húsið. Sumarbústaðurinn í baksýn.
►