Litli Bergþór - 01.06.2022, Blaðsíða 34

34 Litli-Bergþór
Félagsmiðstöðin Zetor er samrekin félagsmiðstöð
fyrir nemendur í 8. – 10. bekk í Bláskógabyggð og
Grímsnes- og Grafningshreppi. Zetor nafnið kemur
að sjálfsögðu frá traktornum góða enda erum við
félagsmiðstöð í stórum sveitarfélögum og á stöðugu
flakki. Zetor er með aðild að Samfés (Youth Work
Iceland), sem eru landssamtök félagsmiðstöðva og
ungmennahúsa á Íslandi og eru frjáls félagasamtök.
Samfés heldur ýmsa viðburði yfir árið sem við í Zetor
getum sótt. Samfés er með heimasíðuna www.samfes.
is en þar má sjá allt um samtökin.
Zetor er með opið hús á fimmtudögum frá
19:30 – 22:00 og hefur aðsetur á Laugarvatni, í
Reykholti og á Borg. Það er óhætt að segja að starf
félagsmiðstöðvarinnar Zetors hafi þurft að vera með
öðru sniði á þessum sögulegum tímum, covid tímum.
Það þýðir þó ekki að starfið hafi legið alveg niðri,
síður en svo, enda mun ekkert breyta þeirri staðreynd
að við erum jú öll félagsverur og flest sækjum við í
félagsskap annarra. Við höfum þurft að hafa lokað
oftar en við höfum kært okkur um, ballmenningin
steinlá í langan tíma og í alltof langan tíma gátum við
ekki hitt félaga okkar úr öðrum félagsmiðstöðvum.
Árlega jólaballið á Flúðum var ekki í lok síðasta árs
og USSS (Undankeppni Söngkeppni félagsmiðstöðva
á Suðurlandi) var haldin í opinni dagskrá á Youtube
líkt og í fyrra, en ekki með pomp og prakt og
dansleik eins og árin þar áður. Það má í raun líkja
félagsmiðstöðvarstarfinu við íþróttastarf. Það hvetur
okkur áfram að mæta á æfingar ef við vitum að það er
mót framundan. Ef ekkert mót er á dagskrá þá vantar
svolítið upp á hvatninguna, þó svo að það sé gaman að
æfa og hitta vinina. Það er eins með félagsmiðstöðina,
okkur hefur vantað böllin, ferðalögin, rútuferðirnar
og að hitta alla hina sem mæta á aðra viðburði
til að hvetja okkur til að mæta í reglulegt starf
félagsmiðstöðvarinnar.
Þessi vetur byrjaði þó með „stæl” og okkur var
boðið á Selfoss þar sem félagsmiðstöðin Zelsíus
hélt ball og bauð félagsmiðstöðvum á suðurlandi
að koma. Stuðlabandið hélt
uppi stemningunni ásamt SZK
(Sprite Zero Klan) og vá hvað
við vorum til í þetta. Fyrirvarinn
var stuttur en það leyndi sér ekki
að foreldrar voru alveg jafn til
í þetta og meðlimir Zetors og
skutluðu þau unglingunum á
ballið þar sem starfsfólk Zetors
tók á móti þeim. Góð samvinna
milli starfsfólks félagsmiðstöðva
og foreldra er gríðarlega
mikilvæg og við erum þeim
sérstaklega þakklát þegar kemur
að öllu þessu skutli.
Við höfum öll þörf fyrir
að tilheyra hópi og vera með
jafningjum. Það er sérlega
mikilvægt að skapa aðstöðu
fyrir unglinga til að vera saman
í öruggu umhverfi og í umsjá
fullorðinna. Hjá Zetor starfa
fjórir starfsmenn, Ragnheiður
Hilmarsdóttir (Ragga), Hörður Óli Guðmundsson
(Höddi í Haga), Elías Bergmann Jóhannsson (Elli)
og Guðrún Ása Kristleifsdóttir (Gása). Guðrún
Ása er heilsu- og tómstundafulltrúi Grímsnes- og
Grafningshrepps og hóf störf hjá Zetor í haust.
Starfsfólk Zetors skipuleggur ávallt einhverja dagskrá
fyrir opnu kvöldin.
Í vetur höfum við oft fengið íþróttasalina fyrir
okkur og gátum því spriklað þar eins og okkur sýndist,
við vorum með pílumót, borðtennismót, fórum í
singstar, poppuðum, pöntuðum pizzu, bökuðum pizzu,
héldum ísveislu, spiluðum borðspil og tölvuleiki,
grilluðum pylsur og sykurpúða yfir eldi, vorum með
spurningakeppni og kahoot (sem er spurningakeppni
í tölvuformi), bökuðum kökur, fórum út í fótbolta og/
eða körfubolta o.m.fl. og stundum gerðum við bara
akkúrat ekki neitt og bara tjilluðum saman.
Flakkandi félagsmiðstöð á covid tímum
Krakkarnir í Zetor við útigrill á Borg.