Goðasteinn - 01.06.1985, Blaðsíða 102

Snorri Jónsson,
íþróttakennari,
sextugur
Snorri Jónsson.
Snorri Jónsson, íþróttakennari í Skógum, varð sextugur hinn 2.
mars sl. Atvikin höguðu því svo til, að ég dvaldist erlendis um það
leyti og gat því ekki sótt hann heim til að óska honum til hamingju
á þessum merkisdegi. Því vil ég nú bæta mér það upp með því að
skrifa til hans afmæliskveðju í fáum orðum, þessa trausta vinar
míns og samstarfsmanns um áratuga skeið.
Snorri er fæddur á Siglufirði 2. mars 1925, sonur hjónanna Jóns
Gíslasonar frá Bakka í Austur-Fljótum og Helgu Jóhannesdóttur,
skipstjóra á Heiði í Sléttuhlíð. Ungur hélt hann úr föðurgarði til
náms við Héraðsskólann í Reykholti, þar sem hann lauk prófi 1946.
Þá þegar um haustið hóf hann nám við íþróttakennaraskólann á
Laugarvatni og lauk þar prófi vorið 1947. Lx)ks stundaði hann nám
við Handiðaskólann í Reykjavík og lauk þar prófi sem smíða-
kennari. Strax að námi loknu fór hann að starfa í kennslugrein sinni
og kenndi fyrst við íþróttaskóla Jóns Þorsteinssonar í Reykjavík um
skeið. Síðan varð hann kennari við Alþýðuskólann á Eiðum
1949—50, en eftir það réðist hann sem kennari við hinn nýstofnaða
Héraðsskóla í Skógum undir Eyjafjöllum, þar sem hann starfaði
síðan samfleytt frá 1950 til 1984, er hann fluttist til Reykjavíkur.
100
Goðasteinn